ଋଣ ଭାର ପାଇଁ ପରିବାର ସହ ଜୀବନ ହାରିଲେ ଡାକ୍ତର !

ଚେନ୍ନାଇ: ଚେନ୍ନାଇରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଡାକ୍ତର, ତାଙ୍କ ସ୍ତ୍ରୀ ଏବଂ ଦୁଇ ପୁଅଙ୍କ ମୃତଦେହ ତାଙ୍କ ଘରେ ମିଳିଛି। ଏହି ଘଟଣା ଚେନ୍ନାଇର ଆନ୍ନା ନଗରରେ ଘଟିଥିବା କୁହାଯାଉଛି। ପୁଲିସର କହିବା ଅନୁସାରେ, ଏହା ଏକ ଗଣ ଆତ୍ମହତ୍ୟା ମାମଲା ପରି ମନେ ହେଉଛି। ପୁଲିସ ବର୍ତ୍ତମାନ ସମ୍ପୂର୍ଣ୍ଣ ମାମଲାର ତଦନ୍ତ କରୁଛି।

ମୃତକମାନେ ହେଲେ ଡାକ୍ତର ବାଲାମୁରୁଗନ, ତାଙ୍କ ପତ୍ନୀ ସୁମତି (ଯିଏ ଜଣେ ଓକିଲ ଥିଲେ), ପୁଅ ଜସୱନ୍ତ କୁମାର ଯିଏ ନିଟ୍ ପାଇଁ ପ୍ରସ୍ତୁତି କରୁଥିଲେ ଏବଂ ଏକାଦଶ ଶ୍ରେଣୀରେ ପଢୁଥିବା ଲିଙ୍ଗେଶ କୁମାର।

ପୁଲିସର ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ, ଡାକ୍ତର ବାଲାମୁରୁଗନ୍ ଚେନ୍ନାଇର ବିଭିନ୍ନ ଅଞ୍ଚଳରେ ଅନେକ ଅଲ୍ଟ୍ରାସାଉଣ୍ଡ କେନ୍ଦ୍ର ଚଳାଉଥିଲେ। ତାଙ୍କ ଉପରେ ବହୁତ ଋଣ ଥିଲା। ଏହି କାରଣରୁ ସେ ତାଙ୍କ ପରିବାର ସହିତ ଆତ୍ମହତ୍ୟା କରିଥିବା ଅନୁମାନ କରାଯାଉଛି। ତଥାପି, ପୁଲିସର ତଦନ୍ତ ସମାପ୍ତ ହେବା ପରେ ହିଁ ମୃତ୍ୟୁର ପ୍ରକୃତ କାରଣ କ'ଣ ତାହା ସ୍ପଷ୍ଟ ହେବ।

ମାମଲାର ତଦନ୍ତ କରୁଥିବା ପୁଲିସ ଅଧିକାରୀ କହିଛନ୍ତି ଯେ, ପ୍ରାରମ୍ଭିକ ତଦନ୍ତ ପରେ ଆମେ ଅନୁଭବ କରୁଛୁ ଯେ ଏହା ଏକ ଆତ୍ମହତ୍ୟା ମାମଲା। ତଥାପି, ଆମେ ଏବେ ବି ଏହି ଘଟଣାକୁ ବିଭିନ୍ନ ଦିଗରୁ ତଦନ୍ତ କରୁଛୁ। ତଦନ୍ତ ସମାପ୍ତ ହେବା ପରେ ହିଁ ନିଶ୍ଚିତ ଭାବରେ କିଛି କୁହାଯାଇପାରିବ।