ଝିଅକୁ ବାପା ଦେଲେ ନାହିଁ ୬ଟି ଏୟାରବ୍ୟାଗ ଥିବା କାର, ଦେଖନ୍ତୁ କେମିତି ବୁଝାଇଲେ ଅକ୍ଷୟ କୁମାର

ନୂଆଦିଲ୍ଲୀ: କାରରେ ୬ଟି ଏୟାରବ୍ୟାଗ ଅନ୍ତର୍ଭୁକ୍ତ କରିବା ପାଇଁ ସରକାର ଲଗାତାର ନୂଆ ନୂଆ ପଦକ୍ଷେପ ନେଉଛନ୍ତି | ତେବେ ସରକାର ଏବଂ କାର ଉତ୍ପାଦନକାରୀ କମ୍ପାନିଙ୍କ ମଧ୍ୟରେ ଏପର୍ଯ୍ୟନ୍ତ କୌଣସି ସହମତି ହୋଇପାରି ନାହିଁ। ତେବେ ଏହି ସମୟ ମଧ୍ୟରେ ସରକାର ଚଳଚ୍ଚିତ୍ର ଅଭିନେତା ଅକ୍ଷୟ କୁମାରଙ୍କ ସହ ମିଶି ଏକ ବିଜ୍ଞାପନ ଜାରି କରି ୬ଟି ଏୟାରବ୍ୟାଗ ଥିବା କାରକୁ ନେଇ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିଛନ୍ତି। ସଡକ ପରିବହନ ଏବଂ ରାଜପଥ ମନ୍ତ୍ରଣାଳୟ ପକ୍ଷରୁ ଏହି ବିଜ୍ଞାପନ ପ୍ରକାଶ ପାଇଛି ।

ଏହି ବିଜ୍ଞାପନକୁ ନିଜ ଟ୍ୱିଟର ହ୍ୟାଣ୍ଡେଲରେ ସେୟାର କରି କେନ୍ଦ୍ର ପରିବହନ ମନ୍ତ୍ରୀ ନିତିନ ଗଡକରୀ ଲେଖିଛନ୍ତି - '୬ଟି ଏୟାରବ୍ୟାଗ ଥିବା ଗାଡିରେ ଯାତ୍ରା କରି ଜୀବନକୁ ସୁରକ୍ଷିତ କରନ୍ତୁ ।' ବିଜ୍ଞାପନରେ ଜଣେ କନ୍ୟାଙ୍କର ବିଦାୟ ଦୃଶ୍ୟ ଦେଖିବାକୁ ମିଳୁଛି | ଯେଉଁଥିରେ କନ୍ୟା ଜଣକ ତାଙ୍କ ପିତା ଉପହାର ଦେଇଥିବା କାର ଭିତରେ ବସି କାନ୍ଦୁଛି | ଏଭଳି ପରିସ୍ଥିତିରେ ଅକ୍ଷୟ କୁମାର ଆସି ତାଙ୍କ ପିତାଙ୍କୁ କହିଛନ୍ତି ଯେ ଏହି କାରରେ ୬ଟି ଏୟାରବ୍ୟାଗ ନାହିଁ। ଏପରି ପରିସ୍ଥିତିରେ, ଯଦି ଝିଅ କାନ୍ଦିବ ନାହିଁ ତ ଆଉ କ’ଣ ହସିବ?

ଏହା ପରେ ବାପା ତାଙ୍କୁ ୬ଟି ଏୟାରବ୍ୟାଗ ଥିବା ଏକ କାର ଉପହାର ଦିଅନ୍ତି ଏବଂ ଝିଅ ହସିବାକୁ ଲାଗୁଛନ୍ତି | ଏକ ମଜାଳିଆ ଢଙ୍ଗରେ ପ୍ରସ୍ତୁତ ଏହି ବିଜ୍ଞାପନ ହୃଦୟସ୍ପର୍ଶୀ ହୋଇଥିବାବେଳେ ଦୁର୍ଘଟଣା ସମୟରେ ୬ଟି ଏୟାରବ୍ୟାଗର ଗୁରୁତ୍ୱ ମଧ୍ୟ ବିଜ୍ଞାପନ ମଝିରେ ଗ୍ରାଫିକ୍ ସାହାଯ୍ୟରେ ବର୍ଣ୍ଣନା କରାଯାଇଛି |