୫୦୦ ଭାଲୁଙ୍କୁ ଏହି ଦେଶରେ ହତ୍ୟା କରାଯିବ: ପଶୁପ୍ରେମୀଙ୍କ ପକ୍ଷରୁ ବିରୋଧ

ବୁକାରେଷ୍ଟ: ଭାଲୁଙ୍କୁ ମାରିବା ପାଇଁ ରୋମାନିଆର ସଂସଦ ଅନୁମତି ଦେଇଛି। ସଂସଦ ଦ୍ୱାରା ଏକ ନୂତନ ନିୟମ ପାରିତ ହୋଇଛି। ଏହି ନିୟମ ଅନୁଯାୟୀ, ଚଳିତ ବର୍ଷ ଶେଷ ସୁଦ୍ଧା ୪୮୧ଭାଲୁଙ୍କୁ ହତ୍ୟା କରାଯିବ। ଏହା ପ୍ରଥମ ଥର ନୁହେଁ ରୋମାନିଆ ଏଭଳି କରୁଛି।

ଗତ ବର୍ଷ ରୋମାନିଆରେ ମଧ୍ୟ ୨୨୦ ଭାଲୁଙ୍କୁ ହତ୍ୟା କରିବାକୁ ସଂସଦ ନିର୍ଦ୍ଦେଶ ଦେଇଥିଲା। ଗତ ବର୍ଷ ତୁଳନାରେ ଚଳିତ ବର୍ଷ ଦୁଇଗୁଣ ଭାଲୁଙ୍କୁ ହତ୍ୟା କରାଯିବ। ରୋମାନିଆର ପରିବେଶ ମନ୍ତ୍ରଣାଳୟ ଅନୁଯାୟୀ ଦେଶରେ ୮ ହଜାର ଧୁସର ଭାଲୁ ଅଛନ୍ତି। ଅଧିକାଂଶ ଧୁସର ଭାଲୁ ରୁଷିଆରେ ଦେଖାଯାଇଥାନ୍ତି। ୟୁରୋପରେ ଧୁସର ଭାଲୁଙ୍କ ସଂଖ୍ୟାରେ ରୋମାନିଆ ରୁଷିଆ ପରେ ଦ୍ୱିତୀୟ ସ୍ଥାନରେ ଅଛି।

ମନ୍ତ୍ରଣାଳୟ ନିଶ୍ଚିତ କରିଛି ଯେ ସଂସଦ ଭାଲୁଙ୍କୁ ମାରିବା ପାଇଁ ନିର୍ଦ୍ଦେଶ ଦେଇଛି। ଭାଲୁମାନଙ୍କର ଜନସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି। ଯାହା ଦ୍ବାରା ମଣିଷଙ୍କ ଉପରେ ଆକ୍ରମଣ ବୃଦ୍ଧି ପାଇଛି । କିନ୍ତୁ ନୂତନ ଆଇନ ପ୍ରଣୟନ କରିବା ସହିତ ସରକାର ଏହା ମଧ୍ୟ କହିଛନ୍ତି ଯେ ଭବିଷ୍ୟତରେ ଆକ୍ରମଣ ବନ୍ଦ ହେବ ବୋଲି ନିଶ୍ଚିତ ନୁହେଁ। ରୋମାନିଆରେ ଗତ ୨୦ ବର୍ଷ ମଧ୍ୟରେ ଭାଲୁ ଆକ୍ରମଣରେ ୨୬ ଜଣଙ୍କର ମୃତ୍ୟୁ ଘଟିଛି। ଏଥିସହ ଏହି ଆକ୍ରମଣରେ ୨୭୪ ଜଣ ଆହତ ହୋଇଥିବା ସୂଚନା ରେକର୍ଡରେ ରହିଛି।

ଏହି ନିଷ୍ପତ୍ତି ବିରୋଧରେ ପରିବେଶପ୍ରେମୀମାନେ ବିରୋଧ କରିଥିଲେ ପଶୁପ୍ରେମୀ ଏବଂ ପରିବେଶ ଗୋଷ୍ଠୀ ଏହି ନିଷ୍ପତ୍ତି ବିରୁଦ୍ଧରେ ଅଛନ୍ତି। ୱାର୍ଲ୍ଡ ୱାଇଲ୍ଡ ଲାଇଫ୍ ପାଣ୍ଠିର ଜୀବବିଜ୍ଞାନୀ କ୍ୟାଲିନ୍ ଆର୍ଡଲାଇନ୍ ଏ ସମ୍ପର୍କରେ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ଏହି ଆଇନ କିଛି ସମାଧାନ କରିବ ନାହିଁ। ଭାଲୁ ସମସ୍ୟା ଉପରେ ସରକାର ଧ୍ୟାନ ଦେବାକୁ ପଡିବ। ପ୍ରତିରୋଧ ଏବଂ ହସ୍ତକ୍ଷେପ ସହିତ ଏହା ହେବା ଆବଶ୍ୟକ।

ଭାଲୁମାନେ କାହିଁକି ଆକ୍ରମଣ କରୁଛନ୍ତି ତାହା ମଧ୍ୟ ଦେଖିବା ଆବଶ୍ୟକତା ରହିଛି ବୋଲି ପଶୁପ୍ରେମୀ କହିଛନ୍ତି। ମଣିଷ ଉପରେ ଆକ୍ରମଣ ଯୋଗୁ ଭାଲୁଙ୍କୁ ମାରିବା ପାଇଁ ରୋମାନିଆର ସଂସଦ ଏକ ନୂତନ ନିୟମ ପ୍ରଣୟନ କରିଛି।