ଟଙ୍କା ପାଇଁ ବାପାଙ୍କୁ ଆକ୍ରମଣ କଲା ପୁଅ

ସମ୍ବଲପୁର: ଟଙ୍କା ପାଇଁ ସବୁ ସମ୍ପର୍କକୁ ବୁଲିଗଲା। ନିଜ ବାପା ଓ ସ୍ତ୍ରୀକୁ ଲୁହା ରଡ୍‌ରେ ଜଣେ ଯୁବକ ଆକ୍ରମଣ କରିବା ଘଟଣା ସମ୍ବଲପୁରରେ ଚର୍ଚ୍ଚାର ବିଷୟ ପାଲଟିଛି। ଘଟଣାଟି ଧନୁପାଲି ଥାନା ଅଞ୍ଚଳର। ବାପାଙ୍କ ଅଭିଯୋଗ ପରେ ଅଭିଯୁକ୍ତ ପୁଅକୁ ପୁଲିସ ଗିରଫ କରିଛି।

ସୂଚନାନୁସାରେ, ଗୁରୁବାର ଭୋର ୫ଟା ସମୟରେ ମଠପାଲିର ବୈଷ୍ଣବ ଜେନାଙ୍କୁ ତାଙ୍କ ବଡ଼ ପୁଅ ରାଜେଶ ଜେନା ଗାଳିଗୁଲଜ କରିବା ସହ ୧୦ ହଜାର ଟଙ୍କା ମାଗିଥିଲା। ଏତେ ଟଙ୍କା ନାହିଁ ବୋଲି ବୈଷ୍ଣବ କହିଥିଲେ ଏବଂ ୩୦୦୦ ଟଙ୍କା ନେବାକୁ କହିଲେ। ଏତିକିରେ ରାଗିଯାଇ ରାଜେଶ ଲୁହା ରଡ୍‌ରେ ତାଙ୍କ ମୁଣ୍ଡକୁ ଆକ୍ରମଣ କରିଥିଲା। ତାଙ୍କ ମୁଣ୍ଡରୁ ପ୍ରବଳ ରକ୍ତ ବାହାରୁଥିବା ବେଳେ ରାଜେଶ ଉକ୍ତ ରଡ୍‌ରେ ତାଙ୍କ ଶରୀରକୁ ପୁଣି ଆକ୍ରମଣ କରିଥିଲା। ଫଳରେ ତାଙ୍କ ହାତ, ଗୋଡ଼, ପିଠିରେ ଗଭୀର ଆଘାତ ଲାଗିଥିଲା। ଟଙ୍କା ନଦେଲେ ଜୀବନରୁ ମାରିଦେବି ବୋଲି ଧମକ ଦେଇଥିଲା। ଏହା ପୂର୍ବରୁ ମଧ୍ୟ ସେ ଟଙ୍କା ପାଇଁ ତାଙ୍କୁ ଏକାଧିକ ଥର ମାଡ଼ ମାରିଥିଲା। ରାଜେଶଙ୍କୁ ତାଙ୍କ ସ୍ତ୍ରୀ ବିରୋଧ କରିବାରୁ, ସେ ତାଙ୍କୁ ମଧ୍ୟ ମାରପିଟ କରିଥିଲା। ଏ ନେଇ ବୈଷ୍ଣବ ଗୁରୁବାର ଧନୁପାଲି ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା। ଅଭିଯୁକ୍ତ ବଡ଼ପୁଅ ରାଜେଶକୁ ଶୁକ୍ରବାର ପୁଲିସ ଗିରଫ କରିଛି।