ମୁମ୍ବାଇ:  ମହାରାଷ୍ଟ୍ର ବିଧାନସଭାର ମୌସୁମୀ ଅଧିବେଶନ  ବେଶ୍ ସରଗରମ ହେବାରେ ଲାଗିଛି। ବିରୋଧୀ ଦଳ ନେତା ଆଦିତ୍ୟ ଠାକରେ ସିଧାସଳଖ ଶାସକ ଦଳକୁ "ଚଡ଼ି-ଗଞ୍ଜି ଗ୍ୟାଙ୍ଗ୍" ବୋଲି କହି କଟାକ୍ଷ କରିଛନ୍ତି। ଆଦିତ୍ୟ ଠାକରେ ଏହି ପରିହାସ କରିବା ମାତ୍ରେ ସିନ୍ଦେ ଗୋଷ୍ଠୀରେ ବସିଥିବା ବିଧାୟକମାନେ  କ୍ରୋଧିତ ହୋଇଛନ୍ତି। ଏହାକୁ ନେଇ କଡ଼ା ପ୍ରତିକ୍ରିୟା ନୀଲେଶ ରାଣେ ଦେଇଛନ୍ତି। ସେ ଆଦିତ୍ୟଙ୍କୁ ଚ୍ୟାଲେଞ୍ଜ କରି କହିଛନ୍ତି, ଯଦି ତୁମର ସାହସ ଅଛି, ତେବେ ନାମ ନେଇ କୁହ! ଯଦି ତୁମେ ଭୟ କରୁଛ, ତେବେ ଏପରି ଭାଷା ବ୍ୟବହାର କର ନାହିଁ!।

Advertisment

ଆଦିତ୍ୟ ଠାକରେ ତାଙ୍କ ଭାଷଣରେ କହିଥିଲେ, ଏହା ଆଇନ ଶୃଙ୍ଖଳାର ପ୍ରଶ୍ନ। ମୁଁ ମୁଖ୍ୟମନ୍ତ୍ରୀଙ୍କ ଠାରୁ ସହାନୁଭୂତି ଆଶା କରେ।  ତାଙ୍କୁ ମେଣ୍ଟର ଧର୍ମ ପାଳନ କରିବାକୁ ପଡୁଛି। ସେଥିପାଇଁ ମୁଁ ତାଙ୍କୁ ଅଭିନନ୍ଦନ ଜଣାଉଛି ଯେ, ତାଙ୍କ ସହିତ ବସିଥିବା ଲୋକମାନେ 'ଚଡ଼ି-ଗଞ୍ଜି ଗ୍ୟାଙ୍ଗ୍'ର ସଦସ୍ୟ। ସେମାନେ ଯେକୌଣସି ସ୍ଥାନକୁ ଯାଇ ଅନ୍ୟ ସହ ଲଢ଼ନ୍ତି ଏବଂ ମାରପିଟ୍ କରନ୍ତି। କିନ୍ତୁ ସେମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଏ ନାହିଁ। 

ଆଦିତ୍ୟ ସୋମବାର ଦିନ ଏହି କଟାକ୍ଷ କରି ଶାସକ ଦଳ ସଦସ୍ୟଙ୍କୁ କ୍ରୋଧିତ କରିଦେଇଥିଲେ।  ତେବେ ଆଦିତ୍ୟ ଠାକରେଙ୍କ ଏହି କଟାକ୍ଷ ପରୋକ୍ଷରେ ସିନ୍ଦେ ଗୋଷ୍ଠୀର ବିଧାୟକ ସଞ୍ଜୟ ଗାୟକୱାଡଙ୍କ ଉପରେ ଥିଲା। ଯାହାଙ୍କ ଉପରେ ବିଧାୟକ ବାସଭବନରେ ଜଣେ ବନିଆନ ପିନ୍ଧା କର୍ମଚାରୀଙ୍କୁ ଆକ୍ରମଣ କରିବାର ଅଭିଯୋଗ ଅଛି ।  ଏହି ଘଟଣାରେ କଟାକ୍ଷ କରି ଆଦିତ୍ୟ କହିଥିଲେ, ଏହି ଲୋକମାନେ 'ଚଡ଼ି-ଗଞ୍ଜି ଗ୍ୟାଙ୍ଗ୍' ଯେଉଁମାନେ ଯେକୌଣସି ସ୍ଥାନକୁ ଯାଇ ଆପତ୍ତିଜନକ କାର୍ଯ୍ୟ କରିଥାନ୍ତି!। ଏନେଇ  ନୀଲେଶ ରାଣେ ପ୍ରଶ୍ନ ପଚାରିଥିଲେ କିଏ ଏଥି ପାଇଁ ଦାୟୀ ତାହା ସ୍ପଷ୍ଟ ଭାବରେ କୁହନ୍ତୁ।

ଏହି ମନ୍ତବ୍ୟରେ କ୍ରୋଧିତ ହୋଇ ନିଲେଶ ରାଣେ ନିଜ ଆସନରୁ ଉଠି  ପ୍ରଶ୍ନ କରିଥିଲେ, ମୋତେ ସ୍ପଷ୍ଟ ଭାବରେ କୁହନ୍ତୁ ଯେ, ଏହି ଶବ୍ଦଗୁଡ଼ିକ କାହା ପାଇଁ  ଉଦ୍ଦିଷ୍ଟ  ଥିଲା। ଚଡ଼ି କିଏ, ଗଞ୍ଜି କିଏ? ଯଦି ଆପଣଙ୍କର ନାମ ନେବାର ସାହସ ନାହିଁ, ତେବେ ଏପରି ଭାଷା ବ୍ୟବହାର କରନ୍ତୁ ନାହିଁ। ଆମେ ଗୋଟିଏ ଘଣ୍ଟା ଧରି ଆପଣଙ୍କ  ଭାଷଣ ଶୁଣୁଛୁ।  ଆମେ ଚୁପ୍ ଥିଲୁ। କିନ୍ତୁ ଏବେ ଏହାକୁ ଆଉ ବରଦାସ୍ତ କରାଯିବ ନାହିଁ। ଏହି ଶବ୍ଦଗୁଡ଼ିକୁ ଗୃହର କାର୍ଯ୍ୟଧାରାରୁ ହଟାଯାଉ।

ଅଧିକ ପଢ଼ନ୍ତୁ: ହନି ଟ୍ରାପ୍‌ର ମାୟା: ୭୨ରୁ ଅଧିକ ସରକାରୀ ବାବୁ-ମନ୍ତ୍ରୀ ସାମିଲ

ରାଣେଙ୍କ ଏଭଳିପ୍ରଶ୍ନ  ଗୃହରେ ନୀରବତା ସୃଷ୍ଟି କରିଥିଲା ଏବଂ ଶାସକ ଦଳ ସର୍ବସମ୍ମତ ଭାବରେ ଆଦିତ୍ୟ ଠାକରେଙ୍କ ଶବ୍ଦକୁ ବିରୋଧ କରିଥିଲା। ଶାସକ ଦଳର ଅନେକ ବିଧାୟକ ଗୃହର କାର୍ଯ୍ୟଧାରାରୁ "ଚଡ଼ି-ଗଞ୍ଜି ଗ୍ୟାଙ୍ଗ୍" ଭଳି ଅପମାନଜନକ ଶବ୍ଦଗୁଡ଼ିକୁ ହଟାଇବା ପାଇଁ ବାଚସ୍ପତିଙ୍କୁ ଅନୁରୋଧ କରିଥିଲେ। ସେମାନେ ଅଭିଯୋଗ କରିଥିଲେ ଯେ, ବିରୋଧୀ କେବଳ ବ୍ୟକ୍ତିଗତ ଆକ୍ରମଣ କରୁଛନ୍ତି ଏବଂ ପ୍ରସଙ୍ଗଗୁଡ଼ିକରୁ ଦୂରେଇ ଯାଉଛନ୍ତି।

ସମଗ୍ର ଘଟଣା ସମୟରେ ବିଧାନସଭାର ପରିବେଶ ବେଶ୍ ସରଗରମ୍ ରହିଥିଲା। ବିରୋଧୀ ଦଳ ଶାସକ ଦଳକୁ ଆକ୍ଷେପ  କରୁଥିବା ବେଳେ, ଶାସକ ଦଳର ବିଧାୟକମାନେ ମଧ୍ୟ ପୂର୍ଣ୍ଣ ପ୍ରସ୍ତୁତି ସହିତ ଏହାର ପାଲଟା ଜବାବ ଦେଇଥିଲେ। ଫଳରେ ଗୃହରେ  ହଟ୍ଟଗୋଳ ହେବାରୁ ବାଚସ୍ପତିଙ୍କୁ ହସ୍ତକ୍ଷେପ କରିବାକୁ ପଡିଥିଲା। ଆଗାମୀ ଦିନରେ ଏହାକୁ ନେଇ ଶାସକ ଏବଂ ବିରୋଧୀ ଦଳ ମଧ୍ୟରେ  ବାକ୍ ଯୁଦ୍ଧ ତୀବ୍ର ହେବାର ସମ୍ଭାବନା ରହିଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ: ଏବେ ବି କଲେଜ ପଡ଼ିଆରେ ପଡ଼ିଛି ସୌମ୍ୟାଶ୍ରୀଙ୍କ ଦେହର ଝାଳ; ଲୁହ ଝରେଇ କାନ୍ଦୁଛି ଜୀବନ ନଥିବା ସିମେଣ୍ଟ୍‌ ଚେୟାର୍‌!

 aaditya-thackeray | maharastra