ବେଲଜିୟମରେ ପ୍ରଥମ ଥର ପାଇଁ ଓଡ଼ିଆ ଚଳଚ୍ଚିତ୍ର ପ୍ରଦର୍ଶନୀ

କୋରାପୁଟ: ଓଡ଼ିଆ ସାଂସ୍କୃତିକ ସଂଘ ବେଲଜିୟମ (ଓସିଏବି), ପୁରସ୍କାରପ୍ରାପ୍ତ ଚଳଚ୍ଚିତ୍ର ପ୍ରଯୋଜକ ଆତିଶ କୁମାର ରାଉତ ଏବଂ ଆନ୍ତର୍ଜାତୀୟ ସ୍ତରରେ ପ୍ରଶଂସିତ ଚଳଚ୍ଚିତ୍ର ନିର୍ମାତା ବିଶ୍ୱନାଥ ରଥଙ୍କ ସହଯୋଗରେ, ବେଲଜିୟମର ରାଜଧାନୀ ବ୍ରସେଲ୍ସରେ ଓଡ଼ିଆ ସାମାଜିକ ହାସ୍ୟରସ-ଚଳଚ୍ଚିତ୍ର ‘ଚାରିକାନ୍ଧ’ର ଏକ ସ୍ୱତନ୍ତ୍ର ପ୍ରଦର୍ଶନୀ ଆୟୋଜନ କରିଥିଲା। ବ୍ରସଲ୍ସେରେ ଏହା ପ୍ରଥମ ଓଡିଆ ଚଳଚ୍ଚିତ୍ରର ପ୍ରଦର୍ଶନ। କୋରାପୁଟ ଜିଲ୍ଲାର ବିଶ୍ବନାଥଙ୍କ ଚଳଚ୍ଚିତ୍ର ଏଭଳି ପ୍ରଦର୍ଶିତ ହେବା ନିଶ୍ଚିତ ରୁପେ ଜିଲ୍ଲାପାଇଁ ଗର୍ବ ଓ ଗୌରବର ବିଷୟ। 

ବେଲଜିୟମରେ ପ୍ରଥମ ଥର ପାଇଁ ଏକ ଓଡ଼ିଆ ଚଳଚ୍ଚିତ୍ର ପ୍ରଦର୍ଶନୀ ଓଡ଼ିଆ ସିନେମା ପାଇଁ ଐତିହାସିକ ଗୁରୁତ୍ୱ ବହନ କରେ। ଏହି ପ୍ରଦର୍ଶନୀ ଓସିଏବି ଦ୍ୱାରା ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟ, କଳା ଏବଂ ପରମ୍ପରାକୁ ସମ୍ମାନ ଏବଂ ପ୍ରଚାର କରିବା ପାଇଁ ଆୟୋଜିତ ଏକ ବାର୍ଷିକ କାର୍ଯ୍ୟକ୍ରମ। ଉତ୍କଳ ଦିବସ ୨୦୨୫ ପାଳନର ଏକ ଅଂଶ ବୋଲି ଶ୍ରୀ ରଥ କହିଛନ୍ତି। 

‘ଚାରିକାନ୍ଧ’ ଏକ ମଧ୍ୟମ-ଲମ୍ବ ଚଳଚ୍ଚିତ୍ର, ଯାହା ଏକ ଲମ୍ବା କ୍ଷୁଦ୍ର ଚଳଚ୍ଚିତ୍ର ଭାବରେ ମଧ୍ୟ ଜଣାଶୁଣା, ବିଶ୍ୱନାଥ ରଥଙ୍କ ଦ୍ୱାରା ଲିଖିତ ଏବଂ ନିର୍ଦ୍ଦେଶିତ ଏବଂ ଆତିଶ କୁମାର ରାଉତଙ୍କ ଦ୍ୱାରା ତାଙ୍କ ବ୍ୟାନର, ଋତୁପ୍ରିୟା ପ୍ରଡକ୍ସନ୍ ଅଧୀନରେ ନିର୍ମିତ। ସୁପ୍ରିୟା ରାଉତ ଏବଂ ଅଖିଳ ରାଜୁରକରଙ୍କ ସହ-ପ୍ରଯୋଜିତ ଏହି ଚଳଚ୍ଚିତ୍ରରେ ଶକ୍ତି ବରାଳ, ସୁସିଲ ମିଶ୍ର, ଶତାବ୍ଦୀ ସୂର୍ଯ୍ୟସ୍ନାତା, ଗୌରବ ମହାନ୍ତି, ଶିବାନୀ ଖରା, ଏବଂ ପ୍ରଭଞ୍ଜନ ମିଶ୍ର ପ୍ରମୁଖ ଅଭିନେତା ଅଭିନୟ କରିଛନ୍ତି। ଏଥିରେ ସହ ସହାୟକ କଳାକାର ରିଦ୍ଧି, ସଂସ୍କୃତି, ସୁରୁଚିକା, ନମିତା, ନିତ୍ୟାନନ୍ଦ, ରାଜ, ସୌମ୍ୟରଞ୍ଜନ, ରାଜେନ୍ଦ୍ର, ଏବଂ ସୌମ୍ୟ ଷଡଙ୍ଗୀ। ଆମେ ବିଭିନ୍ନ ପ୍ଲାଟଫର୍ମ ଏବଂ ପ୍ରତିଷ୍ଠିତ ଚଳଚ୍ଚିତ୍ର ମହୋତ୍ସବରେ 'ଚାରିକାନ୍ଧ'କୁ ପ୍ରଦର୍ଶନ କରି ଏହାକୁ ବିଶ୍ୱବ୍ୟାପୀ ଦର୍ଶକଙ୍କ ନିକଟରେ ପହଞ୍ଚାଇବାକୁ ଲକ୍ଷ୍ୟ ରଖିଛୁ ବୋଲି କହିଛନ୍ତି ପୁରସ୍କାର ବିଜେତା ଲେଖକ-ନିର୍ଦ୍ଦେଶକ ବିଶ୍ୱନାଥ।  

Ollywood