ପଞ୍ଚସଖା ପିକଚର୍ସର ଶେଷ ଦୀପ ଲିଭିଗଲା ! ବର୍ଷୀୟାନ୍ ପ୍ରଯୋଜକ ଶ୍ରୀନିବାସ ରାଉତରାୟଙ୍କ ପରଲୋକ

ଭୁବନେଶ୍ବର : ଓଡ଼ିଆ ଚଳଚ୍ଚିତ୍ରର ଅନ୍ୟତମ ଆଦ୍ୟରୂପକାର, ବର୍ଷୀୟାନ୍ ପ୍ରଯୋଜକ ଓ ଅଭିନେତା ଶ୍ରୀନିବାସ ରାଉତରାୟଙ୍କର ପରଲୋକ ହୋଇଛି । ଷାଠିଏ ଦଶକର ପ୍ରସିଦ୍ଧ ପ୍ରଯୋଜନା ସଂସ୍ଥା ପଞ୍ଚସଖା ପିକଚର୍ସର ପ୍ରଥମ ସଖା ଭାବେ ପରିଚିତ ଥିଲେ ଦିବଂଗତ ଶ୍ରୀନିବାସ। ଚାରି ସଖା ଧୀର ବିଶ୍ୱାଳ, ରାମକୃଷ୍ଣ ତ୍ରିପାଠୀ, କୈଳାଶ ଚନ୍ଦ୍ର କରଣ ଓ ଦିନମଣି ଖୁଣ୍ଟିଆଙ୍କ ପରେ ‌ଶେଷରେ ଆଖି ବୁଜିଛନ୍ତି ପ୍ରଥମ ସଖା ଶ୍ରୀନିବାସ । ତାଙ୍କ ବିୟୋଗରେ ପଞ୍ଚସଖା ପିକଚର୍ସର ଶେଷ ଦୀପ ଲିଭିଯାଇଛି।

‘ନୂଆବୋଉ’, ‘ମାଣିକଯୋଡ଼ି’, ‘ନବଜନ୍ମ’, ‘କିଏ କାହାର’ ଭଳି କ୍ଲାସିକ ଓଡ଼ିଆ ଛବି ନିର୍ମାଣ କରିଥିବା ଏହି ପଞ୍ଚସଖା ପିକଚର୍ସ ସହ ସେ ସମ୍ପୃକ୍ତ ଥିଲେ । କଳାପ୍ରାଣ ଶ୍ରୀନିବାସଙ୍କର ଅଭିନୟ ପ୍ରତି ଥିଲା ଅତୁଟ ଆକର୍ଷଣ। ‘ମାଣିକଯୋଡ଼ି’ ଛବିରେ ଏକ ଗୀତିଦୃଶ୍ୟରେ ସେ ଅଭିନୟ ବି କରିଥିଲେ। ଏଥିସହ ଦେବାଶିଷ ପିକଚର୍ସ ନାମକ ପ୍ରଯୋଜନା ସଂସ୍ଥା ଗଢି ‘ଜୀବନ ସାଥୀ’ ଚଳଚ୍ଚିତ୍ର ନିର୍ମାଣ କରିଥିଲେ ସେ। ‘ଜୀବନ ସାଥୀ’ ରାଷ୍ଟ୍ରପତି ପୁରସ୍କାର ଲାଭ କରିଥିଲା ଏବଂ ଏଥିରେ ସେ ପାଣୁଆ ଚରିତ୍ରରେ ଅଭିନୟ କରିଥିଲେ। ‘ଜୀବନ ସାଥୀ’ର ଅଧିକାଂଶ ସୁଟିଂ ହୋଇଥିଲା ସିମଲାରେ। ବହିର୍ଦୃଶ୍ୟ ପାଇଁ ଏତେ ଦୂର ଯିବା ଓଡ଼ିଆ ଚଳଚ୍ଚିତ୍ର କ୍ଷେତ୍ରରେ ତାହା ଥିଲା ପ୍ରଥମ।