ଭାରତ ମହାସାଗରରେ ୩ ରୁଷିଆ ଯୁଦ୍ଧପୋତ, ବାଂଲାଦେଶ ବନ୍ଦରରେ ନଙ୍ଗର ପକାଇଲେ

ଢାକା: ବାଂଲାଦେଶ ସହିତ ଭାରତର ସମ୍ପର୍କ ଖରାପ ହେଉଥିବା ବେଳେ, ତିନୋଟି ରୁଷିଆ ଯୁଦ୍ଧଜାହାଜ ବଙ୍ଗୋପସାଗରରେ ପହଞ୍ଚିଛି। ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଛି। ରବିବାର ବାଂଲାଦେଶର ଚିଟାଗଙ୍ଗ ବନ୍ଦରରେ ତିନୋଟି ରୁଷିଆ ନୌସେନା ଜାହାଜ, ଆଡମିରାଲ ଟ୍ରିବଟ୍ସ, ଆଡମିରାଲ ପାଣ୍ଟେଲେଭ ଏବଂ ଟ୍ୟାଙ୍କର ପେଚେଙ୍ଗା ପହଞ୍ଚିଛି।

ପୂର୍ବରୁ, ବାଂଲାଦେଶ ସେନା ମୁଖ୍ୟ ଏସଏମ ଶଫିଉଦ୍ଦିନ ଅହମ୍ମଦ ମସ୍କୋ ଗସ୍ତ କରିଥିଲେ। ଯାହା ପରେ ପ୍ରଶ୍ନ ଉଠାଯାଉଛି ଯେ, ବନ୍ଧୁ ରୁଷିଆ ବାଂଲାଦେଶ ସହିତ ମିଶି ଭାରତ ବିରୁଦ୍ଧରେ ଷଡ଼ଯନ୍ତ୍ର କରୁଛି କି? ରୁଷୀୟ ଖବର ଏଜେନ୍ସି ସ୍ପୁଟନିକ୍ କହିଛି ଯେ, ରୁଷିଆ ଦକ୍ଷିଣ ଏସିଆ ଏବଂ ପ୍ରମୁଖ ବାଣିଜ୍ୟ ମାର୍ଗଗୁଡ଼ିକରେ ରଣନୈତିକ ପ୍ରବେଶ ସୁରକ୍ଷିତ କରିବାକୁ ଲକ୍ଷ୍ୟ ରଖିଛି।

ବାଂଲାଦେଶ ଚୀନ୍‌ଠାରୁ ଫ୍ରିଗେଟ୍, କର୍ଭେଟ୍, ଟ୍ୟାଙ୍କ, ଲଢୁଆ ବିମାନ ଏବଂ ବୁଡ଼ାଜାହାଜ ସମେତ ବିଭିନ୍ନ ପ୍ରତିରକ୍ଷା ପ୍ରଣାଳୀ କିଣିଛି। ତେଣୁ ବାଂଲାଦେଶ ଅସ୍ତ୍ରଶସ୍ତ୍ର ପାଇଁ ଚୀନ ଉପରେ ଅତ୍ୟଧିକ ନିର୍ଭରଶୀଳ ହୋଇଯାଇଛି।

ଭାରତର ଦୃଷ୍ଟିକୋଣରୁ, ଚିଟାଗଙ୍ଗ ବନ୍ଦରକୁ ରୁଷିଆ ନୌସେନା ଜାହାଜ ଗସ୍ତର ଦୁଇଟି ଭିନ୍ନ ଦିଗ ହୋଇପାରେ। ମନି କଣ୍ଟ୍ରୋଲ ଅନୁଯାୟୀ, ବାଂଲାଦେଶରେ ଚୀନ୍‌ର ପ୍ରଭାବକୁ ସନ୍ତୁଳିତ କରିବା ପାଇଁ ଦକ୍ଷିଣ ଏସିଆରେ ରୁଷିଆର ବୃଦ୍ଧି ପାଉଥିବା ଉପସ୍ଥିତିକୁ ନୂଆଦିଲ୍ଲୀ ସ୍ୱାଗତ କରିପାରେ। ଭାରତ ଏବଂ ରୁଷିଆ ମଧ୍ୟରେ ଦୃଢ଼ ପ୍ରତିରକ୍ଷା ଏବଂ ଶକ୍ତି ସମ୍ପର୍କ ରହିଛି। ଏହା ବ୍ୟତୀତ ଦୁଇ ଦେଶ ମଧ୍ୟରେ ବିଶ୍ୱାସର ସମ୍ପର୍କ ମଧ୍ୟ ରହିଛି।

ଅଧିକ ପଢ଼ନ୍ତୁ: ପରମାଣୁ ଅସ୍ତ୍ର ନୁହେଁ, ପାଣି ଆଣିଛି ଇରାନ ପାଇଁ ସଙ୍କଟ

ତେଣୁ ଏହି ଗସ୍ତ ଭାରତକୁ ଅସହଜ କରିବ ନାହିଁ। ଅଧିକନ୍ତୁ, ବାଂଲାଦେଶ ଏବଂ ରୁଷିଆ ଉଭୟ ସହିତ ଭାରତର ଦୀର୍ଘକାଳୀନ ପ୍ରତିରକ୍ଷା ସହଭାଗୀତାକୁ ଦୃଷ୍ଟିରେ ରଖି, ଏହା ଅନୁମାନ କରାଯାଉଛି ଯେ, ରୁଷିଆ ଏ ବିଷୟରେ ଭାରତକୁ ପୂର୍ବରୁ ଜଣାଇ ସାରିଛି। ତଥାପି, ଭାରତ ପାଇଁ ଏବେ ବି କିଛି ଚିନ୍ତା ରହିଛି। ଐତିହାସିକ ବନ୍ଧୁତା ସତ୍ତ୍ୱେ, ତୃତୀୟ ପକ୍ଷ ନୌସେନାର ଆଗମନ ଭାରତ ମହାସାଗରରେ ଭାରତ-ନେତୃତ୍ୱାଧୀନ ସୁରକ୍ଷା ନିର୍ମାଣ ପାଇଁ ନୂଆଦିଲ୍ଲୀର ଦୃଷ୍ଟିକୋଣକୁ ଜଟିଳ କରୁଛି।

ଅଧିକ ପଢ଼ନ୍ତୁ: ଡିସି ବନାମ ଆରଆର: କାହାକୁ ସୁହାଇବ ଅରୁଣ ଜେଟଲି ଷ୍ଟାଡିୟମ୍ ପିଚ୍