ଭିଡିଓ କଲରେ ତେଜ ପ୍ରତାପଙ୍କୁ ନିର୍ବାଚନ ଲଢ଼ିବା ପ୍ରସଙ୍ଗରେ ପ୍ରଶ୍ନ କଲେ ଅଖି‌ଳେଶ

ନୂଆଦିଲ୍ଲୀ: ଗୁରୁବାର ବିହାରର ପୂର୍ବତନ ମନ୍ତ୍ରୀ ତେଜ ପ୍ରତାପ ଯାଦବ ଭିଡିଓ କଲରେ ସମାଜବାଦୀ ପାର୍ଟି ମୁଖ୍ୟ ତଥା ପୂର୍ବତନ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଅଖିଳେଶ ଯାଦବଙ୍କ ସହ କଥା ହୋଇଛନ୍ତି।

କଥା ହେବା ସମୟରେ ଉଭୟ ନେତା ଆଗାମୀ ନିର୍ବାଚନ, ବିହାର ରାଜନୀତି ଏବଂ ପାରସ୍ପରିକ ସମ୍ପର୍କ ବିଷୟରେ ଆଲୋଚନା କରିଥିଲେ। ତେଜ ପ୍ରତାପ ନିଜେ ତାଙ୍କ ଇନଷ୍ଟାଗ୍ରାମରେ ଏହି ବାର୍ତ୍ତାଳାପର  ଏକ ଭିଡିଓ ସେୟାର କରିଛନ୍ତି।

ଭିଡିଓ କଲ୍ ସମୟରେ ଅଖିଳେଶ ଯାଦବ ତେଜ ପ୍ରତାପଙ୍କୁ ପଚାରିଥିଲେ, 'ଆପଣ କେଉଁଠାରୁ ବିଧାନସଭା ନିର୍ବାଚନ ଲଢ଼ୁଛନ୍ତି?' 

ଏହାର ଉତ୍ତର ଦେଇ ତେଜ ପ୍ରତାପ କହିଥିଲେ, 'ମୁଁ ନିର୍ବାଚନ ପୂର୍ବରୁ ଲକ୍ଷ୍ନୌ ଯାଇ ଆପଣଙ୍କୁ ଭେଟିବି। ଲକ୍ଷ୍ନୌ ଯିବା ପୂର୍ବରୁ ମୁଁ ଗୋଟିଏ କିମ୍ବା ଦୁଇ ଦିନ ପୂର୍ବରୁ ଫୋନ୍ କରି ଜଣାଇବି।’

ତେଜ ପ୍ରତାପ ଇନଷ୍ଟାଗ୍ରାମରେ ଅଖିଳେଶଙ୍କ ସହ କଥାବାର୍ତ୍ତାର ଭିଡିଓ ସେୟାର କରି ଲେଖିଛନ୍ତି, "ଅଖିଳେଶ ଯାଦବ ମୋ ପରିବାରର ସବୁଠାରୁ ପ୍ରିୟ ଲୋକଙ୍କ ମଧ୍ୟରୁ ଜଣେ। ତାଙ୍କର ଫୋନ୍ ମୋତେ ଅନୁଭବ କରାଏ ଯେ ମୁଁ ମୋର ରାଜନୈତିକ ଲଢ଼େଇରେ ଏକା ନୁହେଁ।" 

ସମ୍ପ୍ରତି, ତେଜ ପ୍ରତାପ ଯାଦବ ଏକ ବିବାଦୀୟ ଫଟୋ ପାଇଁ ଚର୍ଚ୍ଚାକୁ ଆସିଥିଲେ, ଯେଉଁଥିରେ ତାଙ୍କୁ ଜଣେ ମହିଳାଙ୍କ ସହିତ ଦେଖିବାକୁ ମିଳିଥିଲା। 

ଏହି ଫଟୋ ଭାଇରାଲ ହେବା ପରେ ବାପା ଲାଲୁ ପ୍ରସାଦ ଯାଦବ ଇନଷ୍ଟାଗ୍ରାମରେ ଏକ ପୋଷ୍ଟ କରି ସୂଚନା ଦେଇ କହିଥିଲେ, 'ବଡ଼ ପୁଅର କାର୍ଯ୍ୟକଳାପ ଆଦୌ ଗ୍ରହଣୀୟ ନୁହେଁ। ତାଙ୍କ ଆଚରଣ ଏବଂ ଦାୟିତ୍ୱହୀନ ଆଚରଣ ଯୋଗୁଁ ମୁଁ ତାଙ୍କୁ ଦଳରୁ ୬ବର୍ଷ ପାଇଁ ଏବଂ ପରିବାରରୁ ବାହାର କରୁଛି।'