ପିଲାଙ୍କ ପାଇଁ ଆସିଥିବା ସରକାରୀ ୟୁନିଫର୍ମ-ଜୋତା ଡମ୍ପିଂୟାର୍ଡରେ ଖତ ଖାଉଛି

ଜୟପୁର: ପିଲାଙ୍କ ମଧ୍ୟରେ ସ୍କୁଲ ଯିବା ଲାଗି ଆଗ୍ରହ ସୃଷ୍ଟି କରିବା ପାଇଁ ରାଜ୍ୟ ସରକାର କୋଟିକୋଟି ଟଙ୍କା ଖର୍ଚ୍ଚ କରୁଛନ୍ତି। ମଧ୍ୟାହ୍ନ ଭୋଜନ ବ୍ୟବସ୍ଥା ସହିତ  ୟୁନିଫର୍ମ  ଓ ଜୋତା ପିଲାଙ୍କୁ ଯୋଗାଇ ଦିଆଯାଉଛି।

ତେବେ ୟୁନିଫର୍ମ  ଓ ଜୋତା  ପିଲାଙ୍କୁ ମିଳିବା ପରିବର୍ତ୍ତେ ଡମ୍ଫିୟାର୍ଡରେ ଖତ ଖାଉଛି। ଏପରି ଏକ ଅଭାବନୀୟ ଘଟଣା କୋରାପୁଟ ଜିଲ୍ଲା ବୈପାରିଗୁଡାରେ ଦେଖିବାକୁ ମିଳିଛି।

ବୈପାରିଗୁଡାରୁ ୨ କିମି ଦୂର ଥିବା ଏକ ଡମ୍ପିଂୟାର୍ଡରେ ସ୍କୁଲ ଓ ଅଙ୍ଗନୱାଡ଼ି ପିଲାଙ୍କ ପାଇଁ ଆସିଥିବା ବହୁ ସଂଖ୍ୟକ ୟୁନିଫର୍ମ ଏବଂ ଜୋତା ପଡ଼ିଥିବାରୁ ଦେଖିବାକୁ ମିଳିଛି। ପିଲାଙ୍କ ମଧ୍ୟରେ ବାଣ୍ଟିବା ପରିବର୍ତ୍ତେ କିଏ ଏବଂ କାହିଁକି ଏସବୁ ଫୋପାଡ଼ିଛି ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନି । କିଏ ଏଭଳି କାମ କରିଛି ସେନେଇ ତଦନ୍ତ କରିବାକୁ ସାଧାରଣରେ ଦାବି ହୋଇଛି ।

ପ୍ରାୟ ୩ ଶହ ଜୋତା ଏବଂ ୟୁନିଫର୍ମ ଡମ୍ପିଂୟାର୍ଡରେ ପଡିଥିବା ଦେଖିବାକୁ ମିଳିଛି । ପ୍ରଥମେ ଜଣେ ଗାଈ ଚରାଳି ଏସବୁ ଦେଖିବା ପରେ ଲୋକଙ୍କୁ ଖବର ଦେଇଥିଲେ।   

ଅଧିକ ପଢ଼ନ୍ତୁ: ଛାଡ଼ଖାଇରେ ମାଛ ବିକିବାକୁ ଯିବାବେଳେ ଟ୍ରକ୍‌ ଦୁର୍ଘଟଣାରେ ଜୀବନ ଗଲା

ପୋଷାକରେ ଆମେ। ଗଢିବୁ ନୂଆ ଓଡ଼ିଶା ଲୋଗୋ ଲାଗିଛି।  ସରକାରଙ୍କ ତରଫରୁ ଯୋଗାଇ ଦିଆଯାଉଥିବା ଜୋତା ଏବଂ ୟୁନିଫର୍ମ  ବଣ୍ଟନ ପରିବର୍ତ୍ତେ ଫିଙ୍ଗିବା ପଛର କାରଣ କଣ ହୋଇପାରେ ବୋଲି ଚର୍ଚ୍ଚା ହେଉଛି।

ଘଟଣା ପଛରେ କାହାର ହାତ ରହିଛି ସେନେଇ ନାନା ପ୍ରଶ୍ନ ଉଠିବାରେ ଲାଗିଛି। ଏନେଇ ସମ୍ପୃକ୍ତ ବିଭାଗ ନିକଟରେ କିଛି ଖବର ନାହିଁ । ସ୍ଥାନୀୟ ଗୋଷ୍ଠୀ ଶିକ୍ଷା ଅଧିକାରୀ ଏ ସମ୍ପର୍କରେ ନୀରବତା ଅବଲମ୍ବନ କରୁଛନ୍ତି। 

ଅଧିକ ପଢ଼ନ୍ତୁ: ବାଣୀବିହାର ରେଳଧାରଣା କଡ଼ରେ କ୍ଷତାକ୍ତ ମୃତଦେହ, ପୁଲିସର ତଦନ୍ତ ଆରମ୍ଭ