ମାତ୍ର ୩ ବର୍ଷ ପାଇଁ ଚାକିରି କରିପାରିବେ ଉତ୍ତରପ୍ରଦେଶର ପୁଲିସ: ଅଖିଳେଶ

ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ସମାଜବାଦୀ ପାର୍ଟି ଜାତୀୟ ଅଧ୍ୟକ୍ଷ ଅଖିଳେଶ ଯାଦବ ଏଟାରେ ଏକ ସାଧାରଣ ସଭାକୁ ସମ୍ବୋଧିତ କରିଥିଲେ। ଏହି ସମୟ ମଧ୍ୟରେ ଏସପି ମୁଖ୍ୟ ଅଖିଳେଶ ଯାଦବ ଏଟାରୁ ଏସପି ପ୍ରାର୍ଥୀ ଦେବେଶ ଶାକ୍ୟଙ୍କ ପାଇଁ ଭୋଟ୍ ମାଗିଥିଲେ। ସଭାକୁ ସମ୍ବୋଧନ କରି ଅଖିଳେଶ ଯାଦବ କହିଛନ୍ତି, "ଖାକି ୟୁନିଫର୍ମରେ ଥିବା ଏହି ଲୋକମାନେ(ପୁଲିସ) ଭାବନ୍ତି ଯେ ସେମାନଙ୍କର ଚାକିରି ସ୍ଥାୟୀ କିନ୍ତୁ ସେମାନେ ଜାଣନ୍ତି ନାହିଁ ଯେ ଯଦି ଏହି ବିଜେପି ଲୋକମାନେ କେନ୍ଦ୍ରରେ ପୁଣି କ୍ଷମତାକୁ ଆସନ୍ତି, ତେବେ ସେମାନଙ୍କର ଚାକିରି ମଧ୍ୟ ୩ ବର୍ଷ କରିଦିଆଯିବ | କିଏ ଜାଣିଥିଲା କି ସେନାର ଯବାନମାନଙ୍କ ଚାକିରି ମାତ୍ର ଚାରି ବର୍ଷର ହେବ |

ଏପରି କହି ଅଖିଳେଶ କେନ୍ଦ୍ରର ଅଗ୍ନିବୀର ଯୋଜନାକୁ ଟାର୍ଗେଟ କରିଥିଲେ | ଏହି ସମୟରେ ଏସପି ମୁଖ୍ୟ ଅଖିଳେଶ ଯାଦବ କହିଛନ୍ତି, "ନିର୍ବାଚନ ବଣ୍ଡ ବିଜେପିର ବ୍ୟାଣ୍ଡ ବଜାଇଦେଇଛି। ଭାରତୀୟ ଜନତା ପାର୍ଟି ଦ୍ୱାରା ନିର୍ବାଚନୀ ବଣ୍ଡ ମାଧ୍ୟମରେ ଚାନ୍ଦା ଆଦାୟ କରାଯାଉଛି ଓ ଏହାର ଫଳ ଦେଶର ସାଧାରଣ ଜନତା ଭୋଗୁଛନ୍ତି | ଦେଶର ସାଧାରଣ ଜନତା ଯେଉଁ ଦରବୃଦ୍ଧିର କଷ୍ଟ ଭୋଗୁଛନ୍ତି, ଏହାରି ପଛରେ ନିର୍ବାଚନୀ ବଣ୍ଡ ହିଁ ରହିଛି | ଯେତେ ବି ଦୁର୍ନୀତିଗ୍ରସ୍ତ, ଅପରାଧୀ ଥିଲେ ଭାରତୀୟ ଜନତା ପାର୍ଟି ସମସ୍ତଙ୍କୁ କୋଳେଇ ନେଇଛି। ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ କହିଛନ୍ତି -" ଯେଉଁମାନେ ବଡ଼ ସ୍ୱପ୍ନ ଦେଖାଉଥିଲେ, ଯେଉଁମାନେ କହୁଥିଲେ ଯେ ଚପଲ ପିନ୍ଧୁଥିବା ଲୋକ ବିମାନରେ ଉଡ଼ିବେ, ଏବେ ସମସ୍ତ କାରଖାନା ବିକ୍ରି ହୋଇଛି କି ନାହିଁ ମୋତେ କୁହନ୍ତୁ।