ଏତେ କୋଟିର ମାଲିକ ଥିଲେ ସଞ୍ଜୟ କପୁର

ମୁମ୍ବାଇ: ଗୁରୁବାର ବଲିଉଡ୍ ଅଭିନେତ୍ରୀ କରିସ୍ମା କପୁରଙ୍କ ପୂର୍ବତନ ସ୍ୱାମୀ ସଞ୍ଜୟ କପୁରଙ୍କ ଦେହାନ୍ତ ହୋଇଥିଲା। ବ୍ରିଟେନରେ ତାଙ୍କର ମୃତ୍ୟୁ ଘଟିଥିବା ଜଣାଯାଇଛି। ହୃଦଘାତ ପାଇଁ ୫୩ ବର୍ଷୀୟ ଏହି ବ୍ୟବସାୟୀଙ୍କ ମୃତ୍ୟୁ ହୋଇଥିବା ଜଣାଯାଇଛି। ବ୍ରିଟେନରେ ପୋଲୋ ଖେଳୁଥିବା ସମୟରେ ତାଙ୍କର ହୃଦଘାତ ହୋଇଥିଲା ବୋଲି କୁହାଯାଉଛି। ତାଙ୍କର ଦେହାନ୍ତ ପରେ ଏବେ ସେ କେତେ କୋଟିର ମାଲିକ ଥିଲେ ତାହା ସାମ୍ନ‌ାକୁ ଆସିଛି।

ସଞ୍ଜୟ କପୁର କେବଳ କରିସ୍ମା କପୁରଙ୍କ ପୂର୍ବତନ ସ୍ୱାମୀ ନଥିଲେ, ବରଂ ଜଣେ ସଫଳ ବ୍ୟବସାୟୀ ମଧ୍ୟ ଥିଲେ। ସେ ସୋନା ବିଏଲଡବ୍ଲୁ ପ୍ରିସିସନ୍ ଫୋର୍ଜିଂସ ଲିମିଟେଡ୍ (ସୋନା କମଷ୍ଟାର)ର ଅଧ୍ୟକ୍ଷ ଥିଲେ। ଏହି କମ୍ପାନି ବୈଦ୍ୟୁତିକ ଯାନ ଏବଂ ଅଟୋ ପାର୍ଟସ ତିଆରି ପାଇଁ ଜଣାଶୁଣା। ସଞ୍ଜୟ କପୁର ଏସିଏମଏ (ଅଟୋମୋଟିଭ୍ କମ୍ପୋନେଣ୍ଟ ମ୍ୟାନୁଫ୍ୟାକଚର୍ସ ଆସୋସିଏସନ୍)ର ପୂର୍ବତନ ସଭାପତି ମଧ୍ୟ ଥିଲେ, ଏହା ସହିତ ସେ ଏକ ପ୍ରସିଦ୍ଧ ସ୍କୁଲର ଟ୍ରଷ୍ଟି ମଧ୍ୟ ଥିଲେ।

ଫୋବର୍ସ ଏବଂ ବ୍ଲୁମବର୍ଗ ଭଳି ବିଶ୍ୱସ୍ତରୀୟ ପ୍ଲାଟଫର୍ମ ଅନୁଯାୟୀ, ସଞ୍ଜୟ କପୁରଙ୍କ ମୋଟ ସମ୍ପତ୍ତି ୧.୧ ରୁ ୧.୧୮ ବିଲିୟନ ଡଲାର ଅର୍ଥାତ୍ ପ୍ରାୟ ୯,୨୦୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ସୂଚନା ଅନୁଯାୟୀ, ଲଣ୍ଡନ, ଦିଲ୍ଲୀ ଏବଂ ମୁମ୍ବାଇ ଭଳି ସହରରେ ତାଙ୍କର ବିଳାସପୂର୍ଣ୍ଣ ସମ୍ପତ୍ତି ଥିଲା। ତୃତୀୟ ପତ୍ନୀ ପ୍ରିୟା ସଚଦେବଙ୍କ ସହିତ ତାଙ୍କର ବିଳାସପୂର୍ଣ୍ଣ ଜୀବନଶୈଳୀ ପ୍ରାୟତଃ ଚର୍ଚ୍ଚାରେ ରହୁଥିଲା। ବ୍ୟକ୍ତିଗତ ବିମାନ, ବିଦେଶ ଯାତ୍ରା ଏବଂ ବିଳାସପୂର୍ଣ୍ଣ କାର ତାଙ୍କ ଜୀବନର ଏକ ଅଂଶ ଥିଲା।