ଚମତ୍କାର ! ଅସ୍ତ୍ରୋପଚାର ବିନା ଜନ୍ମ ନେଲା ୫.୫କେଜିର ଶିଶୁକନ୍ୟା,

ଜଗତସିଂହପୁର: ମା’ର ଓଜନ ୧୧୪କେଜି, ଆଉ ଛୁୁଆର ଓଜନ ୫.୫କେଜି। ଏତେ ଅଧିକ ଓଜନ ଥିଲେ ସ୍ବାଭାବିକ ପ୍ରସବ ହେବା କଷ୍ଟକର। ହେଲେ ଜଣେ ଯୁବତୀ ଅସ୍ତ୍ରୋପଚାର ବିନା ୫.୫କେଜିର ଶିଶୁକୁ ଜନ୍ମ ଦେଇଛନ୍ତି। ଏହି ଘଟଣାକୁ ଚମତ୍କାର ବୋଲି ଲୋକେ କହିବା ଆରମ୍ଭ କହିଛନ୍ତି।  ଜଗତସିଂହପୁରରେ ଘଟିଛି ଏହି ଆଶ୍ଚର୍ଯ୍ୟଜନକ ଘଟଣା।

ଜଗତସିଂପୁର ଜିଲ୍ଲାର ନୂଆଗାଁ ଅଞ୍ଚଳର ଜଣେ ୧୮ବର୍ଷୀୟ ଯୁବତୀ ଅସ୍ତ୍ରୋପଚାର ବିନା ୫.୫ କିଲୋଗ୍ରାମ ଓଜନର ଏକ ସୁସ୍ଥ ଶିଶୁକନ୍ୟାକୁ ଜନ୍ମ ଦେଇଛନ୍ତି। ଜଗତସିଂପୁର ଜିଲ୍ଲା ମୁଖ୍ୟାଳୟ ଡାକ୍ତରଖାନାରେ ଏହି ପ୍ରସବ କରାଯାଇଛି। ଯୁବତୀଙ୍କ ନାମ ସରସ୍ବତୀ ନାୟକ।

ସୂଚନା ମୁତାବକ, ପ୍ରସବ ଯନ୍ତ୍ରଣା ଅନୁଭବ କରିବାରୁ ପ୍ରଥମେ ତାଙ୍କୁ ନୂଅଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା ଏବଂ ପରେ ଜିଲ୍ଲା ମୁଖ୍ୟାଳୟ ଡାକ୍ତରଖାନାକୁ ପଠାଯାଇଥିଲା। ସ୍ତ୍ରୀ ରୋଗ ବିଶେଷଜ୍ଞ ଡାକ୍ତର ସରୋଜ ଜେନାଙ୍କ ନେତୃତ୍ୱରେ ଏକ ଡାକ୍ତରୀ ଦଳ ଏହି କଷ୍ଟସାଧ୍ୟ ପ୍ରସବକୁ ସଫଳତାର ସହିତ ପରିଚାଳନା କରିଥିଲେ।

୫.୫ କିଲୋଗ୍ରାମ ଓଜନର ଏହି ଶିଶୁକନ୍ୟାଟିର ଜନ୍ମ ଏକ ବିରଳ ଘଟଣା ବୋଲି ବିବେଚନା କରାଯାଉଛି, ବିଶେଷକରି ସି-ସେକ୍ସନ ବିନା। ମା' ଏବଂ ନବଜାତ ଶିଶୁ ଉଭୟ ସୁରକ୍ଷିତ ଏବଂ ସୁସ୍ଥ ଥିବା କୁହାଯାଉଛି। ଡାକ୍ତର ଜେନା ଏହି ସଫଳତା ପାଇଁ ଡାକ୍ତର ଏବଂ ସହାୟକ କର୍ମଚାରୀଙ୍କ କଠିନ ପରିଶ୍ରମକୁ ଶ୍ରେୟ ଦେଇଛନ୍ତି।