ସ୍ବାମୀଙ୍କୁ ଚିକିତ୍ସା ପାଇଁ ନେଉଥିବା ବେଳେ ଦୁର୍ଘଟଣା; ଘଟଣାସ୍ଥଳରେ ଦମ୍ପତିଙ୍କ ମୃତ୍ୟୁ

ନୂଆଦିଲ୍ଲୀ: କେରଳର କୋଲ୍ଲମରେ ଏକ ଭୟାବହ ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ବୃଦ୍ଧ ଦମ୍ପତିଙ୍କ ମୃତ୍ୟୁ ହୋଇଥିବା ବେଳେ ୭ଜଣ ଆହତ ହୋଇଥିବାର ଦୁଃଖଦ ଘଟଣା ସାମ୍ନାକୁ ଆସିଛି। ମୃତ ଦମ୍ପତିଙ୍କ ନାମ ଥମ୍ପି ଓ ଶ୍ୟାମଲା ଥିବା ଜଣାପଡ଼ିଛି। 

ସୂଚନାଯୋଗ୍ୟ, ବୃଦ୍ଧ ଥମ୍ପିଙ୍କୁ ଅସୁସ୍ଥତା ହେତୁ ଅଡ୍ଡୁର ଜେନେରାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ଉନ୍ନତ ଚିକିତ୍ସା ପାଇଁ ତାଙ୍କୁ  ତିରୁବନନ୍ତପୁରମ ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା। 

ସ୍ତ୍ରୀ ଓ ଝିଅ ମିଶି ଥମ୍ପିଙ୍କୁ ଆମ୍ବୁଲାନ୍ସ ଯୋଗେ ହସ୍ପିଟାଲ ନେଉଥିବା ବେଳେ  ବିଳମ୍ବିତ ରାତିରେ କୋଟ୍ଟାରାକ୍କାରାର ଏମସି ରୋଡସ୍ଥିତ ସଦାନନ୍ଦପୁରମ ନିକଟରେ ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ଥମ୍ପିଙ୍କ ସମେତ ତାଙ୍କ ସ୍ତ୍ରୀ ଶ୍ୟାମଲାଙ୍କ ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। 

ଦୁର୍ଘଟଣାଗସ୍ତ ଆମ୍ବୁଲାନ୍ସରେ ବୃଦ୍ଧ ଦମ୍ପତିଙ୍କ ଝିଅ ସମେତ ୫ଜଣ ସଦସ୍ୟ ଥିଲେ। ମୃତକଙ୍କୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ଦିଆଯାଇଥିବା ବେଳେ ଆହତଙ୍କୁ ତିରୁବନନ୍ତପୁରମ ମେଡିକାଲ କଲେଜରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।