ଯେତିକି ଦିନ ଲେଖାଥିବ, ସେତିକି ଦିନ ବଞ୍ଚିବି; ଲରେନ୍ସର ଧମକକୁ ନେଇ ସଲମାନଙ୍କ ପ୍ରତିକ୍ରିୟା

ମୁମ୍ବାଇ: ବଲିଉଡ ସୁପରଷ୍ଟାର ସଲମାନ ଖାନଙ୍କ ବହୁ ପ୍ରତୀକ୍ଷିତ ଫିଲ୍ମ 'ସିକନ୍ଦର' ରିଲିଜ୍ ହେବାକୁ ଯାଉଛି। ଏହି ଫିଲ୍ମରେ ରଶ୍ମିକା ମନ୍ଦନା ସଲମାନ ଖାନଙ୍କ ସହ ପରଦାରେ ରୋମାନ୍ସ କରୁଥିବାର ନଜର ଆସିବେ। 'ସିକନ୍ଦର' ରିଲିଜ୍ ହେବା ପୂର୍ବରୁ, ସଲମାନ ଖାନ କୁଖ୍ୟାତ ଲରେନ୍ସ ବିଷ୍ଣୋଇ ଗ୍ୟାଙ୍ଗରୁ ତାଙ୍କୁ ମିଳୁଥିବା ଲଗାତାର ହତ୍ୟା ଧମକ ଉପରେ ନିଜର ନୀରବତା ଭାଙ୍ଗିଛନ୍ତି। 

ଗତ କିଛି ମାସ ମଧ୍ୟରେ, ସଲମାନଙ୍କୁ ଲରେନ୍ସ ବିଷ୍ଣୋଇ ଗ୍ୟାଙ୍ଗରୁ ଅନେକ ହତ୍ୟା ଧମକ ମିଳିଛି। ଅକ୍ଟୋବର ୨୦୨୪ରେ, ସଲମାନ ଖାନଙ୍କ ଘନିଷ୍ଠ ବନ୍ଧୁ ଏବଂ ଏନସିପି ନେତା ବାବା ସିଦ୍ଦିକିଙ୍କୁ ବିଷ୍ଣୋଇ ଗ୍ୟାଙ୍ଗ ଟାର୍ଗେଟ କରିଥିବା ଅଭିଯୋଗ ହୋଇଥିଲା। ତାଙ୍କ ଜୀବନ ପ୍ରତି ବିପଦ ସତ୍ତ୍ୱେ, ସଲମାନ ଏହାକୁ ତାଙ୍କ ବୃତ୍ତିଗତ ଜୀବନ ଉପରେ ପ୍ରଭାବ ପକାଇବାକୁ ଦେଇନାହାନ୍ତି। ଏତେ ଥର ହତ୍ୟା ଧମକ ମିଳିବା ପରେ ନିଜ ସୁରକ୍ଷାକୁ ନେଇ ସେ ଚିନ୍ତିତ କି ନାହିଁ ବୋଲି ଏକ ସାକ୍ଷାତକାରରେ ପଚରାଯିବାରୁ ସଲମାନ କହିଛନ୍ତି ଯେ, "ଭଗବାନ, ଆଲ୍ଲା ସମସ୍ତେ ଉପରେ। ଯେତିକି ଦିନ ଲେଖାଥିବ, ସେତିକି ଦିନ ବଞ୍ଚିବି। ବେଳେବେଳେ ଆମକୁ ଏତେ ଲୋକଙ୍କୁ ସାଙ୍ଗରେ ନେବାକୁ ପଡ଼ିଥାଏ, ସେଇଟା ହିଁ ସମସ୍ୟା।"

ଉଲ୍ଲେଖଯୋଗ୍ୟ, ଗତ ତିନି ବର୍ଷ ଧରି ସଲମାନ ଖାନ ଏବଂ ତାଙ୍କ ପରିବାର ଓ ବନ୍ଧୁମାନଙ୍କ ଉପରେ ଲରେନ୍ସ ବିଷ୍ନୋଇ ଗ୍ୟାଙ୍ଗ ନଜର ରଖୁଛି। ପୂର୍ବରୁ, ସଲିମ ଖାନ ତାଙ୍କ ସକାଳ ଚାଲିବା ସମୟରେ ଏକ ଧମକପୂର୍ଣ୍ଣ ଚିଠି ପାଇଥିଲେ। ତା'ପରେ ସଲମାନଙ୍କ ଘର ଏବଂ ଫାର୍ମ ହାଉସ୍ ରେକି କରାଯାଇଥିଲା ଏବଂ ସଲମାନଙ୍କ ଘର ଉପରେ ଗୁଳିଚାଳନା କରାଯାଇଥିଲା। ଏହି ଘଟଣାଗୁଡ଼ିକ ଦ୍ୱାରା ସୁପରଷ୍ଟାରଙ୍କ ପରିବାର ଏବେ ଭୟଭୀତ ଅଛନ୍ତି।

salman-khan | gangster-lawrence-bishnoi