ଖୁବଶୀଘ୍ର ଜଣାପଡ଼ିବ କେଉଁ କାରଣରୁ ହୋଇଥିଲା ବିମାନ ଦୁର୍ଘଟଣା

ନୂଆଦିଲ୍ଲୀ: ଅହମଦାବାଦରେ ହୋଇଥିବା ଦୁଃଖଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ କରୁଥିବା ଦଳ ବେସାମରିକ ବିମାନ ଚଳାଚଳ ମନ୍ତ୍ରାଳୟକୁ ଏହାର ପ୍ରାରମ୍ଭିକ ରିପୋର୍ଟ ପ୍ରଦାନ କରିଛି। 

ଜୁନ ୧୨ ତାରିଖରେ ଏୟାର ଇଣ୍ଡିଆର ଏଆଇ-୧୭୧  ବିମାନର ଭୟାବହ ଦୁର୍ଘଟଣାରେ ୨୬୦ ଜଣ ଲୋକ ପ୍ରାଣ ହରାଇଥିଲେ। ଦୁର୍ଘଟଣା ପରେ ତୁରନ୍ତ କେନ୍ଦ୍ର ସରକାର ଏକ ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଥିଲେ।

ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଅନୁଯାୟୀ, ଦୁର୍ଘଟଣାସ୍ଥଳରୁ ଉଦ୍ଧାର ହୋଇଥିବା ବ୍ଲାକ୍ ବାକ୍ସର କ୍ରାସ୍ ପ୍ରୋଟେକ୍ସନ୍ ମଡ୍ୟୁଲ୍ (ସିପିଏମ୍) ସୁରକ୍ଷିତ ଭାବରେ ବାହାର କରାଯାଇଥିଲା। ଜୁନ୍ ୨୫ ତାରିଖରେ ଏୟାରକ୍ରାଫ୍ଟ ଆକ୍ସିଡେଣ୍ଟ୍ ଇନଭେଷ୍ଟିଗେସନ୍ ବ୍ୟୁରୋର ଲ୍ୟାବରେ ଏହାର ମେମୋରୀ ମଡ୍ୟୁଲରୁ ତଥ୍ୟ ସଫଳତାର ସହ ଡାଉନଲୋଡ୍ କରାଯାଇଥିଲା।

ବ୍ଲାକ୍ ବାକ୍ସରେ ଉଡ଼ାଣ ସହିତ ଜଡିତ ବୈଷୟିକ ଏବଂ ଯୋଗାଯୋଗର ଏକ ସମ୍ପୂର୍ଣ୍ଣ ରେକର୍ଡ ରହିଛି, ଯାହା ଦୁର୍ଘଟଣାର ପ୍ରକୃତ କାରଣ ଖୋଜିବାରେ ବହୁତ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। 
ତଦନ୍ତକାରୀ ଏଜେନ୍ସିଙ୍କ ବିଶ୍ଳେଷଣ ପରେ ସ୍ପଷ୍ଟ ହୋଇଯିବ ଦୁର୍ଘଟଣାଟି ଯାନ୍ତ୍ରିକ ତ୍ରୁଟି ଯୋଗୁଁ ହୋଇଛି ନା ମାନବ ତ୍ରୁଟି ଯୋଗୁଁ ହୋଇଛି।