ଛଟେଇ ଆରମ୍ଭ କଲା ଓୟୋ, ୬୦୦ କର୍ମଚାରୀ ବିଦା

ନୂଆଦିଲ୍ଲୀ: ଦେଶରେ ହୋଟେଲ ବା ଲଜ ବ୍ୟବସାୟ ଚଳାଉଥିବା ପ୍ରମୁଖ କମ୍ପାନି ଓୟୋ ଏବେ ଏକ ବଡ ନିଷ୍ପତ୍ତି ନେଇଛି | ବାସ୍ତବରେ ଓୟୋ, ଟେକ୍ନୋଲୋଜି ଏବଂ ଉତ୍ପାଦ ୟୁନିଟରେ ୬୦୦ କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇଛି | ସେହିପରି ସେଲସରେ ୨୫୦ଜଣଙ୍କୁ ନିଯୁକ୍ତ କରିବାକୁ କମ୍ପାନି ଯୋଜନା କରିଛି। ଅନେକ ପ୍ରକଳ୍ପ ବନ୍ଦ ହେବା ଏବଂ ୟୁନିଟ୍ ମିଶ୍ରଣ ପରେ କମ୍ପାନି ଏହି ନିଷ୍ପତ୍ତି ନେଇଛି। ଓୟୋ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ କମ୍ପାନିର ଉତ୍ପାଦ, ଇଞ୍ଜିନିୟରିଂ, କର୍ପୋରେଟ୍ ମୁଖ୍ୟାଳୟ ଏବଂ ଓୟୋ ଭ୍ୟାକେସନ୍ ହୋମ୍ସ ଟିମକୁ ଛୋଟ କରାଯାଇଛି। ଏଥି ସହିତ ସେଲସରେ ଅଧିକ କର୍ମଚାରୀଙ୍କୁ ନିଯୁକ୍ତ କରିବାକୁ ନିଷ୍ପତ୍ତି ନିଆଯାଇଛି | ଏହି କାରଣରୁ ଓୟୋ ୬୦୦ କର୍ମଚାରୀଙ୍କୁ ବିଦା କରିବ ଏବଂ ୨୫୦ଜଣଙ୍କୁ ନିଯୁକ୍ତି ଦିଆଯିବ।

ଏହାଦ୍ୱାରା କମ୍ପାନିରେ କର୍ମଚାରୀଙ୍କ ସଂଖ୍ୟା ୧୦ ପ୍ରତିଶତ ହ୍ରାସ ପାଇବ। ବର୍ତ୍ତମାନ କମ୍ପାନିରେ ୩୭୦୦ଜଣ କର୍ମଚାରୀ କାର୍ଯ୍ୟ କରୁଛନ୍ତି। ଓୟୋର ପ୍ରତିଷ୍ଠାତା ତଥା ସିଇଓ ରିତେଶ ଅଗ୍ରୱାଲ କହିଛନ୍ତି ଯେ କମ୍ପାନିକୁ ଆଗକୁ ନେବାରେ ସହଯୋଗ କରିଥିବା କର୍ମଚାରୀମାନଙ୍କ ଏହି ନିଷ୍ପତ୍ତି ନେବା ଦୁର୍ଭାଗ୍ୟଜନକ। କମ୍ପାନି ଛାଡୁଥିବା କର୍ମଚାରୀମାନେ କିଭଳି ଭଲ ସ୍ଥାନରେ କାମ କରିପାରିବେ ସେନେଇ ଆମେ ଯଥାସମ୍ଭବ ଚେଷ୍ଟା କରୁଛୁ | ଶେଷରେ ସେ କହିଛନ୍ତି ଯେ ଯେହେତୁ ଓୟୋ ଆଗକୁ ବଢୁଛି ଏବଂ ଭବିଷ୍ୟତରେ ଯଦି କମ୍ପାନିରେ ଏହି କର୍ମଚାରୀଙ୍କ ପାଇଁ କୌଣସି ସୁଯୋଗ ଆସେ, ତେବେ ସେମାନଙ୍କୁ ଯୋଗାଇ ଦିଆଯିବ | ହୋଟେଲ ରୁମ୍ ପ୍ରଦାନକାରୀ କମ୍ପାନି ଓୟୋ ରିତେଶ ଅଗ୍ରୱାଲଙ୍କ ଦ୍ୱାରା ୨୦୧୩ ମସିହାରେ ଆରମ୍ଭ କରାଯାଇଥିଲା | ଏହାର ସମ୍ପୂର୍ଣ୍ଣ ନାମ ହେଉଛି ଅନ୍ ୟୌର ଓନ୍ ରୁମ୍ସ।