ହାତୀ ଆକ୍ରମଣରେ ବୃଦ୍ଧଙ୍କ ମୃତ୍ୟୁ

ରାଜଗାଙ୍ଗପୁର: ସୁନ୍ଦରଗଡ଼ ଜିଲ୍ଳା ରାଜଗାଙ୍ଗପୁର ଥାନା ଅନ୍ତର୍ଗତ ମାଲିଡିହି ପଞ୍ଚାୟତର ଫଲସାଢ଼ିପା ଯତୀନପକଡ଼ାର ବାସିନ୍ଦା ସାହାବାନ ବାରଜୋ(୭୨)ଙ୍କର ହାତୀ ଆକ୍ରମଣରେ ମୃତ୍ୟୁ ହୋଇଛି। ଆଜି ସନ୍ଧ୍ୟା ପ୍ରାୟ ୬ ଘଟିକା ସମୟରେ ସାହାବାନ ଶୌଚ ପାଇଁ ଯାଇଥିବା ସମୟରେ ଦନ୍ତା ହାତୀ ହାବୁଡ଼ରେ ପଡ଼ିଥିଲେ। ଦନ୍ତା ହାତୀଟି ତାଙ୍କ ମୁଣ୍ଡକୁ ଆଘାତ କରିଥିଲା। ଦୀର୍ଘ ସମୟ ପରେ ସାହାବାନ ଘରକୁ ନଫେରିବାରୁ ତାଙ୍କ ପରିବାର ଲୋକେ ଖୋଜି ଥିଲେ। ଖୋଜାଖୋଜି କରିବା ପରେ ରାସ୍ତାକଡ଼ରେ ତାଙ୍କ ମୃତଦେହଟି ପଡ଼ିଥିବା ଦେଖିଲେ। ତାଙ୍କ ମୃତ ଶରୀରକୁ ରାଜଗାଙ୍ଗପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ। ମୃତ ଦେହକୁ ସ୍ୱାସ୍ଥ୍ୟକେନ୍ଦ୍ରରେ ବ୍ୟବଚ୍ଛେଦ ପାଇଁ ରଖାଯାଇଛି। ସୂଚନାଯୋଗ୍ୟ ଯେ କିଛି ଦିନ ପୂର୍ବରୁ ହାତୀ ଆକ୍ରମଣରେ ଜଣଙ୍କ ମୃତ୍ୟୁ ହୋଇଥିଲା। ଜନସାଧାରଣଙ୍କୁ ସୁରକ୍ଷା ଦେବାରେ ବନ ବିଭାଗ ସମ୍ପୂର୍ଣ୍ଣ ବିଫଳ ହେଇଛି। ଯାହା ଦ୍ଵାରା ଏଭଳି ଘଟଣା ବାରମ୍ବାର ଘଟିଚାଲିଛି।