ସ୍ବାମୀଙ୍କୁ ଜେଲ୍‌ ପଠାଇ ରୋଜା ରଖିଲେ ରାଖୀ

ସ୍ବାମୀଙ୍କୁ ଜେଲ୍‌ ପଠାଇବା ପରେ ରୋଜା ରଖିଛନ୍ତି ଚର୍ଚ୍ଚିତ ଅଭିନେତ୍ରୀ ତଥା ବଲିଉଡ୍‌ର ଡ୍ରାମା ରାଣୀ ରାଖୀ ସାୱନ୍ତ। ଅନେକ ସମୟରେ ସେ ଗଣମାଧ୍ୟମରେ କିଛି କିଛି ନା କିଛି କହିବାକୁ ପସନ୍ଦ କରନ୍ତି। ସେଥିପାଇଁ ଲୋକମାନେ ତାଙ୍କୁ ଡ୍ରାମା ରାଣୀ ବୋଲି ଡାକନ୍ତି। ବର୍ତ୍ତମାନ ରାଖୀ ସାୱନ୍ତ ପୁଣି ଥରେ ଲାଇମଲାଇଟକୁ ଆସିଛନ୍ତି। ପବିତ୍ର ରମଜାନ ମାସରେ ଉପବାସ ଥିବାରୁ ସେ ଏଥର ଚର୍ଚ୍ଚାକୁ ଆସିଛନ୍ତି। ଶନିବାର ସନ୍ଧ୍ୟାରେ ମୁମ୍ବାଇରେ ରାଖୀ ସାୱନ୍ତଙ୍କୁ ଦେଖିବାକୁ ମିଳିଥିଲା। ଏହି ସମୟରେ ସେ ପାପାରାଜିଙ୍କୁ ଭେଟିଥିଲେ ଏବଂ କହିଥିଲେ ଯେ କର୍କଟ ରୋଗୀଙ୍କ ପାଇଁ ଏକ ଡାକ୍ତରଖାନା ଖୋଲିବା ପାଇଁ ସେ ରୋଜା ରଖିଛନ୍ତି।

ସେଲିବ୍ରିଟି ଫଟୋଗ୍ରାଫର ବିରଲ ଭାୟାନୀ ତାଙ୍କ ଅଫିସିଆଲ ଇନଷ୍ଟାଗ୍ରାମ ଆକାଉଣ୍ଟରେ ରାଖୀ ସାୱନ୍ତଙ୍କ ଏକ ଭିଡିଓ ସେୟାର କରିଛନ୍ତି। ଭିଡିଓରେ ଅଭିନେତ୍ରୀ ବୁର୍ଖା ପିନ୍ଧିଥିବା ନଜରକୁ ଆସିଛନ୍ତି। ଭିଡିଓରେ ରାଖୀ ସାୱନ୍ତ ତାଙ୍କ ଉପବାସ ବିଷୟରେ କଥାବାର୍ତ୍ତା କରି କହିଛନ୍ତି, ‘ମୁଁ ମୋର ଉପବାସ ଭାଙ୍ଗିବାକୁ ଏଠାକୁ ଆସିଛି। ସକାଳଠାରୁ ଘରେ ପୂର୍ଣ୍ଣ ପ୍ରାର୍ଥନା ସହିତ ରହେ। ଆଲ୍ଲା ମୋତେ ଏତେ ବଡ଼ ବିପଦରୁ ରକ୍ଷା କରିଛନ୍ତି। ମୁଁ ଆଲ୍ଲାଙ୍କୁ ପ୍ରାର୍ଥନା କରୁଛି ଯେ ମୋତେ କର୍କଟ ଡାକ୍ତରଖାନା ଖୋଲିବାକୁ ଯଥେଷ୍ଟ ସକ୍ଷମ କରନ୍ତୁ।’

ରାଖୀ ସାୱନ୍ତଙ୍କ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅଭିନେତ୍ରୀଙ୍କ ପ୍ରଶଂସକମାନେ ଭିଡିଓକୁ ପସନ୍ଦ କରୁଛନ୍ତି ଏବଂ ମନ୍ତବ୍ୟ ଦେଇ ସେମାନଙ୍କ ମତାମତ ଦେଉଛନ୍ତି।
ରାଖୀଙ୍କ ସ୍ୱାମୀ ଆଦିଲ ଏବେ ଜେଲ୍‌ରେ। ବିବାହ ପରେ ରାଖୀ ସାୱନ୍ତ ତାଙ୍କ ନାମ ଫାତିମାକୁ ବଦଳାଇ ଥିଲେ। ଉଭୟଙ୍କ ମଧ୍ୟରେ ମନମାଳିନ୍ୟ ହେବାରୁ ସେମାନଙ୍କ ବିବାହ ବିଚ୍ଛେଦ ହୋଇ ସାରିଛି।