ସ୍ବାମୀର ଦାଢ଼ି ପସନ୍ଦ ନଆସିବାରୁ ଦିଅର ସହିତ ଫେରାର ହେଲେ ମହିଳା

ମିରଟ: ଉତ୍ତରପ୍ରଦେଶର ମିରଟରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଜଣେ ମହିଳା ତାଙ୍କ ସ୍ୱାମୀଙ୍କ ଦାଢ଼ିକୁ ଏତେ ନାପସନ୍ଦ କରୁଥିଲେ ଯେ, ତାହାକୁ କାଟିବା ପାଇଁ ଜିଦ୍ କରି ଚାଲିଥିଲେ। କିନ୍ତୁ ଯେତେବେଳେ ତାଙ୍କ ସ୍ୱାମୀ ଦାଢ଼ି କାଟିବାକୁ ମନା କଲେ, ସେତେବେଳେ ମହିଳା ରାଗିଯାଇ ନିଜ ଦିଅର ସହିତ ଫେରାର ହେଲେ ବୋଲି ଜଣାଯାଇଛି। ଏବେ ସ୍ୱାମୀ ପୁଲିସରେ ଅଭିଯୋଗ କରିଛନ୍ତି ଯେ, ତାଙ୍କ ସ୍ତ୍ରୀ ତାଙ୍କଠାରୁ ୫ଲକ୍ଷ ଦାବି କରୁଛନ୍ତି।

ଏହି ଘଟଣାଟି ମିରଟର ଲିସାଡି ଗେଟ୍ ଥାନା ଅଞ୍ଚଳରେ ଥିବା ଉଜ୍ଜ୍ୱଳ ଗାର୍ଡେନ୍ କଲୋନୀରେ ଘଟିଛି। ଏହି ସ୍ଥାନର ବାସିନ୍ଦା ମୌଲାନା ଶାକିରଙ୍କର ବିବାହ ପ୍ରାୟ ୭ମାସ ପୂର୍ବେ ଇଞ୍ଚୌଲିର ବାସିନ୍ଦା ଅର୍ଶୀ ନାମକ ଏକ ମହିଳାଙ୍କ ସହିତ ହୋଇଥିଲା। ବିବାହ ପରେ, ଅର୍ଶିକୁ ଶାକିରଙ୍କ ଦାଢ଼ି ପସନ୍ଦ ଆସିନଥିଲା। ସେ ଶାକିରଙ୍କୁ କହିଲେ ଯେ, ଯଦି ସେ ଏକାଠି ରହିବାକୁ ଚାହାଁନ୍ତି, ତେବେ ତାଙ୍କୁ ତାଙ୍କ ଦାଢ଼ି କାଟିବାକୁ ପଡିବ। ଶାକିର ସ୍ପଷ୍ଟ ଭାବରେ ମନା କରିଦେଲେ କାରଣ ଦାଢ଼ି ତାଙ୍କ ଧାର୍ମିକ ବିଶ୍ୱାସର ଏକ ଅଂଶ। ଏହି କଥାକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ା ଆରମ୍ଭ ହୋଇଗଲା। ଶାକିର ତାଙ୍କ ସ୍ତ୍ରୀଙ୍କ ପରିବାରକୁ ମଧ୍ୟ ଏହା କହିଥିଲେ, କିନ୍ତୁ କୌଣସି ସମାଧାନର ବାଟ ବାହାରିଲା ନାହିଁ। ଏହି ସମୟ ମଧ୍ୟରେ ଶାକିର ଜାଣିପାରିଲେ ଯେ, ତାଙ୍କ ସ୍ତ୍ରୀ ତାଙ୍କ ଭାଇଙ୍କ ସହିତ ପ୍ରେମ ସମ୍ପର୍କ ରଖିଛନ୍ତି। ପରେ ଫେବ୍ରୁଆରି ୩ ତାରିଖରେ, ଅର୍ଶୀ ତାଙ୍କର ସମସ୍ତ ଜିନିଷପତ୍ର ନେଇ ଦିଅରଙ୍କ ସହିତ ଫେରାର ହୋଇ ଯାଇଥିଲେ।

ଏହି ଘଟଣା ପରେ ଶାକିର ପୁଲିସ ଷ୍ଟେସନରେ ତାଙ୍କ ସ୍ତ୍ରୀ ଏବଂ ଭାଇଙ୍କ ଫେରାର ହେବା ନେଇ ଅଭିଯୋଗ ଦାଖଲ କରିଥିଲେ। ସେ ଅର୍ଶୀର ପରିବାର ସଦସ୍ୟଙ୍କୁ ମଧ୍ୟ ଘଟଣା ବିଷୟରେ ଜଣାଇଥିଲେ। କିନ୍ତୁ ସେମାନେ କହିଥିଲେ ଯେ, ସେମାନଙ୍କର ଆଉ ତାଙ୍କ ଝିଅ ସହିତ କୌଣସି ସମ୍ପର୍କ ନାହିଁ। ଶାକିରଙ୍କ ଅଭିଯୋଗ ମୁତାବକ ଫେରାର ହେବା ପରେ, ଅର୍ଶୀ ତାଙ୍କୁ ୫ ଲକ୍ଷ ଦେବାକୁ ଚାପ ପକାଉଛନ୍ତି। ଅଭିଯୋଗ ପାଇବା ପରେ ପୁଲିସ ତଦନ୍ତ କରୁଥିବା କହିଛି।