ଚୀନ୍‌ର ଅର୍ଥନୀତିକୁ ବିପର୍ଯ୍ୟସ୍ତ କରିବା ପାଇଁ ଭିଏତନାମ ଉପରେ ଚାପ ପକାଇଲା ଆମେରିକା!: ଚିନ୍ତାରେ ଆପଲ-ଗୁଗୁଲ-ସାମସଙ୍ଗ

ହନୋଇ: ଚୀନ୍‌ର ପ୍ରଯୁକ୍ତିବିଦ୍ୟା ଯୋଗାଣ ଶୃଙ୍ଖଳାକୁ ଭାଙ୍ଗିବା ପାଇଁ ଆମେରିକା ଆଉ ଏକ ଯୋଜନା କରିଛି। ରଏଟର୍ସ ରିପୋର୍ଟ ଅନୁଯାୟୀ, ଆମେରିକା ଭିଏତନାମକୁ ଚୀନ୍‌ରେ ନିର୍ମିତ ହାର୍ଡୱେୟାର ଏବଂ ପାର୍ଟସର ବ୍ୟବହାର ହ୍ରାସ କରିବାକୁ କହିଛି। ବିଶେଷକରି ଆମେରିକାକୁ ରପ୍ତାନି ହେଉଥିବା ଡିଭାଇସଗୁଡ଼ିକ ପାଇଁ ଏହା କୁହାଯାଇଛି।

ଭିଏତନାମ ବର୍ତ୍ତମାନ ଆପଲ୍, ସାମସଙ୍ଗ, ଗୁଗୁଲ୍ ଏବଂ ମେଟା ଭଳି ବଡ଼ ଟେକ୍ କମ୍ପାନୀଗୁଡ଼ିକର ଉତ୍ପାଦନର କେନ୍ଦ୍ର । ଏହି କମ୍ପାନିଗୁଡ଼ିକ ଭିଏତନାମରେ ନିର୍ମିତ ସ୍ମାର୍ଟଫୋନ୍, ଭିଏଆର୍ ହେଡସେଟ୍ ଭଳି ଗ୍ୟାଜେଟ୍ ପାଉଛନ୍ତି। 

କିନ୍ତୁ ଚୀନ୍‌ରୁ ଆସୁଥିବା ପାର୍ଟସର ବ୍ୟବହାର ସେମାନଙ୍କର ଯନ୍ତ୍ରାଶଂ ଆସେମ୍ବଲିଂରେ ଅଧିକ ହୋଇଥାଏ। ଏହି ପରିସ୍ଥିତିକୁ ଦୃଷ୍ଟିରେ ରଖି, ଭିଏତନାମ ସରକାର ସ୍ଥାନୀୟ କମ୍ପାନିଗୁଡ଼ିକ ସହିତ ଏକ ବୈଠକ କରିଛନ୍ତି, ଯାହା ଦ୍ୱାରା ଭିଏତନାମ ପାର୍ଟସର ବ୍ୟବହାର ବୃଦ୍ଧି କରାଯାଇପାରିବ। କମ୍ପାନିଗୁଡ଼ିକ ମଧ୍ୟ ଏଥିରେ ଆଗ୍ରହ ଦେଖାଇଛନ୍ତି। କିନ୍ତୁ ଏହା କରିବା ପାଇଁ ସମୟ ଏବଂ ଉନ୍ନତ ଟେକ୍ନୋଲୋଜି ଆବଶ୍ୟକ ହେବ।

ଚୀନ୍ ଉପରେ ନିର୍ଭରଶୀଳତା ହ୍ରାସ କରିବା ଲକ୍ଷ୍ୟରେ, ଆମେରିକା ଭିଏତନାମକୁ ଚେତାବନୀ ଦେଇଛି ଯେ, ଯଦି ଚୀନ୍ ହାଇ-ଟେକ୍ ଉପାଦାନଗୁଡ଼ିକର ବ୍ୟବହାର ହ୍ରାସ ନ କରାଯାଏ, ତେବେ ଆମେରିକା ନିଜର ଟେକ୍ ଉତ୍ପାଦଗୁଡ଼ିକ ଉପରେ ୪୬% ପର୍ଯ୍ୟନ୍ତ ଆମଦାନୀ ଶୁଳ୍କ ଲଗାଇପାରେ।

ଯଦି ଏହା ହୁଏ, ତେବେ ଭିଏତନାମର ଅର୍ଥନୀତିକୁ ଏକ ବଡ଼ ଝଟକା ଲାଗିବ। ରିପୋର୍ଟ ଅନୁଯାୟୀ, ଆମେରିକା ଚାହୁଁଛି ଯେ, ଭିଏତନାମ ନିଜର ଯୋଗାଣ ଶୃଙ୍ଖଳାକୁ ପୁନଃନିର୍ମାଣ କରୁ ଏବଂ ଚୀନ୍ରୁ ହାଇ-ଟେକ୍ ଉପାଦାନଗୁଡ଼ିକର ବ୍ୟବହାର ହ୍ରାସ କରୁ। 

ଆମେରିକା ଭିଏତନାମରେ ସେମାନଙ୍କର ଉତ୍ପାଦଗୁଡ଼ିକ ଉତ୍ପାଦନ କରୁଥିବା ଆମେରିକୀୟ କମ୍ପାନିଗୁଡ଼ିକୁ ଚୀନ୍ ପ୍ରଯୁକ୍ତିବିଦ୍ୟାଠାରୁ ଦୂରେଇ ରଖିବାକୁ ଚେଷ୍ଟା କରୁଛି, ଏବଂ ସେହି ସମୟରେ ଭିଏତନାମର ଶିଳ୍ପ କ୍ଷମତାକୁ ମଜବୁତ କରୁଛି। ଏହି ସମୟରେ, ଆମେରିକା ଏଥିପାଇଁ ୮ ଜୁଲାଇ ପର୍ଯ୍ୟନ୍ତ ଏକ ସମୟସୀମା ମଧ୍ୟ ଧାର୍ଯ୍ୟ କରିଛି।

ଭିଏତନାମ ତଥ୍ୟ ଅନୁଯାୟୀ, ଗତ ବର୍ଷ ଚୀନ୍ ଭିଏତନାମକୁ ୪୪ ବିଲିୟନ ଡଲାର ମୂଲ୍ୟର ଟେକ୍ନୋଲୋଜି ଉତ୍ପାଦ ରପ୍ତାନି କରିଥିଲା, ଯାହା ଭିଏତନାମକୁ ଚୀନର ମୋଟ ରପ୍ତାନିର ୩୦% ଅଟେ। ଭିଏତନାମ ଆମେରିକାକୁ  ୩୩ ବିଲିୟନ ଡଲାର ମୂଲ୍ୟର ଟେକ୍ନୋଲୋଜି ଉତ୍ପାଦ ରପ୍ତାନି କରିଥିଲା।

ଅଧିକ ପଢ଼ନ୍ତୁ: ପାକିସ୍ତାନରେ ସିନ୍ଧୁ ଜଳ ପ୍ରବାହ କମିଲା: ଖରିଫ ଚାଷ ବନ୍ଦ, ସିନ୍ଧ୍-ପଞ୍ଜାବରେ ହାହାକାର

ଆମେରିକାର ଏହି ଚାପ ପରେ, ଭିଏତନାମ ସରକାରଙ୍କ ସହିତ ଆପଲ୍, ସାମସଙ୍ଗ ଏବଂ ଗୁଗୁଲ୍ ଭଳି ବଡ଼ ବଡ଼ ଟେକ୍ କମ୍ପାନିଗୁଡ଼ିକ ସବୁଠାରୁ ଅଧିକ ଚିନ୍ତିତ ହୋଇପଡ଼ିଛନ୍ତି। ଏହି କମ୍ପାନିଗୁଡ଼ିକର ବିଦ୍ୟମାନ ଉତ୍ପାଦ ସହିତ ନିକଟ ଭବିଷ୍ୟତରେ ଲଞ୍ଚ୍ ହେବାକୁ ଥିବା ଉତ୍ପାଦଗୁଡ଼ିକ ମଧ୍ୟ ଭିଏତନାମରେ ତିଆରି ହେବାର ଯୋଜନା ପୂର୍ବରୁ ରହିଛି। ଏପରି ପରିସ୍ଥିତିରେ, ଯଦି ଭିଏତନାମ ହଠାତ୍ ଆମେରିକାର ଚାପରେ ନିଜର ଯୋଗାଣ ଶୃଙ୍ଖଳା ପରିବର୍ତ୍ତନ କରିବା ଆରମ୍ଭ କରେ, ତେବେ ସ୍ପଷ୍ଟ ଭାବରେ ଏହି ବଡ଼ ଟେକ୍ କମ୍ପାନିଗୁଡ଼ିକର ଲଞ୍ଚ୍ ବିଳମ୍ବିତ ହୋଇପାରେ।

ଭିଏତନାମ ଚୀନ୍ ପାର୍ଟସର ବ୍ୟବହାର ହ୍ରାସ କରିବାକୁ ଇଚ୍ଛା ପ୍ରକାଶ କରିଛି କିନ୍ତୁ ରାତାରାତି ଏପରି କିଛି ହୋଇପାରିବ ନାହିଁ। ଯଦି ଚାପ ସୃଷ୍ଟି କରି ଏହା କରାଯାଏ, ତେବେ ଭିଏତନାମ ଏବଂ ଆମେରିକୀୟ ଟେକ୍ କମ୍ପାନି ଉଭୟ କ୍ଷତି ସହିବେ ବୋଲି ଟେକ୍ ବିଶେଷଜ୍ଞ ମତପୋଷଣ କରିଛନ୍ତି।

ଅଧିକ ପଢ଼ନ୍ତୁ: ‘ମହିଳାଙ୍କ ଉପରେ ବଢୁଥିବା ନିର୍ଯାତନାକୁ ରୋକିବା ଦିଗରେ ସରକାର ସଜାଗ ହୁଅନ୍ତୁ’

USA | Vietnam | China