ଛାଡ଼ପତ୍ର ଚର୍ଚ୍ଚା ମଧ୍ୟରେ ସ୍ବାମୀଙ୍କ ସହ ଫଟୋ ସେୟାର କଲେ ଐଶ୍ବର୍ଯ୍ୟା

ମୁମ୍ବାଇ: କଳାକାର ଅଭିଷେକ ବଚ୍ଚନ ଏବଂ ଐଶ୍ୱର୍ଯ୍ୟା ରାୟ ବଚ୍ଚନ ବଲିଉଡର ସବୁଠାରୁ ଲୋକପ୍ରିୟ ଯୋଡ଼ି। ହେଲେ ଗତ କିଛି ମାସ ଧରି, ଦମ୍ପତିଙ୍କ ବୈବାହିକ ଜୀବନରେ ଫାଟ ସୃଷ୍ଟି ହୋଇଥିବା ଖବର ଆସୁଥିଲା। କିନ୍ତୁ ଏବେ ଲାଗୁଛି ଯେ ଏହି ଦମ୍ପତିଙ୍କ ମଧ୍ୟରେ ସବୁକିଛି ଠିକ୍ ଅଛି। ବହୁତ ଦିନ ପରେ, ଐଶ୍ୱର୍ଯ୍ୟା ରାୟ ତାଙ୍କ ବିବାହ ବାର୍ଷିକୀରେ ସ୍ୱାମୀ ଅଭିଷେକ ଏବଂ ଝିଅ ଆରାଧ୍ୟାଙ୍କ ସହିତ ଏକ ଫଟୋ ସେୟାର କରିଛନ୍ତି।

ଫଟୋର କ୍ୟାପସନରେ ଐଶ୍ବର୍ଯ୍ୟା କିଛି ଲେଖିନଥିବା ବେଳେ ଏକ ଧଳା ରଙ୍ଗର ହୃଦୟ ଇମୋଜି ଦେଇଛନ୍ତି। ଏହି ଫଟୋ ଭାଇରାଲ ହେବା ପରେ ପ୍ରଶଂସକ ଦୁହିଁଙ୍କୁ ବିବାହ ବାର୍ଷିକୀର ଅଭିନନ୍ଦନ ଦେବା ଆରମ୍ଭ କରିଛନ୍ତି।

ଅଭିଷେକ ବଚ୍ଚନ ଏବଂ ଐଶ୍ୱର୍ଯ୍ୟା ରାୟଙ୍କ ମଧ୍ୟରେ ପ୍ରେମ ଫିଲ୍ମ ଉମରାଓ ଜାନ୍ ସେଟରେ ଆରମ୍ଭ ହୋଇଥିଲା। କିନ୍ତୁ ଏହାର ବହୁତ ପୂର୍ବରୁ ଅଭିଷେକ, ଐଶ୍ୱର୍ଯ୍ୟାଙ୍କ ପ୍ରେମରେ ପଡ଼ିଯାଇଥିଲେ। ଯେତେବେଳେ ଅଭିଷେକ ସ୍ୱିଜରଲ୍ୟାଣ୍ଡରେ ପ୍ରଥମ ଥର ପାଇଁ ଐଶ୍ୱର୍ଯ୍ୟାକୁ ଭେଟିଥିଲେ, ସେତେବେଳେ ଅଭିନେତ୍ରୀ ବବି ଦେଓଲଙ୍କ ସହ ତାଙ୍କର ପ୍ରଥମ ବଲିଉଡ୍ ଫିଲ୍ମ ଔର ପ୍ୟାର ହୋ ଗୟାର ସୁଟିଂ କରୁଥିଲେ। ତା'ପରେ ଉମରାଓ ଜାନ, ଗୁରୁ ଏବଂ ଧୂମ-୨ର ସୁଟିଂ ସମୟରେ, ଏହି ଦମ୍ପତି ପରସ୍ପର ସହିତ ସମୟ ବିତାଇବାର ସୁଯୋଗ ପାଇଲେ ଏବଂ ଦୁହିଁଙ୍କ ସମ୍ପର୍କ ନିବିଡ଼ ହେଲା। 'ଗୁରୁ'ର ପ୍ରିମିୟର ସମୟରେ ଅଭିଷେକ, ଐଶ୍ୱର୍ଯ୍ୟାଙ୍କୁ ବିବାହ ପାଇଁ ପ୍ରସ୍ତାବ ଦେବା ପରେ  ସେ ହଁ କହିଥିଲେ। ଏହା ପରେ ୨୦ ଏପ୍ରିଲ୍ ୨୦୦୭ରେ, ଏହି ଦମ୍ପତି ବିବାହ କରିଥିଲେ।