ମା’ଏବଂ ଝିଅ ସାମ୍ନାରେ ଟ୍ରକ୍ ନେଲା ବାପାଙ୍କର ଜୀବନ

ସୁନ୍ଦରଗଡ଼: ସୁନ୍ଦରଗଡ଼ ଟାଉନ ଥାନା ପାରିଜାତ ପାର୍କ ନିକଟ ଛକରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ୩ ବର୍ଷର ଝିଅକୁ ସ୍କୁଲ ଛାଡ଼ିବାକୁ ଯାଉଥିବା ବେଳେ ବାପାଙ୍କ ଉପରେ ଟ୍ରକ୍ ଚଢ଼ିଯାଇଛି। ଫଳରେ ମା’ଏବଂ ଝିଅ ସାମ୍ନାରେ  ବାପାଙ୍କର ଜୀବନ ଚାଲିଯାଇଛି ।  

ବାଇକରେ ବାପା, ମା’ ଏବଂ ଝିଅ  ଯାଉଥିବା ବେଳେ ଏଭଳି ଘଟିଛି । ସଦରଥାନା ମଳିପାନିରୁ ବାପା,ମା’ ଝିଅକୁ ସୁନ୍ଦରଗଡ଼ ପବ୍ଲିକ ସ୍କୁଲ ଛାଡ଼ିବାକୁ ଯାଉଥିଲେ। ଘଟଣାସ୍ଥଳରେ ଦୁର୍ଘଟଣା ନେଇ ଉତ୍ତେଜନା ପ୍ରକାଶ ପାଇଛି ।

ମୃତକଙ୍କ ନାମ ଯୁଗେଶ୍ବର କାଲୋ ବୋଲି ଜଣାପଡ଼ିଛି। ମୃତ ଯୋଗେଶ୍ବରଙ୍କ ସ୍ତ୍ରୀ ସରୋଜିନୀଙ୍କ ଗୋଡରେ ଆଘାତ ଲାଗିଥିବାରୁ ତାଙ୍କୁ ଚିକିତ୍ସାଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ନର୍ସରୀରେ ପଢ଼ୁଥିବା ୩ ବର୍ଷର ଝିଅ ଶ୍ରଦ୍ଧାଞ୍ଜଳି ସୁରକ୍ଷିତ ଥିବା କୁହାଯାଉଛି। 

ଅଧିକ ପଢ଼ନ୍ତୁ: ଜିଲ୍ଲା ପ୍ରଶାସନ ଜନଶୁଣାଣି: ୯୦ ଶ୍ରମିକଙ୍କୁ ୧ କୋଟି ୨୪ ଲକ୍ଷ ଟଙ୍କାର ସହାୟତା

ଦୁର୍ଘଟଣା ପରେ ‌ସ୍ଥାନୀୟ ଲୋକଙ୍କ ମଧ୍ୟରେ ଊତ୍ତେଜନା ପ୍ରକାଶ ପାଇଛି। ଲୋକେ ରାସ୍ତାରୋକ କରିଛନ୍ତି। ଫଳରେ ରାସ୍ତାର ଉଭୟ ପାର୍ଶ୍ବରେ ବହୁ ଗାଡ଼ି ମଟର ଅଟକି ରହିଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିବା ସହିତ ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଛି। ଏହା ସହିତ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଛି।

ସୂଚନାଯୋଗ୍ୟ,, ଏମସିଏଲ ଯାଉଥିବା ଏକ ଖାଲି ଟ୍ରକ୍ ବାଇକକୁ ଧକ୍କା ଦେଇ ଚଢ଼ି ଯାଇଥିଲା। ମା, ଝିଅ ଦୂରକୁ ଛିଟକି ପଡ଼ିଥିଲେ। ଦୁର୍ଘଟଣା ଏତେ ଭୟଙ୍କର ଥିଲା ଯେ, ବାଇକ୍ ଉପରେ ଟ୍ରକ୍ ଚଢ଼ିଯିବା ସହ ଯୁଗେଶ୍ବରଙ୍କୁ କିଛି ବାଟ ଘୋଷାଡ଼ି ନେଇଥିଲା। ଘଟଣାସ୍ଥଳରେ ହିଁ ତାଙ୍କ ପ୍ରାଣବାୟୁ ଉଡ଼ି ଗଲା।

ଟ୍ରକ୍ ଚକରେ ଲାଖି ରହିଥିବା ମୃତଦେହ ପାଖରେ ମା, ଛୁଆ ବିକଳ ହୋଇ  ରାହା ଧରି କାନ୍ଦୁଥିବା ଦୃଶ୍ଯ ଘଟଣାସ୍ଥଳରେ ଉପସ୍ଥିତ ଲୋକଙ୍କ ଆଖିରେ ଲୁହ ଭରି ଦେଇଥିଲା।  ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ  ପାଇଥିବାବେଳେ ଛକରେ ବେଆଇନ ଟ୍ରକ୍ ପାର୍କିଂ, ଅନଭିଜ୍ଞ ଚାଳକଙ୍କ ବେପରୱା ଗାଡ଼ି ଚାଳନା ଯୋଗୁଁ ଦୁର୍ଘଟଣା ଘଟି ଧନଜୀବନ ହାନି ହେଉଥିବା ଲୋକେ ଅଭିଯୋଗ କରିଛନ୍ତି।

ଅଧିକ ପଢ଼ନ୍ତୁ: ଧରାପଡ଼ିଲେ ମଦବେପାରୀ: ୨୧୮ ଲିଟର ମହୁଲି ମଦ, ୨ଟି ସ୍କୁଟି ଜବତ