ଭାରତ ଯୋଡ଼ ଯାତ୍ରାରେ ରାହୁଲଙ୍କ ସହ ସାମିଲ ହେଲେ ଆଦିତ୍ୟ ଠାକରେ

ମୁମ୍ବାଇ: ଶିବସେନା (ଉଦ୍ଧବ ବାଲାସାହେବ ଠାକରେ) ନେତା ତଥା ମହାରାଷ୍ଟ୍ରର ପୂର୍ବତନ ମନ୍ତ୍ରୀ ଆଦିତ୍ୟ ଠାକରେ ଆଜି ହିଙ୍ଗୋଲିର କଲାମାନୁରୀରେ କଂଗ୍ରେସର ଭାରତ ଯୋଡ ଯାତ୍ରାରେ ଯୋଗ ଦେଇଛନ୍ତି | ଆଦିତ୍ୟ ଠାକରେ ରାହୁଲ ଗାନ୍ଧୀଙ୍କ ସହ ପଦଯାତ୍ରା କରିଥିବାବେଳେ ଆଜି ଭାରତ ଯୋଡ ଯାତ୍ରା ନାନ୍ଦେଡ଼ରୁ ଆସି ହିଙ୍ଗୋଲିରେ ପହଞ୍ଚିଥିଲା। ଆଦିତ୍ୟ ସହକର୍ମୀ ଅମ୍ବାଦାସ ଦାନଭେ ଏବଂ ପୂର୍ବତନ ବିଧାୟକ ସଚିନ ଅହିରଙ୍କ ସହ ଯୋଗ ଦେଇଥିଲେ। ଆଜି ଯାତ୍ରାର ୬୫ତମ ଦିନ ଥିବାବେଳେ ଗୁରୁବାର ଦିନ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ନେତ୍ରୀ ସୁପ୍ରିୟା ସୁଲେ ଏବଂ ଜିତେନ୍ଦ୍ର ଆହାଦ ଏହି ଯାତ୍ରାରେ ଭାଗ ନେଇଥିଲେ।

ଗତକାଲି ରାଜ୍ୟ ଏନ୍‌ସିପି ମୁଖ୍ୟ ଜୟନ୍ତ ପାଟିଲ, ବାରମତି ସାଂସଦ ସୁପ୍ରିୟା ସୁଲେ ଏବଂ ଦଳୀୟ ନେତା ଜିତେନ୍ଦ୍ର ଆହାଦ ରାହୁଲଙ୍କ ସହ ଭାରତ ଯୋଡ଼ ଯାତ୍ରା‌ରେ ଯୋଗ ଦେଇଥିଲେ । ରାହୁଲ ଯାତ୍ରା ସମୟରେ ବିଭିନ୍ନ ସ୍ଥାନରେ ଅଟକି ଲୋକଙ୍କ ସହ କଥା ହୋଇଥିଲେ । ସୂଚନା ଥାଉ କି କଂଗ୍ରେସର ଭାରତ ଯୋଡ ଯାତ୍ରା ତାମିଲନାଡୁର କନ୍ୟାକୁମାରୀରୁ ୭ ସେପ୍ଟେମ୍ବରରେ ଆରମ୍ଭ ହୋଇଥିଲା। ତାମିଲନାଡୁ ପରେ ଏହି ପଦଯାତ୍ରା କେରଳ, କର୍ଣ୍ଣାଟକ, ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନା ଦେଇ ମହାରାଷ୍ଟ୍ରରେ ପହଞ୍ଚିଛି। ମହାରାଷ୍ଟ୍ରରେ ଏହି ଯାତ୍ରା ୧୫ଟି ବିଧାନସଭା ଏବଂ ୬ଟି ସଂସଦୀୟ ନିର୍ବାଚନମଣ୍ଡଳୀ ଦେଇ ଗତି କରିବ। ଏହି ସମୟରେ ୩୮୨ କିଲୋମିଟର ଦୂରତା ଅତିକ୍ରମ କରିବ | ଏହି ଯାତ୍ରା ନଭେମ୍ବର ୨୦ରେ ମଧ୍ୟପ୍ରଦେଶରେ ପ୍ରବେଶ କରିବ |