ଜେଲରେ ମୋର ମରିବା ଅବସ୍ଥା ହୋଇଯାଇଥିଲା: ସତ୍ୟେନ୍ଦ୍ର ଜୈନ

ନୂଆଦିଲ୍ଲୀ: ଆମ୍ ଆଦମୀ ପାର୍ଟି(ଆପ୍)ର ବରିଷ୍ଠ ନେତା ତଥା ଦିଲ୍ଲୀର ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ତିହାର ଜେଲରୁ ଶୁକ୍ରବାର ଦିନ ମୁକ୍ତ କରାଯାଇଥିଲା। ଜେଲରୁ ବାହାରିବା ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅତିଶି ଏବଂ ଅନ୍ୟ ଆପ୍ ନେତାମାନେ ତାଙ୍କୁ ଜେଲ ବାହାରେ ସ୍ୱାଗତ କରିଥିଲେ। ବାହାରକୁ ଆସିବା ପରେ ସତ୍ୟେନ୍ଦ୍ର ଜୈନ କହିଛନ୍ତି ଯେ ଯଦି ଗଣତନ୍ତ୍ର ନଥାନ୍ତା ତେବେ ମୋତେ ଫାଶୀ ଦିଆଯାଇଥାନ୍ତା। ମୁଁ ଜେଲରେ ରହି ପ୍ରାୟ ମରିଯାଇଥିଲି।

ତାଙ୍କ କହିବା ମୁତାବକ, "ଯଦି ଗଣତନ୍ତ୍ର ନଥାନ୍ତା ତେବେ କେନ୍ଦ୍ର ସରକାର ମୋତେ ଫାଶୀ ଦେଇଥାନ୍ତେ। ଅରବିନ୍ଦ କେଜ୍ରିୱାଲ କହନ୍ତି ଯେ ଯଦି ଆମେ ପରିବର୍ତ୍ତନ ଆଣିବାକୁ ଚେଷ୍ଟା କରିବୁ ତେବେ ଆମକୁ ଜେଲ ଯିବାକୁ ପଡିବ। ଜେଲକୁ ଯିବା ପରେ ଆମର ଅନେକ ନେତା ସବୁବେଳେ ଭାବୁଥିଲେ ଯେ ସେମାନେ ଆମକୁ ଭାଙ୍ଗିବାକୁ କାହିଁକି ଚାହୁଁଛନ୍ତି? ଆମେ ଏହା ବିଷୟରେ ବହୁତ ଚିନ୍ତା କଲୁ ଏବଂ ଆମେ ଏହି ସିଦ୍ଧାନ୍ତରେ ପହଞ୍ଚିଲୁ ଯେ ସେମାନେ କେବଳ ଆମକୁ ଏବଂ ଆମେ ଆଣିଥିବା ପରିବର୍ତ୍ତନକୁ ଅଟକାଇବାକୁ ଚାହୁଁଛନ୍ତି | ଦୀର୍ଘ ଦିନ ଧରି ମୋ ବିରୋଧରେ ଷଡ଼ଯନ୍ତ୍ର କରି ବି ସେମାନଙ୍କୁ କିଛି ପ୍ରମାଣ ମିଳିନଥିଲା। ସେମାନଙ୍କର ଏକମାତ୍ର ଉଦ୍ଦେଶ୍ୟ ଥିଲା ମୋତେ, ମନୀଷ ସିସୋଦିଆ ଏବଂ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିବା। ମୋତେ ମାସ ମାସ ଧରି ଏକାକୀ ବନ୍ଦୀଶାଳାରେ ରଖାଯାଇଥିଲା। ମୋର ମରିବା ଅବସ୍ଥା ହୋଇଯାଇଥିଲା।"