ଜିଓ ମାର୍ଟ ଓ ଟାଟାକୁ ଟକ୍କର ଦେବାକୁ ଡିମାର୍ଟ ଲଞ୍ଚ କରିପାରେ ଏହି ସ୍ୱତନ୍ତ୍ର ଯୋଜନା

ନୂଆଦିଲ୍ଲୀ: ରିଟେଲ ମଲ କମ୍ପାନୀ ଡିମାର୍ଟ ରିଲାଏନ୍ସର ଜିଓ ମାର୍ଟ ଏବଂ ଟାଟାର ବିଗ୍ ବାସ୍କେଟକୁ କଡା ଟକ୍କର ଦେବାକୁ ଯୋଜନା କରିଛି। ଏକ ରିପୋର୍ଟ ଅନୁଯାୟୀ, ଏଥିପାଇଁ କମ୍ପାନୀ ଜୁନ୍ ମାସରେ ଗ୍ରାହକଙ୍କୁ ବିଭିନ୍ନ ଉତ୍ପାଦ ଉପରେ ୨୦ ରୁ ୩୦ ପ୍ରତିଶତ ରିହାତି ଦେବାକୁ ଯୋଜନା କରିଛି। ଉଲ୍ଲେଖନୀୟ କଥା ହେଉଛି, ଗତ କିଛି ବର୍ଷ ମଧ୍ୟରେ ଦେଶରେ ଅନଲାଇନ୍ ଖୁଚୁରା ବ୍ୟବସାୟରେ ବୃଦ୍ଧି ଦେଖିବାକୁ ମିଳିଛି। ଗ୍ରାହକଙ୍କୁ ଆକର୍ଷିତ କରିବା ପାଇଁ ଜିଓ ମାର୍ଟ ଏବଂ ବିଗ୍ ବାସ୍କେଟ୍ ବିଭିନ୍ନ ଅଫର୍ ପ୍ରଦାନ କରୁଛନ୍ତି | ଏଭଳି ପରିସ୍ଥିତିରେ, ବଜାରରେ ପ୍ରତିଯୋଗିତା କରିବାକୁ ଡିମାର୍ଟ ପକ୍ଷରୁ ଏହି ନିଷ୍ପତ୍ତି ନିଆଯାଇଛି | ବାସ୍ତବରେ ଡିମାର୍ଟ ଆର୍ଥିକ ବର୍ଷ ୨୦୨୨ ମସିହାରେ ମୋଟ ୧୬୬୭ କୋଟି ଟଙ୍କା ଆୟ କରିଥିବାବେଳେ, ଯେଉଁଥିରୁ କମ୍ପାନୀ ୧୪୨ କୋଟି ଟଙ୍କା କ୍ଷତି ମଧ୍ୟ ସହିଥିଲା | ଗତ ବର୍ଷ ତୁଳନାରେ ଏହି କ୍ଷତି ଅଧିକ ଥିଲା |

ଏଥି ସହିତ, କମ୍ପାନୀ ୨୦୨୩ ବର୍ଷର ଆୟ ବାବଦରେ ଯଦିଓ ଖୁଲାସା କରିନାହିଁ, କିନ୍ତୁ ଏଭଳି ପରିସ୍ଥିତିରେ କମ୍ପାନୀ ଏହାର କ୍ଷତି ହ୍ରାସ କରିବା ଏବଂ ଅନ୍ୟ କମ୍ପାନୀମାନଙ୍କୁ କଡା ଟକ୍କର ଦେବାକୁ ହ୍ଵାଟ୍ସଆପ ସେବା ଆରମ୍ଭ କରିବାକୁ ମଧ୍ୟ ପ୍ରସ୍ତୁତ ହେଉଛି । କମ୍ପାନୀ ଜିଓ ମାର୍ଟ ପରି ଗ୍ରାହକଙ୍କୁ ଜୁନ୍ ୨୦୨୩ରୁ ହ୍ଵାଟ୍ସଆପ ଜରିଆରେ ସାମଗ୍ରୀ ଅର୍ଡର କରିବାକୁ ବିକଳ୍ପ ଦେବ। ଏକ ସୂତ୍ରରୁ ଜଣାପଡିଛି ଯେ, ଜୁଲାଇ ମାସରେ ଦେଶରେ ଅଧିକାଂଶ ସ୍ଥାନରେ ବର୍ଷା ହେବାକୁ ଯାଉଥିବାବେଳେ ବର୍ଷାରେ ବାହାରକୁ ଯିବା ପରିବର୍ତ୍ତେ ଲୋକମାନେ ଘରେ ସାମଗ୍ରୀ ଅର୍ଡର କରିବାକୁ ପସନ୍ଦ କରନ୍ତି |

ଏଭଳି ପରିସ୍ଥିତିରେ ଡିମାର୍ଟ ମଧ୍ୟ ଏହି ସୁଯୋଗର ଲାଭ ଉଠାଇବାକୁ ଚାଁହୁଛି ଏବଂ ସେମାନଙ୍କର ବଜାର ଆଧାରକୁ ମଜବୁତ କରିବାକୁ ଚାଁହୁଛି | ଉଲ୍ଲେଖ ଥାଉ କି ଯେ ଜିଓ ମାର୍ଟ ଏବଂ ବିଗ୍ ବାସ୍କେଟ୍ ଦେଶର ୨୦୦ରୁ ୪୫୦ଟି ସହରରେ ଥିବାବେଳେ ଡିମାର୍ଟ କେବଳ ୨୨ଟି ସହରରେ ଅଛି | ଏଭଳି ପରିସ୍ଥିତିରେ ଡିମାର୍ଟ ଗ୍ରାହକଙ୍କୁ ୨୦ ରୁ ୩୦ ପ୍ରତିଶତ ରିହାତି ଦେଇ ଆକର୍ଷିତ କରିବାକୁ ଚେଷ୍ଟା କରିବ ବୋଲି ଜଣାପଡିଛି |