ଗଣତି ପୂର୍ବରୁ ୪ ରାଜ୍ୟ ପାଇଁ ପର୍ଯ୍ୟବେକ୍ଷକ ନିଯୁକ୍ତ କଲା କଂଗ୍ରେସ୍

ନୂଆଦିଲ୍ଲୀ: ଛତିଶଗଡ଼, ମଧ୍ୟପ୍ରଦେଶ, ରାଜସ୍ଥାନ ଓ ତେଲେଙ୍ଗାନା ନିର୍ବାଚନ ଫଳାଫଳ ପୂର୍ବରୁ କଂଗ୍ରେସ ବିଧାୟକ ଦଳ ବୈଠକ ପାଇଁ ପର୍ଯ୍ୟବେକ୍ଷକ ନିଯୁକ୍ତ କରିଛି। ରାଜସ୍ଥାନରେ ପର୍ଯ୍ୟବେକ୍ଷକ ଦାୟିତ୍ବ ଭୂପିନ୍ଦର ସିଂହ ହୁଡା, ମଧୁସୂଦନ ମିସ୍ତ୍ରୀ, ମୁକୁଲ ବାସନିକ ଓ ସକିଲ ଅହମ୍ମଦ ଖାନଙ୍କୁ ଦିଆଯାଇଛି। ତେଲେଙ୍ଗାନା ପାଇଁ କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡିକେ ଶିବକୁମାର, ଦୀପା ଦାସମୁନ୍ସି, ଡ. ଅଜୟ କୁମାର, କେ ମୁରଲୀଧରନ ଏବଂ କେଜେ ଜର୍ଜଙ୍କୁ ଦାୟିତ୍ୱ ଦିଆଯାଇଛି।

ଛତିଶଗଡ଼ ପାଇଁ କଂଗ୍ରେସ ଅଜୟ ମାକେନ, ରମେଶ ଚେନ୍ନିଥାଲା ଓ ପ୍ରୀତମ ସିଂହଙ୍କୁ ପର୍ଯ୍ୟବେକ୍ଷକ ଭାବେ ନିଯୁକ୍ତ କରିଛି। ମଧ୍ୟପ୍ରଦେଶ ପାଇଁ କଂଗ୍ରେସ ସାଂସଦ ଅଧୀର ରଂଜନ ଚୌଧୁରୀ, ପୃଥ୍ୱୀରାଜ ଚୌହାନ, ରାଜୀବ ଶୁକ୍ଳା ଓ ଚନ୍ଦ୍ରକାନ୍ତ ହାଣ୍ଡୋରଙ୍କୁ ଦଳ ନିଯୁକ୍ତ କରିଛି।

କ'ଣ କହିଲେ ଅଜୟ ମାକନ ?

ଅନ୍ୟପକ୍ଷରେ ରାୟପୁରରେ କଂଗ୍ରେସ ନେତା ଅଜୟ ମକାନ କହିଛନ୍ତି ଯେ ଆମେ ଜିତିବୁ। ଆସନ୍ତାକାଲି ଭୋଟ୍ ଗଣତି ହେବ। ବିଜେପି ଠାରୁ କଂଗ୍ରେସର ଅଗ୍ରଣୀ ୧୦ ପ୍ରତିଶତରୁ ଅଧିକ ରହିବ। ଏହି କାରଣରୁ ସମସ୍ତ ଏକ୍ଜିଟ୍ ପୋଲ୍ କଂଗ୍ରେସକୁ ଜିତାଇବାରେ ଲାଗିଛି।