ଜିମ୍ ନଯାଇ ୨୬ କିଲୋଗ୍ରାମ ଓଜନ ହ୍ରାସ କଲେ ବୋନି କପୁର

ମୁମ୍ବାଇ: ଜିମ୍ ନଯାଇ ୨୬ କିଲୋଗ୍ରାମ ଓଜନ ହ୍ରାସ କରିଛନ୍ତି ବଲିଉଡ ପ୍ରଯୋଜକ ବୋନି କପୁର। ତାଙ୍କର ପରିବର୍ତ୍ତନ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ବ୍ଲକବଷ୍ଟର ଫିଲ୍ମ ତିଆରି କରି ପ୍ରଯୋଜକ ଏବଂ ଅଭିନେତା ଭାବରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଏହି ଚଳଚ୍ଚିତ୍ର ନିର୍ମାତା କେବଳ ତାଙ୍କ କାମ ପାଇଁ ନୁହେଁ ବରଂ ତାଙ୍କର ନୂତନ ଫିଟନେସ ପାଇଁ ସମସ୍ତଙ୍କ ଦୃଷ୍ଟି ଆକର୍ଷଣ କରୁଛନ୍ତି। କାଜୁଆଲ୍ ଏବଂ ସେମି-ଫର୍ମାଲ୍ ପୋଷାକରେ ସ୍ଲିମ୍ ଦେଖାଯାଉଥିବା ବୋନି କପୁରଙ୍କ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅନେକ ପ୍ରଶଂସକ ତାଙ୍କ ଆକର୍ଷଣୀୟ ଲୁକକୁ ପ୍ରଶଂସା କରୁଥିବା ବେଳେ କେତେକ ଭାବୁଛନ୍ତି ଯେ ଏହି ବଡ଼ ପରିବର୍ତ୍ତନ ପଛରେ କ'ଣ କାରଣ ରହିଛି।

ରିପୋର୍ଟ ଅନୁସାରେ, ବୋନିଙ୍କ ଓଜନ ହ୍ରାସର ରହସ୍ୟ ତାଙ୍କର ଶୃଙ୍ଖଳିତ ଜୀବନଶୈଳୀରେ ରହିଛି। ସେ ରାତ୍ରୀଭୋଜନ ଛାଡି କେବଳ ସୁପ୍ ପିଅନ୍ତି। ତାଙ୍କର ସକାଳର ଜଳଖିଆ କେବଳ ଫଳରସ ଓ ଜୁଆର ରୁଟି ଯାଏ ସୀମିତ। ସେ କୌଣସି ବ୍ୟାୟାମ ରୁଟିନ୍ ଉପରେ ନିର୍ଭରଶୀଳ ନୁହଁନ୍ତି, ବରଂ କେବଳ ତାଙ୍କର ଦୃଢ଼ ଇଚ୍ଛାଶକ୍ତି ଏବଂ ଖାଦ୍ୟ ନିୟନ୍ତ୍ରଣ ଉପରେ ଧ୍ୟାନ ଦେଇଥାନ୍ତି।

ନିଜ ଜୀବନଶୈଳୀ ପରିବର୍ତ୍ତନ ପଛରେ ଥିବା ପ୍ରେରଣା ବିଷୟରେ କହିବାକୁ ଯାଇ ବୋନି କହିଛନ୍ତି, ‘‘ମୁଁ ମୋ ସ୍ୱର୍ଗତ ପତ୍ନୀଙ୍କ ପରାମର୍ଶ ମନେ ରଖିଥିଲି। ସେ ସବୁବେଳେ ଚାହୁଁଥିଲେ ଯେ ମୁଁ ଓଜନ ହ୍ରାସ କରିବି, ତେଣୁ ମୁଁ ଡାଏଟିଂ ଆରମ୍ଭ କଲି ଏବଂ ପ୍ରାୟ ୧୪ କିଲୋଗ୍ରାମ ହ୍ରାସ କଲି। ମୋ ପାଇଁ ବ୍ୟାୟାମ କରିବା କଷ୍ଟକର ଥିଲା, କିନ୍ତୁ ତଥାପି ମୁଁ ଓଜନ ହ୍ରାସ କରିପାରିଲି।’’