ମୁଁ ମୋ ମର୍ଯ୍ୟାଦା ଭୁଲିଗଲି, କ୍ଷମା କରିଦିଅନ୍ତୁ: ଅନୁରାଗ କଶ୍ୟପ

ମୁମ୍ବାଇ: ଚଳଚ୍ଚିତ୍ର ନିର୍ମାତା-ଅଭିନେତା ଅନୁରାଗ କଶ୍ୟପ ଏବେ ବିବାଦରେ ଅଛନ୍ତି। ନିକଟରେ ସେ ବ୍ରାହ୍ମଣ ସମ୍ପ୍ରଦାୟ ବିଷୟରେ କିଛି ମନ୍ତବ୍ୟ ଦେଇଥିଲେ, ଯାହା ପରେ ତାଙ୍କୁ ସମାଲୋଚନାର ଶିକାର ହେବାକୁ ପଡିଥିଲା। ଏବେ ଅନୁରାଗ କଶ୍ୟପ କ୍ଷମା ମାଗିଛନ୍ତି। ସେ ସୋସିଆଲ ମିଡିଆରେ ଏକ ଲମ୍ବା ପୋଷ୍ଟ ଲେଖି କ୍ଷମା ମାଗିଥିବା ଦେଖାଯାଇଛି।

ଅନୁରାଗ କଶ୍ୟପ ଲେଖିଛନ୍ତି, 'କ୍ରୋଧରେ କାହାକୁ ଉତ୍ତର ଦେବା ସମୟରେ ମୁଁ ମୋର ମର୍ଯ୍ୟାଦା ଭୁଲିଗଲି ଏବଂ ସମଗ୍ର ବ୍ରାହ୍ମଣ ସମାଜକୁ ଅପମାନିତ କଲି। ସେହି ସମାଜ, ଯେଉଁ ସମାଜର ଅନେକ ଲୋକ ମୋ ଜୀବନ ସହ ଜଡ଼ିତ ଅଛନ୍ତି। ଆଜି ସେମାନେ ସମସ୍ତେ ମୋ ଦ୍ୱାରା ଆଘାତ ପାଇଛନ୍ତି। ମୁଁ ଯେଉଁଭଳି ଭାବରେ କ୍ରୋଧରେ ସେ ସବୁ କହିଥିଲି, ତାହା ଦ୍ୱାରା ମୁଁ ସମ୍ମାନ କରୁଥିବା ଅନେକ ବୁଦ୍ଧିଜୀବୀ ଆଘାତ ପାଇଛନ୍ତି।

ଅନୁରାଗ ଆହୁରି ଲେଖିଛନ୍ତି, 'ମୁଁ ହୃଦୟର ଗଭୀରତାରୁ କ୍ଷମା ପ୍ରାର୍ଥନା କରୁଛି। ମୁଁ ବ୍ରାହ୍ମଣ ସମାଜକୁ ଏହା କହିବାକୁ ଚାହୁଁ ନଥିଲି। କିନ୍ତୁ କାହାର ଖରାପ ମନ୍ତବ୍ୟର ଜବାବ ଦେବା ସମୟରେ କ୍ରୋଧରେ ମୁଁ ଏହା ଲେଖିଥିଲି। ଏଥିପାଇଁ ମୁଁ ଦୁଃଖିତ। ମୋର ସମସ୍ତ ସହକର୍ମୀ ବନ୍ଧୁଙ୍କଠାରୁ, ମୋ ପରିବାରଠାରୁ ଏବଂ ବ୍ରାହ୍ମଣ ସମ୍ପ୍ରଦାୟଠାରୁ ମୋର ମନ୍ତବ୍ୟ ଏବଂ ଅପମାନଜନକ ଭାଷା ବ୍ୟବହାର ପାଇଁ କ୍ଷମା ମାଗୁଛି। ଏହା ଯେମିତି ଆଗକୁ ନ ଘଟେ ସେଥିପ୍ରତି ମୁଁ ଧ୍ୟାନ ଦେବି। ମୁଁ ମୋର କ୍ରୋଧ ଉପରେ କାମ କରିବି। ଯଦି ମୋତେ କୌଣସି ସମସ୍ୟା ବିଷୟରେ କହିବାକୁ ପଡ଼େ, ମୁଁ ସଠିକ୍ ଶବ୍ଦ ବ୍ୟବହାର କରିବି। ମୁଁ ଆଶା କରୁଛି ଆପଣମାନେ ମୋତେ କ୍ଷମା କରିବେ।'

ଉଲ୍ଲେଖଯୋଗ୍ୟ, ନିକଟରେ 'ଫୁଲେ' ନାମକ ଏକ ଚଳଚ୍ଚିତ୍ର ମୁକ୍ତିଲାଭ କରିବାର ଥିଲା। କିନ୍ତୁ ଏହି ଫିଲ୍ମଟି ଜାତିଭେଦକୁ ପ୍ରୋତ୍ସାହିତ କରୁଥିବାରୁ ମୁକ୍ତିଲାଭ କରିପାରିଲା ନାହିଁ। ପ୍ରତୀକ ଗାନ୍ଧୀ ଏବଂ ପତ୍ରଲେଖା ଅଭିନୀତ ଏହି ସିନେମାଟିର ବିଷୟବସ୍ତୁ ଉପରେ ବ୍ରାହ୍ମଣମାନେ ଆପତ୍ତି କରି ଏହା ଜାତିଭେଦକୁ ପ୍ରୋତ୍ସାହିତ କରୁଥିବା ଦାବି କରିଥିଲେ।

ଏହା ପରେ, ଅନୁରାଗ କଶ୍ୟପ ସେନ୍ସର ବୋର୍ଡ ଏବଂ ବ୍ରାହ୍ମଣ ସମ୍ପ୍ରଦାୟ ସମ୍ପର୍କରେ ସୋସିଆଲ ମିଡିଆରେ ଅନେକ ଆପତ୍ତିଜନକ ମନ୍ତବ୍ୟ ଦେଇଥିଲେ। ସେ ଲେଖିଥିଲେ, " 'ଧଡକ-୨'ର ପ୍ରଦର୍ଶନ ସମୟରେ ସେନ୍ସର ବୋର୍ଡ କହିଥିଲେ ଯେ, ମୋଦିଜୀ ଭାରତରୁ ଜାତିଭେଦକୁ ସମାପ୍ତ କରିଦେଇଛନ୍ତି। ସେଥିପାଇଁ ସନ୍ତୋଷ ମଧ୍ୟ ଭାରତରେ ମୁକ୍ତିଲାଭ କରିନଥିଲା। ଏବେ ବ୍ରାହ୍ମଣଙ୍କର ଫିଲ୍ମ 'ଫୁଲେ'କୁ ନେଇ ସମସ୍ୟା ଅଛି। ଯଦି ଜାତିଭେଦ ନାହିଁ, ତେବେ ବ୍ରାହ୍ମଣ କିଏ? ତୁମେ କାହିଁକି ଏତେ କ୍ରୋଧରେ ଜଳୁଛ?"