'ଫୁଲେ'କୁ ସମର୍ଥନ କରି କରମୁକ୍ତ କରିବାକୁ ଦାବି କଲେ କେନ୍ଦ୍ରମନ୍ତ୍ରୀ ରାମଦାସ ଅଠାୱଲେ

ମୁମ୍ବାଇ: ସମାଜ ସଂସ୍କାରକ ମହାତ୍ମା ଜ୍ୟୋତିବା ଫୁଲେ ଏବଂ ତାଙ୍କ ପତ୍ନୀ ସାବିତ୍ରୀବାଇ ଫୁଲେଙ୍କ ଜୀବନୀ ଉପରେ ଆଧାରିତ ଚଳଚ୍ଚିତ୍ର 'ଫୁଲେ'କୁ କେନ୍ଦ୍ରମନ୍ତ୍ରୀ ରାମଦାସ ଅଠାୱଲେ ପ୍ରଶଂସା କରିଛନ୍ତି। ମେ’ ୧, ୨୦୨୫ରେ ମୁମ୍ବାଇରେ ଆୟୋଜିତ ଏକ ସ୍ୱତନ୍ତ୍ର ସ୍କ୍ରିନିଂରେ, ଅଠୱାଲେ ଚଳଚ୍ଚିତ୍ରଟିକୁ ସାମାଜିକ ଏବଂ ସାଂସ୍କୃତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ବୋଲି ବର୍ଣ୍ଣନା କରିଥିଲେ। ସେ ଏହାକୁ ସମସ୍ତଙ୍କ ପାଇଁ, ବିଶେଷକରି ସାଂସଦ ଏବଂ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ପାଇଁ ନିଶ୍ଚିତ ଭାବରେ ଦେଖିବା ଉଚିତ ବୋଲି କହିଥିଲେ। ଏହି ସିନେମାଟି ୨୫ ଏପ୍ରିଲ ୨୦୨୫ରେ ମୁକ୍ତିଲାଭ କରିଥିଲା। ହେଲେ ଏହାର କାହାଣୀକୁ ନେଇ ବିବାଦ ହେବାରୁ ରିଲିଜ୍ ଘୁଞ୍ଚିଥିଲା। ​​ଏବେ ଫିଲ୍ମ ରିଲିଜ୍ ହେବା ପ‌ରେ ଦର୍ଶକଙ୍କୁ ଏହା ବହୁତ ପସନ୍ଦ ଆସୁଥିବା ଜଣାଯାଇଛି।

'ଫୁଲେ' ହେଉଛି ମହାତ୍ମା ଜ୍ୟୋତିବା ଫୁଲେ ଏବଂ ତାଙ୍କ ପତ୍ନୀ ସାବିତ୍ରୀବାଇ ଫୁଲେଙ୍କ ଜୀବନୀ ଉପରେ ଆଧାରିତ, ଯେଉଁମାନେ ୧୯ଶତାବ୍ଦୀର ଭାରତରେ ଜାତିବାଦ, ନିରକ୍ଷରତା ଏବଂ ଲିଙ୍ଗଗତ ଅସମାନତା ବିରୋଧରେ ଲଢ଼ିଥିଲେ। ଏହି ଚଳଚ୍ଚିତ୍ରଟି ଅନନ୍ତ ମହାଦେବନଙ୍କ ଦ୍ୱାରା ନିର୍ଦ୍ଦେଶିତ ଏବଂ ଏଥିରେ ପ୍ରତୀକ ଗାନ୍ଧୀ ଓ ପତ୍ରଲେଖା ମୁଖ୍ୟ ଭୂମିକାରେ ଅଭିନୟ କରିଛନ୍ତି। ଏହା ବ୍ୟତୀତ ବିନୟ ପାଠକ, ସୁରେଶ ବିଶ୍ୱକର୍ମା ଏବଂ ଦର୍ଶୀଲ ସଫାରୀ ଭଳି କଳାକାର ମଧ୍ୟ ଫିଲ୍ମରେ କାମ କରିଛନ୍ତି।