ଷ୍ଟେଟ ବ୍ୟାଙ୍କ ଅଫ ଇଣ୍ଡିଆକୁ ୧୪ ହଜାର କୋଟି ଟଙ୍କାର ଋଣ ମାଗିଲା ଆଦାନୀ ଗ୍ରୁପ

ଅହମ୍ମଦାବାଦ: ଗୁଜୁରାଟର ମୁନ୍ଦ୍ରା ଠାରେ ଏକ ନୂତନ କାରଖାନା ନିର୍ମାଣ ପାଇଁ ଗୌତମ ଆଦାନୀଙ୍କ ଗ୍ରୁପ ଏସବିଆଇକୁ ମାଗିଲା ଋଣ | ଏହି କାରଖାନା ନିର୍ମାଣ ପାଇଁ ଆଦାନୀ ଗ୍ରୁପକୁ ୧୪,୦୦୦ କୋଟି ଟଙ୍କା ଋଣ ପାଇଁ ଆବେଦନ କରିଛି |ଏଥିପାଇଁ ଆଦାନୀ ଗ୍ରୁପ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ)ସହ ଯୋଗାଯୋଗ କରିଛି । ଆଦାନୀ ଗ୍ରୁପର ଏହି ପ୍ରକଳ୍ପର ମୋଟ ମୂଲ୍ୟ ପ୍ରାୟ ୧୯,୦୦୦ କୋଟି ଟଙ୍କା ହୋଇଥିବାବେଳେ ୧୫ ବର୍ଷର ଋଣ ନେବା ପାଇଁ ପ୍ରସ୍ତାବ ଦିଆଯାଇଛି | ସୂତ୍ରରୁ ପ୍ରକାଶ ଯେ ଏସବିଆଇ ଋଣ ରାଶିର ପ୍ରାୟ ୫୦୦୦ କୋଟି ଟଙ୍କା ନିଜ ପାଖେ ରଖିବ |

ଆଦାନୀ ଗ୍ରୁପର ସୂଚନା ମୁତାବକ ମୁନ୍ଦ୍ରାଠାରେ ଏକ ପେଟ୍ରୋକେମିକାଲ୍ କ୍ଲଷ୍ଟର ବିକାଶ ପାଇଁ ଏହି ଋଣ ପାଇଁ ଆବେଦନ କରାଯାଇଛି | ଏହାର ଉତ୍ପାଦନ କ୍ଷମତା ବାର୍ଷିକ ୨,୦୦୦ କିଲୋ ଟନ୍ ରହିବ ଏବଂ ଏମୁଲେସନ ପିଭିସି, ସସପେନ୍ସନ୍ ପିଭିସି ଏବଂ କ୍ଲୋରାଇଟେଡ୍ ପିଭିସି ପରି ଉତ୍ପାଦ ଉତ୍ପାଦନ କରିବ | କମ୍ପାନୀ ୨୦୨୧-୨୨ ପାଇଁ ବାର୍ଷିକ ରିପୋର୍ଟରେ କହିଥିଲା ଯେ ମୁନ୍ଦ୍ରାଠାରେ ମୋଟ ୨୦ ଲକ୍ଷ ମେଟ୍ରିକ୍ ଟନ୍ ପିଭିସିର କ୍ଷମତା ପର୍ଯ୍ୟାୟକ୍ରମେ ବିକଶିତ ହେବ।

୨,୦୦୦ କିଲୋ ଟନ ପ୍ରକଳ୍ପ ପ୍ରଥମ ପର୍ଯ୍ୟାୟରେ ଶେଷ ହେବ ଏବଂ ୨୦୨୪ ସୁଦ୍ଧା କାର୍ଯ୍ୟକ୍ଷମ ହେବ ବୋଲି ଆଶା କରାଯାଉଛି | ସୂଚନା ମୁତାବକ ଚଳିତ ବର୍ଷ ମାର୍ଚ୍ଚରେ ଆଦାନୀ ଗ୍ରୁପ୍ ନଭି ମୁମ୍ବାଇରେ ଏକ ଗ୍ରୀନ୍ ଫିଲ୍ଡ ଆନ୍ତର୍ଜାତୀୟ ବିମାନବନ୍ଦର ପ୍ରକଳ୍ପ ପାଇଁ ଏସବିଆଇରୁ ୧୨,୭୭୦ କୋଟି ଟଙ୍କା ଋଣ ମଧ୍ୟ ପାଇଥିଲା। ଏହି ଋଣ ଆଦାନୀ ଗ୍ରୁପର ଅନ୍ୟ ଏକ ସହାୟକ କମ୍ପାନୀ ନଭି ମୁମ୍ବାଇ ଅନ୍ତର୍ଜାତୀୟ ବିମାନବନ୍ଦର ପ୍ରାଇଭେଟ ଲିମିଟେଡ (NMIAL) ଦ୍ୱାରା ନିଆଯାଇଛି।