ମୟୂରଭଞ୍ଜ: ଅଳଙ୍କାର ଦୋକାନରେ ଲୁଟ୍‌ ଉଦ୍ୟମ, ଦୁର୍ବୃତ୍ତଙ୍କ ଆକ୍ରମଣରେ ଉଭୟ ମାଲିକ ବାପ-ପୁଅ ଗୁରୁତର

ବେତନଟି/ବୈସିଙ୍ଗା: ମୟୂରଭଞ୍ଜରେ ଘଟିଯାଇଛି ଏକ ଅଭାବନୀୟ ଘଟଣା। ଜିଲ୍ଲାର ବୈସିଙ୍ଗାସ୍ଥିତ ମାଣତ୍ରୀ ରାସ୍ତା ପାର୍ଶ୍ୱରେ ଥିବା ମହାରଣା ଅଳଙ୍କାର ଦୋକାନରେ ଶୁକ୍ରବାର ଲୁଟ୍‌ ଉଦ୍ୟମ ହୋଇଛି। ଲୁଟେରାମାନଙ୍କ ଗୁଳି ଚାଳନା ଓ ଏସିଡ୍‌ ମାଡ଼ରେ ଅଳଙ୍କାର ଦୋକାନର ଉଭୟ ମାଲିକ ବାପ-ପୁଅ ଗୁରୁତର ଆହତ ହୋଇଛନ୍ତି। ବାପ ଗୋଡ଼ରେ ଗୁଳି ବାଜି ଥିବା ବେଳେ ପୁଅ ଏସିଡ୍‌ ମାଡ଼ରେ ଗୁୁରୁତର ହୋଇଥିବା ସୂଚନା ରହିଛି। ଆହତମାନଙ୍କୁ ନିକଟସ୍ଥ ହସ୍ପିଟାଲ୍‌କୁ ଚିକିତ୍ସା ପାଇଁ ନିଆଯାଇଛି।

ଲୁଟେରାମାନେ ଲୁଟ୍‌ ଉଦ୍ୟମ କରୁଥିବା ବେଳେ ଖବର ପାଇ ବୈସିଙ୍ଗା ଥାନା ପୁଲିସ୍‌ ଯାଇ ଘଟଣାସ୍ଥଳରେ ପହଞ୍ଚିଥିଲା। ଲୁଟେରାଙ୍କ ଗୁଳି ମାଡ଼ରେ ବୈସିଙ୍ଗା ଥାନା ଆଇଆଇସି ବି ଆହତ ହୋଇଥିବା ସୂଚନା ରହିଛି। ତେବେ ସମୁଦାୟ ୬ ଜଣ ଲୁଟେରା ମିଶି ଲୁଟ୍‌ କରିବାକୁ ଆସିଥିବା ବେଳେ ସ୍ଥାନୀୟ ଲୋକ ଓ ପୁଲିସ୍‌ର ମିଳିତ ଉଦ୍ୟମରେ ୩ ଜଣଙ୍କୁ ଧରାଯାଇ ଅଟକ ରଖାଯାଇଛି ଓ ଆଉ ୩ ଜଣ ଫେରାର୍‌ ଅଛନ୍ତି।