ସିଆରପିଏଫ୍ ଯବାନଙ୍କ ଜମ୍ମୁ କଶ୍ମୀରରେ ମୃତ୍ୟୁ, କାରଣ ଅସ୍ପଷ୍ଟ

ରୁପ୍ରା: ଓଡ଼ିଆ ସିଆରପିଏଫ୍ ଯବାନଙ୍କ ଜମ୍ମୁ କଶ୍ମୀରରେ ରବିବାର ଅପରାହ୍ଣରେ ମୃତ୍ୟୁ ହୋଇଛି। ମୃତ ଯବାନ ହେଲେ ଭାସ୍କର ଜଡ଼ା। ସେ ଶ୍ରୀନଗରର କୋନିଖାନସ୍ଥିତ ୧୬୧ ବାଟାଲିୟନରେ କାର୍ଯ୍ୟରତ ଥିଲେ। 

ସୂଚନା ଅନୁସାରେ କଳାହାଣ୍ଡି ଜିଲ୍ଲା ନର୍ଲା ବ୍ଲକ ଅଞ୍ଚଳର ସମ୍ଭୁ ଜଡ଼ା ଓ କେତକୀ ଜଡ଼ାଙ୍କ ପୁଅ ଭାସ୍କର ୨୦୧୪ରେ ସିଆରପିଏଫ୍‌ ଯୋଗ ଦେଇଥିଲେ। ସେ ଆଜି ଅପରାହ୍ଣ ପ୍ରାୟ ୩ଟାରେ ଶ୍ରୀନଗରରୁ ଥାଇ ପରିବାର ଲୋକଙ୍କ ସହିତ ମୋବାଇଲ ଫୋନ୍ରେ କଥା ହୋଇଥିଲେ। ବାପା ଓ ସ୍ତ୍ରୀଙ୍କ ସହିତ ଖୁସିରେ କଥା ହୋଇଥିଲେ। ଫୋନ୍‌ରେ କଥା ହେବାର ପ୍ରାୟ ୧ ଘଣ୍ଟା ପରେ ଭାସ୍କରଙ୍କ ମୃତ୍ୟୁ ନେଇ ସିଆରପିଏଫ୍ ପକ୍ଷରୁ ଖବର ଆସିଲା। 

ସୂଚନାଯୋଗ୍ୟ, ଭାସ୍କର ଜଡ଼ା ଗତମାସ ୧୮ ତାରିଖରେ ଘରକୁ ଆସିଥିଲେ। ତାଙ୍କର ଘରେ ବାପା, ମାଙ୍କ ସମେତ ପତ୍ନୀ ନୂତନ ଜଡ଼ା, ଝିଅ (୬ବର୍ଷ) ଓ ପୁଅ (୧୮ମାସ) ଅଛନ୍ତି।  ତାଙ୍କର ମୃତ୍ୟୁକୁ ପରିବାର ଲୋକେ ସହଜରେ ଗ୍ରହଣ କରିପାରୁ ନାହାନ୍ତି। ମୃତ୍ୟୁର କାରଣ ଅସ୍ପଷ୍ଟ ରହିଛି। ଆସନ୍ତାକାଲି ତାଙ୍କର ମରଶରୀର ଜନ୍ମଭୂମିକୁ ପହଞ୍ଚିବ ବୋଲି ଆଶା କରାଯାଉଛି।