ମୟୁରଭଞ୍ଜ: ସଡ଼କ ଦୁର୍ଘଟଣାରେ ୨ ଭଉଣୀ ସମେତ ୩ ମୃତ

ବାରିପଦା: ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଗୁରୁବାର ଅପରାହ୍ନରେ ୨ ଭଉଣୀ ସମେତ ୩ ଜଣଙ୍କର ମୃତ୍ୟୁ ଘଟିଛି। ମିଳିଥିବା ସୂଚନା ଅନୁସାରେ ମୟୁରଭଞ୍ଜ ଜିଲ୍ଲାର ଗୋପବନ୍ଧୁନଗର ବ୍ଲକ ଅନ୍ତର୍ଗତ ଖରିପଦା ଗାଁରେ ଏଭଳି ଅଭାବନୀୟ ଘଟଣା ଘଟିଛି।

ଗାଁର ଧରି ସିଂହଙ୍କ ପୁଅ ସୋମନାଥ ସିଂହ(୧୬) ଆଜି ଅପରାହ୍ନରେ ଏକ ସ୍କୁଟି(ଓଡି ୦୧ଆର୍‌ ୨୬୧୦)ରେ ବସାଇ ଗୁରୁବାର ସିଂହଙ୍କ ଦୁଇ ଝିଅ ବର୍ଷା ସିଂହ(୧୫) ଓ ପୂଜା ସିଂହ(୧୭)କୁ ନେଇ ବୁଲିବାକୁ କୁଆମରା ଗାଁ ଅଭିମୁଖେ ଯାଉଥିଲେ। କୁଆମରା ଗାଁକୁ ପହଞ୍ଚିବାର ଅଧ କିଲୋମିଟର ପୂର୍ବରୁ ଏକ ପୋଲରେ ବାଡେଇ ହୋଇ ଯିବାରୁ ୩ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି।

ଦୁଇ ଭଉଣୀ ପୂଜା ଓ ବର୍ଷାର ମୃତଦେହ ୫ଫୁଟ ତଳେ ଥିବା ପୋଲ ତଳେ ପଡ଼ିଥିଲା। ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚି ୩ଟି ମୃତଦେହ ଉଦ୍ଧାର କରିଛି। ପୋଷ୍ଟମର୍ଟମ ପାଇଁ ମୃତଦେହଗୁଡ଼ିକ ହସ୍ପିଟାଲ ପଠାଯାଇଛି। ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି।