ସବୁ ବୋଇଂ ୭୮୭ ବିମାନର ଇନ୍ଧନ ସ୍ବିଚ୍ ଠିକ ଅଛି : ଏୟାର ଇଣ୍ଡିଆ

ମୁମ୍ବାଇ: ଏୟାର ଇଣ୍ଡିଆ ଏହାର ଫ୍ଲିଟରେ ଥିବା ସମସ୍ତ ବୋଇଂ ୭୮୭ ଏବଂ ବୋଇଂ ୭୩୭ ବିମାନର ଫୁଏଲ କଣ୍ଟ୍ରୋଲ ସ୍ୱିଚ୍ (ଏଫସିଏସ)ର ଲକିଂ ସିଷ୍ଟମର ଯାଞ୍ଚ ସମାପ୍ତ କରିଛି। କମ୍ପାନି ପକ୍ଷରୁ ମଙ୍ଗଳବାର କୁହାଯାଇଛି ଯେ ଇନ୍ଧନ ନିୟନ୍ତ୍ରଣ ସ୍ୱିଚରେ କୌଣସି ସମସ୍ୟା ମିଳିନାହିଁ। ସୁରକ୍ଷା ଦୃଷ୍ଟିକୋଣରୁ ବିମାନଗୁଡ଼ିକର ଯାଞ୍ଚ କରିବାକୁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ନିର୍ଦ୍ଦେଶ ଜାରି କରିଥିଲା। ଡିଜିସିଏଙ୍କ ନିର୍ଦ୍ଦେଶ ଅନୁଯାୟୀ ତଦନ୍ତ କରାଯାଇଥିଲା ବୋଲି ଏୟାରଲାଇନ୍ସ କହିଛି।

ଏୟାର ଇଣ୍ଡିଆ ଏକ ବିବୃତ୍ତିରେ କହିଛି, "ଏୟାର ଇଣ୍ଡିଆ ଏହାର ଫ୍ଲିଟରେ ଥିବା ସମସ୍ତ ବୋଇଂ ୭୮୭ ଏବଂ ବୋଇଂ ୭୩୭ ବିମାନର ଫୁଏଲ କଣ୍ଟ୍ରୋଲ ସ୍ୱିଚ୍ (ଏଫସିଏସ) ର ଲକିଂ ସିଷ୍ଟମର ସତର୍କତାମୂଳକ ଯାଞ୍ଚ ସମାପ୍ତ କରିଛି। ଏଥିରେ କୌଣସି ସମସ୍ୟା ମିଳିନାହିଁ।" ଗତ ମାସରେ ଅହମ୍ମଦାବାଦରେ ଏୟାର ଇଣ୍ଡିଆ ବୋଇଂ ଡ୍ରିମଲାଇନର ବିମାନ ଦୁର୍ଘଟଣା ପରେ ଏହି ଯାଞ୍ଚ ନିର୍ଦ୍ଦେଶ ଦିଆଯାଇଥିଲା, ଯେଉଁଥିରେ ୨୬୦ ଜଣ ଲୋକ ପ୍ରାଣ ହରାଇଥିଲେ।

ଏହି ଦୁର୍ଘଟଣାର ପ୍ରାଥମିକ ତଦନ୍ତରୁ ଜଣାଯାଇଛି ଯେ ଉଡ଼ାଣ ବେଳେ ଏହାର ଇନ୍ଧନ ନିୟନ୍ତ୍ରଣ ସ୍ବିଚ୍ ବନ୍ଦ ଥିଲା । ଏ ସଂପର୍କରେ ଜଣେ ପାଇଲଟ ଅନ୍ୟ ଜଣକୁ ପଚାରିଥିଲେ ବି ସେ ଏ ଏପରି କରିନାହାନ୍ତି ବୋଲି କହିଥିଲେ ।