ନଦୀରୁ ମୃତଦେହ ଉଦ୍ଧାର, ହତ୍ୟା ଅଭିଯୋଗ

ଆଳି/ ଗୋବିନ୍ଦପୁର: ଆଳି ବ୍ଲକ ମାହାରାକୁଦ ଗ୍ରାମର ଜଣେ ବ୍ୟକ୍ତିଙ୍କ ମୃତଦେହ ଆଜି ଖରସ୍ରୋତା ନଦୀରୁ ଉଦ୍ଧାର କରାଯାଇଛି। ସେ ହେଉଛନ୍ତି ନିରଞ୍ଜନ ସାହୁ। ସ୍ୱୟଂ ସହାୟକ ଗୋଷ୍ଠୀର ଅର୍ଥ ଆଦାୟ କରିବାକୁ ଯାଇଥିବା ବେଳେ ସେ ଡିସେମ୍ବର ମାସ ୭ ତାରିଖରୁ ନିଖୋଜ ଥିଲେ। ବହୁ ଖୋଜାଖୋଜି ପରେ ତାଙ୍କର ପତ୍ତା ମିଳି ନ ଥିଲା। ସେହି ମାସ ୧୧ ତାରିଖରେ ପତ୍ନୀ କନକଲତା ଏ ନେଇ ଏତଲା ଦେଇଥିଲେ। ଆଜି ଶବ ମିଳିବା ପରେ ସ୍ୱାମୀଙ୍କୁ ହତ୍ୟା କରାଯାଇଛି ବୋଲି କନକଲତା ଥାନାରେ ଲିଖିତ ଅଭିଯୋଗ କରିଛନ୍ତି। ଘଟଣାର ତଦନ୍ତ କରି ଅଭିଯୁକ୍ତଙ୍କୁ ତୁରନ୍ତ ଗିରଫ କରିବାକୁ ଆଳି ବିଧାୟକ ଦେବେନ୍ଦ୍ର ଶର୍ମା ଦାବି କରିଛନ୍ତି।