ମାଧୁରୀ ଦୀକ୍ଷିତଙ୍କ ଉପରେ ଅପମାନଜନକ ଶବ୍ଦ ବ୍ୟବହାର କରିଥିବାରୁ ନେଟ୍‌ଫ୍ଲିକ୍ସକୁ ମିଳିଲା ଆଇନଗତ ନୋଟିସ୍‌

ନୂଆଦିଲ୍ଳୀ: ଆମେରିକୀୟ ସୋ’ 'ଦ ବିଗ୍ ବ୍ୟାଙ୍ଗ୍‌ ଥିଓରି'ର ଏକ ଏପିସୋଡର ବିଷୟବସ୍ତୁକୁ ନେଇ ଭିଡିଓ ଷ୍ଟ୍ରିମିଂ ପ୍ଲାଟଫର୍ମ ନେଟଫ୍ଲିକ୍ସ ବିରୋଧରେ ଜଣେ ରାଜନୈତିକ ବିଶ୍ଳେଷକ ମକଦ୍ଦମା ଦାୟର କରିଛନ୍ତି। ନ୍ୟୁଜ୍ ଏଜେନ୍ସି ପିଟିଆଇର ରିପୋର୍ଟ ଅନୁଯାୟୀ ବଲିଉଡ ଅଭିନେତ୍ରୀ ମାଧୁରୀ ଦୀକ୍ଷିତଙ୍କ ସଂପର୍କରେ ଅପମାନଜନକ ଶବ୍ଦ ବ୍ୟବହାର କରିଥିବା ଦାବି କରି ସେ ଏହି ମକଦ୍ଦମା ଦାୟର କରିଛନ୍ତି।

ସେ ପଠାଇଥିବା ଆଇନଗତ ନୋଟିସରେ ରାଜନୈତିକ ବିଶ୍ଳେଷକ ମିଥୁନ ବିଜୟ କୁମାର କହିଛନ୍ତି କି ସିଜିନ୍‌-୨ର ଏପିସୋଡ୍‌-୧ରେ ବଲିଉଡ୍‌ ଅଭିନେତ୍ରୀ ମାଧୁରୀଙ୍କୁ ଜଣେ କୁଷ୍ଠରୋଗୀ ବେଶ୍ୟାଙ୍କ ସହ ତୁଳନା କରାଯାଇଛି।

ମିଥୁନ ଆହୁରି ବି କହିଛନ୍ତି ଯେ ମାଧୁରୀଙ୍କ ଚରିତ୍ରକୁ ଅସମ୍ମାନ ଏବଂ ବଦନାମ କରିବା ପରି ଚିତ୍ରଣ କରାଯାଇଛି। ମହିଳାଙ୍କ ଉପରେ ଭେଦଭାବକୁ ପ୍ରୋତ୍ସାହିତ କରିଥିବାରୁ ସେ ନେଟଫ୍ଲିକ୍ସକୁ ଏପିସୋଡ ହଟାଇବାକୁ କହିବା ସହ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେବାକୁ ଚେତାବନୀ ଦେଇଛନ୍ତି।

ନ୍ୟୁଜ୍ ଏଜେନ୍ସି ଅନୁଯାୟୀ ମୁମ୍ବାଇର ନେଟଫ୍ଲିକ୍ସ କାର୍ଯ୍ୟାଳୟକୁ ଏହି ବିଜ୍ଞପ୍ତି ପଠାଇଛନ୍ତି ମିଥୁନ ବିଜୟ କୁମାର। ସେ ନିଜକୁ ମାଧୁରୀଙ୍କର ପିଲାଦିନର ଜଣେ ବଡ଼ ପ୍ରଶଂସକ ବୋଲି ଦାବି କରି ଏହା ତାଙ୍କୁ ଗଭୀର ଆଘାତ ଦେଇଛି ବୋଲି କହିଛନ୍ତି। ମହିଳାଙ୍କ ମଧ୍ୟରେ ଭେଦଭାବ ଆଦୌ ଗ୍ରହଣୀୟ ନୁହେଁ ବୋଲି ସେ ମତ ଦେଇଛନ୍ତି।