ଆପଣ ଦେଇଥିବା ଶୌଚାଳୟ ନଷ୍ଟ ହୋଇଗଲାଣି; ଅକ୍ଷୟଙ୍କୁ ଏଭଳି କହିଲେ ବୃଦ୍ଧ

ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ବୁଧବାର ସକାଳୁ ସକାଳୁ ବଲିଉଡ ଅଭିନେତା ଅକ୍ଷୟ କୁମାର ମୁମ୍ବାଇରେ ଭୋଟ୍ ଦେଇଥିଲେ । ଭୋଟ ଦେଇ ଆସିବା ପରେ ସେ ଗଣମାଧ୍ୟମକୁ ନିଜ ପ୍ରତିକ୍ରିୟା ଦେଇଥିଲେ | ଏହି ସମୟରେ ତାଙ୍କ ସହ ଏକ ମଜାଦାର ଘଟଣା ଘଟିଥିଲା। ଜଣେ ବୃଦ୍ଧ ବ୍ୟକ୍ତି ତାଙ୍କ ନିକଟକୁ ଯାଇ ଅଭିଯୋଗ କରିଥିଲେ ଯେ ସେ ନିର୍ମାଣ କରିଥିବା ଶୌଚାଳୟ ନଷ୍ଟ ହୋଇଯାଇଛି। ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

ଭାଇରାଲ ହେଉଥିବା ଭିଡିଓରେ ଏହା ଦେଖିବାକୁ ମିଳିଛି ଯେ, ଅକ୍ଷୟ କୁମାର ମତଦାନ କରି ବୁଥରୁ ବାହାରୁଛନ୍ତି | ଏହି ସମୟରେ ଜଣେ ବୃଦ୍ଧ ତାଙ୍କ ନିକଟକୁ ଆସି ଅଭିଯୋଗ କରୁଛନ୍ତି ଯେ, “ସାର୍, ଆପଣ ନିର୍ମାଣ କରିଥିବା ଶୌଚାଳୟଟି ନଷ୍ଟ ହୋଇଯାଇଛି। ତେଣୁ ଆମକୁ ଏକ ନୂଆ ଶୌଚାଳୟ ନିର୍ମାଣ କରି ଦିଅନ୍ତୁ | ମୁଁ ୩-୪ ବର୍ଷ ହେଲାଣି ଏହାର ମରାମତି କରି କାମ ଚଳାଉଛି |" ଏହା ଶୁଣି ଅକ୍ଷୟ ହସି ହସି କହୁଛନ୍ତି, "ଯଦି ତୁମେ ଏହା କରୁଛ, ତେବେ ଠିକ ଅଛି | ମୁଁ ବିଏମସି ସହିତ କଥା ହେବି ଏବଂ ତୁମ ଅଭିଯୋଗର ସମାଧାନ କରିବି |"