‘ଖାତା ବନ୍ଦ..’: ଖଡ଼ଗେଙ୍କ ମନ୍ତବ୍ୟର ଉତ୍ତରରେ କହିଲେ ମୋଦୀ

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘନଘନ କର୍ଣ୍ଣାଟକ ଗସ୍ତକୁ ନେଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ମନ୍ତବ୍ୟର ଉତ୍ତର ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର କହିଛନ୍ତି ଯେ ଲୋକେ ଆଜିକାଲି ଅଧିକ ସଚେତନ ହେଲେଣି। ତେଣୁ ସେମାନଙ୍କ ଖାତା ବନ୍ଦ ହୋଇଯାଇଛି। ସେଥିପାଇଁ ଖଡ଼ଗେଙ୍କ ଆଖିରେ ଯନ୍ତ୍ରଣାର ଚିହ୍ନ ସ୍ପଷ୍ଟ ଦେଖିବାକୁ ମିଳୁଛି।

ପ୍ରଧାନମନ୍ତ୍ରୀ କହିଥିଲେ- ଆପଣ (ଖଡ଼ଗେ) ମୋ ଗସ୍ତ ବିରୋଧରେ ଅଭିଯୋଗ କରିବା ପୂର୍ବରୁ ଅନୁଭବ କରିବା ଦରକାର ଯେ କର୍ଣ୍ଣାଟକରେ ୧.୭୦ କୋଟି ଜନଧନ ଖାତା ଖୋଲାଯାଇଛି ଏବଂ କେବଳ କାଲବୁର୍ଗିରେ ୮ ଲକ୍ଷ ଖାତା ଖୋଲିଛି। ଯଦି ଏତେ ଖାତା ଖୋଲିଲା ଓ ଜନତାଙ୍କ ସଶକ୍ତୀକରଣ ହେଲା ଏବଂ ତାହା ଯଦି ଆଉ କାହାର ଖାତା ବନ୍ଦ କରିଦେବାର ମାର୍ଗ ପ୍ରଶସ୍ତ କରିଦେଲା, ତେବେ ଯନ୍ତ୍ରଣା ହେବା ସ୍ବାଭାବିକ। ମୁଁ ସେମାନଙ୍କ ଯନ୍ତ୍ରଣା ବୁଝିପାରୁଛି ବୋଲି ମୋଦୀ କହିଥିଲେ। ରାଜ୍ୟସଭାରେ ରାଷ୍ଟ୍ରପତିଙ୍କ ଭାଷଣର ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ଅବସରରେ ମୋଦୀ ଏହା କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ତାଙ୍କ (ଖଡ଼ଗେଙ୍କ) ନିଜ ଲୋକମାନେ ତାଙ୍କୁ ତଳକୁ ଟାଣୁଛନ୍ତି ଓ ତାଙ୍କ ଖାତା ବନ୍ଦ କରିଦେଇଛନ୍ତି। ସେ ଆସି ଏଠି (ପାର୍ଲାମେଣ୍ଟରେ) କାନ୍ଦୁଛନ୍ତି।