ବିବାହ ବନ୍ଧନରେ ବାନ୍ଧି ହେଲେ ହୀନା-ରକି

ମୁମ୍ବାଇ: ବିବାହ ବନ୍ଧନରେ ବାନ୍ଧି ହେଲେ ସ୍ତନ କର୍କଟ ରୋଗ ସହିତ ଲଢ଼ୁଥିବା ଟେଲି ଅଭିନେତ୍ରୀ ହୀନା ଖାନ। ସେ ତାଙ୍କର ଦୀର୍ଘକାଳୀନ ପ୍ରେମିକ ରକି ଜୟସୱାଲଙ୍କୁ ବିବାହ କରିଛନ୍ତି। ଅଭିନେତ୍ରୀଜଣକ ସୋସିଆଲ ମିଡିଆରେ ତାଙ୍କ ବିବାହର କିଛି ସୁନ୍ଦର ଫଟୋ ସେୟାର କରି ଏହା ବିଷୟରେ ସୂଚନା ଦେଇଛନ୍ତି।

ହୀନା ଖାନ ଜଣେ ମୁସଲିମ ଏବଂ ରକି ଜୟସୱାଲ ଜଣେ ହିନ୍ଦୁ। ଯେହେତୁ ସେମାନେ ଭିନ୍ନ ଧର୍ମର, ତେଣୁ ହୀନା ଏବଂ ରକି କୋର୍ଟ ମ୍ୟାରେଜ୍ କରିଥିବା ଜଣାଯାଇଛି। ବିବାହ ବିଷୟରେ ଜଣାଇବାକୁ ଯାଇ ହୀନା ଖାନ ଇନଷ୍ଟାଗ୍ରାମରେ ତାଙ୍କ ବିବାହ ଫଟୋ ସେୟାର କରିଛନ୍ତି ଯେଉଁଥିରେ ସେ ସ୍ୱାମୀ ରକି ଜୟସୱାଲଙ୍କ ସହିତ ରୋମାଣ୍ଟିକ ପୋଜ୍ ଦେଉଥିବାର ନଜର ଆସିଛନ୍ତି।

ଏହି ଫଟୋଗୁଡ଼ିକୁ ସେୟାର କରି ହୀନା ଖାନ କ୍ୟାପସନରେ ଲେଖିଛନ୍ତି- 'ଦୁଇଟି ଭିନ୍ନ ଦୁନିଆରୁ, ଆମେ ପ୍ରେମର ଏକ ଦୁନିଆ ସୃଷ୍ଟି କଲୁ। ଆମର ଭିନ୍ନତା ଦୂର ହେଲା, ଆମର ହୃଦୟ ଏକ ହେଲା, ଏକ ଏଭଳି ବନ୍ଧନ ସୃଷ୍ଟି ହେଲା ଯାହା ସାରାଜୀବନ ରହିବ।  ଆଜି, ଆମର ମିଳନ ସବୁଦିନ ପାଇଁ ପ୍ରେମ ଏବଂ ଆଇନରେ ମୁଦ୍ରିତ। ସ୍ବାମୀ-ସ୍ତ୍ରୀ ଭାବରେ ଆମେ ଆପଣଙ୍କ ଆଶୀର୍ବାଦ ଏବଂ ଅଭିନନ୍ଦନ ଚାହୁଁଛୁ।'