ଏନଜିଟିଙ୍କ ନିର୍ଦ୍ଦେଶ ପରେ ମଧ୍ୟ କଟାଯାଉଛି ଶିଖରଚଣ୍ଡୀ ପାହାଡ଼, ତୁରନ୍ତ ନିର୍ମାଣ କାର୍ଯ୍ୟ ବନ୍ଦ କରିବାକୁ ତିନି ପଂଚାୟତବାସିନ୍ଦାଙ୍କ ଦାବିପତ୍ର

ଖୋର୍ଦ୍ଧା: ପଟିଆ ନିକଟରେ ଥିବା ଐତିହାସିକ ଶିଖରଚଣ୍ଡୀ ପାହାଡ଼ର ହନୁମାନ ଶିଖରର ଶତାଧିକ ପୁରାତନ ଗଛ କଟାଯିବା ସହ ପାହାଡ଼କୁ ବିସ୍ଫୋରଣ ଦ୍ୱାରା ଭଙ୍ଗାଯାଇଛି । ଏନେଇ ଶିଖରଚଣ୍ଡୀ ଆଂଚଳିକ ସୁରକ୍ଷା ସମିତି ପକ୍ଷରୁ ଏନଜିଟିର ଦ୍ୱାରସ୍ଥ ହୋଇଥିଲେ । ଏନଜିଟି ଆସନ୍ତା ୨୪ ତାରିଖରେ ପ୍ରତ୍ୟକ୍ଷ ଯାଂଚ କରିବାକୁ ନିର୍ଦ୍ଦେଶ ଦେବା ସହ ପରବର୍ତ୍ତୀ ନିର୍ଦ୍ଦେଶ ଯାଏଁ ନିର୍ମାଣକୁ ସ୍ଥଗିତ ରଖିବେ । କିନ୍ତୁ ରାତି ଅଧିଆ ଲୁଚିଛପି କାମ କରାଯାଉଛି ଓ ଏହାକୁ ତୁରନ୍ତ ବନ୍ଦ କରାଯାଉ ବୋଲି ଆଜି ପଟିଆ ଅଂଚଳର ବାସିନ୍ଦାଙ୍କ ସମେତ ଦାରୁଠେଙ୍ଗ ଓ ଚନ୍ଦକା ପଂଚାୟତର ସରପଂଚ ପ୍ରମୁଖ ଜିଲ୍ଲାପାଳଙ୍କୁ ଏକ ଦାବିପତ୍ର ଦେଇଛନ୍ତି । ଦାବିପତ୍ରରେ ଦର୍ଶାଯାଇଛି ଯେ ପଟିଆ ଗଡ଼ର ଅଧିଷ୍ଠାତ୍ରୀ ଦେବୀ ଶିଖରଚଣ୍ଡୀ ଅଟନ୍ତି । ଏହା ପାଇକମାନଙ୍କ ଅନ୍ୟତମ ପୂଜାସ୍ଥଳୀ । ଏହାସହ ହନୁମାନପାହାଡ଼ ଓ ଶିଖରଚଣ୍ଡୀ ପାହାଡ଼ଚନ୍ଦକା-ଡମପଡ଼ା ବନ୍ୟଜନ୍ତୁ ଅଭୟାରଣ୍ୟ ସଂଲଗ୍ନ ଥିବାରୁ ଅନେକ ବିଲୁପ୍ତପ୍ରାୟ ବନ୍ୟଜନ୍ତୁ, ବୃକ୍ଷଲତା ରହିଛି ।

କିନ୍ତୁ ଗତ କିଛି ଦିନ ଧରି ରାଜ୍ୟ ସରକାରଙ୍କ ଜଳ ନିଗମ (ୱାଟ୍କୋ) ଏଠାରେ ୩୦ ନିୟୁତ ଲିଟର ପାଣିଟ୍ୟାଙ୍କ ନିର୍ମାଣ କରିବାକୁ ପାହାଡ଼କୁ ଅବିଚାରିତ ଭାବେ କାଟିବା ଆରମ୍ଭ କରିଛି । ଫଳରେ ଚନ୍ଦକାର ହାତୀମାନେ ପଟିଆ, ଦାରୁଠେଙ୍ଗର ଜନବସତି ଆଡ଼କୁ ଚାଲିଆସୁଛନ୍ତି । ଅନେକ ବୃକ୍ଷଲତା ନଷ୍ଟ ହୋଇଯିବା ଦ୍ୱାରା ଅଭୟାରଣ୍ୟ ପ୍ରତି ବିପଦ ସୃଷ୍ଟି ହୋଇଛି । ଏନେଇ ଚନ୍ଦକା ଓ ଦାରୁଠେଙ୍ଗ ପଂଚାୟତରେ କୌଣସି ଜନଶୁଣାଣୀ ହୋଇନାହିଁ କି ଏନେଇ ପରିବେଶ ମଞ୍ଜୁରୀ ମିଳିନାହିଁ । ଏନେଇ ସେମାନେ ଅନେକ ଥର ଜିଲ୍ଲା ପ୍ରଶାସନ ଓ ଅନ୍ୟ ଅଧିକାରୀଙ୍କୁ ଦୃଷ୍ଟି ଆକର୍ଷଣ କରି ନିର୍ମାଣ ବନ୍ଦ କରିବାକୁ ଅନୁରୋଧ କରିଥିଲେ ।

କେହି ନଶୁଣିବାରୁ ସେମାନେ ଜାତୀୟ ଗ୍ରୀନ୍ ଟ୍ରାଇବୁନାଲର ଦ୍ୱାରସ୍ଥ ହୋଇଥିଲେ । ଚଳିତ ମାସ ୧୨ ତାରିଖରେ ଏନଜିଟି ଏହି ଆବେଦନର ଶୁଣାଣି କରି ନିର୍ମାଣ ଦ୍ୱାରା ଜଙ୍ଗଲ ଓ ବନ୍ୟଜନ୍ତୁଙ୍କ ଉପରେ ବିପଦ ସମ୍ଭାବନା ରହିଛି ବୋଲି ଅନୁଭବ କରିଥିଲେ । ଏଣୁ ମୁଖ୍ୟ ବନ ସଂରକ୍ଷକ, କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସଦସ୍ୟ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସଦସ୍ୟ ଓ ଜିଲ୍ଲାପାଳଙ୍କୁ ନେଇ ଏକ ଚାରି ଜଣିଆ କମିଟି ଘଟଣାସ୍ଥଳ ଯାଂଚ କରି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ପରବର୍ତୀ ଆଦେଶ ଯାଏଁ ସେଠାରେ ନିର୍ମାଣ କାର୍ଯ୍ୟ ବନ୍ଦ ରଖିବାକୁ କହିଛନ୍ତି, କିନ୍ତୁ ନିର୍ମାଣକାରୀ ସଂସ୍ଥା ରାତି ଅଧିଆ ବିସ୍ଫୋରଣ ଘଟାଇ ପାହାଡ଼ ଭାଙ୍ଗୁଛି ଓ ଗଛ କାଟୁଛି ।