ବୟସ ୩୫ ନୁହେଁ, ୪୪ ! ତଥ୍ୟ ବଦଳାଇବା ଚିନ୍ତାରେ ତିଳୋତ୍ତମା

ଏକ ନିର୍ଦ୍ଦିଷ୍ଟ ବୟସ ଅତିକ୍ରମ କଲା ପରେ ଅଭିନେତ୍ରୀମାନଙ୍କୁ ଚଳଚ୍ଚିତ୍ରରେ ଆଉ ଗୁରୁତ୍ବପୂର୍ଣ୍ଣ ଭୂମିକା ମିଳିବ ନାହିଁ ବୋଲି ଭୟ ଥାଏ। ତେଣୁ ଅଭିନେତ୍ରୀମାନେ ସାଧାରଣତଃ ନିଜ ବୟସକୁ କମ୍ କରି ପ୍ରକାଶ କରିଥାନ୍ତି। କିନ୍ତୁ ତିଳୋତ୍ତମା ଶୋମ ନିଜ ଅଭିନୟ ଦକ୍ଷତାକୁ ନେଇ ଏତେ ଆତ୍ମବିଶ୍ବାସୀ ଯେ ସେ ତାଙ୍କ ୱିକିପିଡିଆ ପୃଷ୍ଠାରେ ତାଙ୍କ ବୟସ ଭୁଲ୍‌ବଶତଃ ୩୫ ବର୍ଷ ଥିବା ପ୍ରକାଶ କରିବା ସହ ପ୍ରକୃତ ବୟସ ୪୪ ବର୍ଷକୁ କିପରି ବଦଳାଇବେ ସେ ନେଇ ପ୍ରଶଂସକଙ୍କ ସାହାଯ୍ୟ ଲୋଡ଼ିଛନ୍ତି। ତିଳୋତ୍ତମାଙ୍କ ଅଭିନୟ ଯାତ୍ରା ବେଶ୍‌ ରୋଚକ। ବୟସ ପାଖାପାଖି ୩୦ ବର୍ଷ ହୋଇଥିବା ବେଳେ ସେ ଅଭିନୟ ଯାତ୍ରା ଆରମ୍ଭ କରିଥିଲେ।

ସେତେବେଳେ ଅନେକ ଲୋକ ତାଙ୍କର ଅଭିନେତ୍ରୀ ହେବାର ଉଦ୍ୟମକୁ କୁହୁଡ଼ି ପହଁରିବା ସହିତ ସମାନ ବୋଲି କହୁଥିଲେ। କିନ୍ତୁ ସେ ଏ ଭିତରେ ବିବିଧ ଚରିତ୍ରରେ ଅଭିନୟ କରି ନିଜ ଲାଗି ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି। ବୟସ ବଢ଼ିବା ସହିତ ତାଙ୍କୁ ଅଧିକରୁ ଅଧିକ ଗୁରୁତ୍ବପୂର୍ଣ୍ଣ ଚରିତ୍ରରେ ଅଭିନୟ କରିବାର ସୁଯୋଗ ମିଳିଛି। ନିକଟରେ ମୁକ୍ତିଲାଭ କରିଥିବା ‘ଲଷ୍ଟ ଷ୍ଟୋରିଜ୍ ୨’ ଓ ‘ଦି ନାଇଟ୍‌ ମ୍ୟାନେଜର୍ ୨’ରେ ଚମତ୍କାର ଅଭିନୟ ପ୍ରଦର୍ଶନ କରିଥିବାରୁ ତାଙ୍କ ଉପରେ ଆଜିକାଲି ପ୍ରଶଂସାର ବର୍ଷା ହେଉଛି। ଗୁଗୁଲ୍‌ରେ ତାଙ୍କ ବୟସ ଏବେ ବି ୩୫ ବର୍ଷ ଦେଖାଉଛି। ଏହି ଭୁଲ୍ ସଂଶୋଧନ ପାଇଁ ତିଳୋତ୍ତମାଙ୍କୁ ହୁଏତ ଆଉ କିଛି ଦିନ ଅପେକ୍ଷା କରିବାକୁ ପଡ଼ିବ!