ଅର୍ଜୁନଙ୍କ ସହ ବ୍ରେକ୍‌ଅପ ପରେ ସାଙ୍ଗାକାରାଙ୍କ ସହ ନଜର ଆସିଲେ ମଲାଇକା

ନୂଆଦିଲ୍ଲୀ: ରବିବାର (୩୧ ମାର୍ଚ୍ଚ) ଗୌହାଟୀରେ ପାଞ୍ଚ ଥର ଚାମ୍ପିଅନ୍ ଚେନ୍ନାଇ ସୁପର କିଙ୍ଗସକୁ ପରାସ୍ତ କରି ରାଜସ୍ଥାନ ରୟାଲ୍ସ(ଆରଆର) ଦଳ ଆଇପିଏଲ ୨୦୨୫ରେ ପ୍ରଥମ ବିଜୟ ହାସଲ କରିଥିଲା। ଆରଆର ଏପରି ଏକ ଦଳ ଭାବରେ ଜଣାଶୁଣା ଯିଏ ସର୍ବଦା ନିଜ କ୍ଷମତାଠାରୁ ଅଧିକ ଭଲ ପ୍ରଦର୍ଶନ କରନ୍ତି। ଏହି ମ୍ୟାଚ୍‌ରେ କ୍ରିକେଟରଙ୍କ ପ୍ରଦର୍ଶନ ସହ ଆଉ ଜଣଙ୍କୁ ନେଇ ଚର୍ଚ୍ଚା ହୋଇଥିଲା। ସେ ଥିଲେ ବଲିଉଡ ଅଭିନେତ୍ରୀ ମଲାଇକା ଆରୋରା।

ଚେନ୍ନାଇ ସୁପର କିଙ୍ଗ୍ସ ବିପକ୍ଷ ମ୍ୟାଚ୍ ଦେଖିବା ପାଇଁ ବଲିଉଡ୍ ଅଭିନେତ୍ରୀ ମଲାଇକା ଆରୋରା ଗୌହାଟୀରେ ଆରଆର ଜର୍ସି ପିନ୍ଧି ପହଞ୍ଚିଥିଲେ। ଷ୍ଟାଡିୟମରେ ସେ ଆରଆରର ନିର୍ଦ୍ଦେଶକ କୁମାର ସାଙ୍ଗାକାରାଙ୍କ ସହିତ ବସି ମ୍ୟାଚ୍ ଦେଖୁଥିବା ଦେଖାଯାଇଥିଲା। ତାଙ୍କୁ ସାଙ୍ଗାକାରାଙ୍କ ସହିତ ଦେଖି ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ। ଏବେ ଦୁହିଁଙ୍କ ଫଟୋ ଦେଖି ଦୁହେଁ ପରସ୍ପରକୁ ଡେଟ୍ କରୁଥିବା ନେଇ ଲୋକେ ଚର୍ଚ୍ଚା କରୁଛନ୍ତି। ସୋସିଆଲ ମିଡିଆରେ ଫଟୋ ଭାଇରାଲ ହେବା ପରେ ଅର୍ଜୁନ କପୁରଙ୍କ ପରେ ମଲାଇକା ଏବେ ସାଙ୍ଗାକାରାଙ୍କ ପ୍ରେମରେ ପଡ଼ିଛନ୍ତି ବୋଲି କୁହାଯାଉଛି।