ହସ୍ପିଟାଲ୍‌ରେ ଅଜଣା ଗ୍ୟାଙ୍ଗ୍‌ର ଗୁଳି ଚାଳନା: ଅଭିଯୁକ୍ତ ଗିରଫ

ପାଟ୍‌ନା: ପାଟନାର ପାରସ ହସ୍ପିଟାଲରେ ଚନ୍ଦନ ମିଶ୍ରଙ୍କ ହତ୍ୟା ମାମଲାରେ ପଶ୍ଚିମବଙ୍ଗରୁ ଅଭିଯୁକ୍ତଙ୍କୁ ଗିରଫ କରାଯାଇଛି। ପାଟନା ପୁଲିସ ଏବଂ ଏସଟିଏଫ ଦଳ ମିଳିତ ଭାବରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଯଦିଓ ପୁଲିସ ଏପର୍ଯ୍ୟନ୍ତ ଗିରଫଦାରୀକୁ ଆନୁଷ୍ଠାନିକ ଭାବରେ ନିଶ୍ଚିତ କରିନାହିଁ, ସୂତ୍ର କହୁଛି ଯେ ଶେରୁ ସିଂହ ଗ୍ୟାଙ୍ଗ ସହିତ ଜଡ଼ିତ ଗୁଳିଚାଳକମାନଙ୍କୁ ଗିରଫ କରାଯାଇଛି।

ଉଲ୍ଲେଖଯୋଗ୍ୟ, ଗୁରୁବାର ଦିନ ପାଟନାର ଏକ ଘରୋଇ ହସ୍ପିଟାଲ ଭିତରେ ଦେଖିବାକୁ ମିଳିଛି ଏକ ଅପ୍ରୀତିକର ଘଟଣା।  ହସ୍ପିଟାଲ ଭିତରେ ପାରୋଲରେ ଥିବା ଜଣେ କଏଦୀଙ୍କୁ ପାଞ୍ଚ ଜଣ ଅଜଣା ଲୋକ ଗୁଳି କରିଥିବା ଅଭିଯୋଗ ହୋଇଛି। ଯାହାକି ଏବେ  ବିହାରର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଇଛି।

ପୁଲିସର ସୂଚନା ଅନୁଯାୟୀ, ସହରର ରାଜା ବଜାର ଅଞ୍ଚଳର ପାରସ ହସ୍ପିଟାଲରେ ଏହି ଗୁଳିକାଣ୍ଡ ଘଟିଥିଲା। ବକ୍ସର ଜିଲ୍ଲାର ଏକ ହତ୍ୟା ମାମଲାର ଅଭିଯୁକ୍ତ ଚନ୍ଦନ ମିଶ୍ର ନାମକ ପୀଡିତଙ୍କୁ ବେଉର ଜେଲରୁ ମେଡିକାଲ ପାରୋଲରେ ମୁକ୍ତ କରାଯାଇଥିଲା ଏବଂ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲା।

ଘଟଣାର ସିସିଟିଭି ଫୁଟେଜରେ ପାଞ୍ଚ ଜଣ ସଶସ୍ତ୍ର ବ୍ୟକ୍ତି ଦିନ ଦି’ପ୍ରହରେ ହସ୍ପିଟାଲ ପରିସରରେ ପ୍ରବେଶ କରି କଏଦୀଙ୍କ ଉପରେ ଗୁଳି ଚଳାଉଥିବାର ଦେଖାଯାଇଥିଲା। ତାଙ୍କ ଦେହରେ ଅନେକ ଗୁଳି ବାଜିବା ପରେ ସେ ହସ୍ପିଟାଲରେ ଚିକିତ୍ସାଧୀନ ଥିଲେ।