ଦିସ୍‌ପୁର: ଆସାମରେ ବାଲ୍ୟ ବିବାହକୁ ରୋକିବା ପାଇଁ ଆସାମ ସରକାର ଅନେକ ପଦକ୍ଷେପ ନେଉଛନ୍ତି। ଆସାମ ପୁଲିସ ତୃତୀୟ ପର୍ଯ୍ୟାୟରେ  ବାଲ୍ୟ ବିବାହକୁ ରୋକିବା ପଦକ୍ଷେପ ଅନ୍ତର୍ଗତ ୪୧୬ ଜଣଙ୍କୁ ଗିରଫ କରିଛି। ଏନେଇ ୩୩୫ ମାମଲା ରୁଜୁ ହୋଇଛି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ସୋସିଆଲ ମିଡିଆରେ ଏହି ସୂଚନା ଦେଇଛନ୍ତି।

Advertisment

ବାଲ୍ୟ ବିବାହକୁ ରୋକିବା ପାଇଁ ସରକାର ନିରନ୍ତର କାର୍ଯ୍ୟ କରୁଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏଥିପାଇଁ ଏକ ସ୍ୱତନ୍ତ୍ର ଅଭିଯାନ ମଧ୍ୟ ଚାଲିଛି। ଡିସେମ୍ବର ୨୧-୨୨ ରାତିରେ ଆରମ୍ଭ ହୋଇଥିବା କାର୍ଯ୍ୟରେ ପୁଲିସ ଏପର୍ଯ୍ୟନ୍ତ ୩୩୫ଟି ମାମଲା ରୁଜୁ କରିଛି ଏବଂ ୪୧୬ଜଣଙ୍କୁ ଗିରଫ କରିଛି। ସେମାନଙ୍କୁ ରବିବାର ଦିନ କୋର୍ଟରେ ହାଜର କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ଆମେ ଏପରି କାର୍ଯ୍ୟ ଜାରି ରଖିବୁ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏହା ସହିତ, ଆମେ ସାମାଜରେ ହେଉଥିବା ଏଭଳି କାର୍ଯ୍ୟ ଦୂର କରିବା ପାଇଁ ସାହସିକ ପଦକ୍ଷେପ ନେବା ଜାରି ରଖିବୁ ବୋଲି ସେ କହିଛନ୍ତି।

ଆସାମ ସରକାର ୨୦୨୩ ମସିହାରେ ଫେବୃଆରୀ ଏବଂ ଅକ୍ଟୋବର ମାସରେ ଦୁଇଟି ପର୍ଯ୍ୟାୟରେ ବାଲ୍ୟ ବିବାହ ବିରୋଧରେ ଅଭିଯାନ ଆରମ୍ଭ କରିଥିଲେ। ଏହି ଅଭିଯାନର ପ୍ରଥମ ପର୍ଯ୍ୟାୟରେ ୩,୪୮୩  ଜଣଙ୍କୁ ଗିରଫ କରାଯାଇଥିବାବେଳେ ୪,୫୧୫ ମାମଲା ରୁଜୁ ହୋଇଥିଲା। ଅକ୍ଟୋବରରେ ଦ୍ୱିତୀୟ ପର୍ଯ୍ୟାୟରେ ୯୧୫ ଜଣଙ୍କୁ ଗିରଫ କରାଯାଇଥିଲା ଏବଂ ୭୧୦ ଟି ମାମଲା ରୁଜୁ ହୋଇଥିଲା। ତୃତୀୟ ପର୍ଯ୍ୟାୟରେ ସର୍ବନିମ୍ନ ସଂଖ୍ୟକ ମାମଲା ଏବଂ ଲୋକଙ୍କୁ ଗିରଫ କରାଯାଇଛି।

 

ଅଧିକ ପଢ଼ନ୍ତୁ: ୩୫ ପାକିସ୍ତାନୀ ସେନାଙ୍କ ମୃତ୍ୟୁ ପାଇଁ ଟିଟିପି ନିଜକୁ ଦାୟୀ କଲା

ଆସାମରେ ବାଲ୍ୟ ବିବାହ ପ୍ରଥାକୁ ବନ୍ଦ କରିବା ପାଇଁ ସରକାର ସ୍କୁଲ ଏବଂ କଲେଜରେ ପଢୁଥିବା ଛାତ୍ରୀମାନଙ୍କୁ ପ୍ରତି ମାସରେ ୧୦୦୦ ଟଙ୍କା ଛାତ୍ରବୃତ୍ତି ପ୍ରଦାନ ମଧ୍ୟ ଆରମ୍ଭ କରିଥିଲେ। ସ୍ନାତକ ଛାତ୍ରୀମାନଙ୍କୁ ପ୍ରତି ମାସରେ ୨୫୦୦ଟଙ୍କା ଦିଆଯାଉଛି। ଆସାମରେ ବାଲ୍ୟ ବିବାହ ବନ୍ଦ କରିବାରେ ଏହି ପଦକ୍ଷେପ ସହାୟକ ହେବ ବୋଲି ସିଏମ କହିଛନ୍ତି। ତେବେ ପୂର୍ବ ବର୍ଷ ତୁଳନାରେ ଆସାମରେ ବାଲ୍ୟ ବିବାହ ମାମଲାରେ ହ୍ରାସ ଘଟିଥିବା ମୁଖ୍ୟମନ୍ତ୍ରୀ କହିଛନ୍ତି।

ଅଧିକ ପଢ଼ନ୍ତୁ: ଗାଜା ଚୁକ୍ତିରେ ବିଳମ୍ବ: ଇସ୍ରାଏଲ-ହମାସ୍ କ’ଣ ଚାହୁଁଛନ୍ତି?