ଅବସର ନେବେ କି ପ୍ରଧାନମନ୍ତ୍ରୀ: ଯୋଗୀ ଧରିବେ କି ଦେଶର ମଙ୍ଗ?

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମ୍ଭାବ୍ୟ ଅବସର ନେଇ କଳ୍ପନାଜଳ୍ପନା ଚାଲିଥିବା ବେଳେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଙ୍ଗଳବାର ତାଙ୍କର ରାଜନୈତିକ ମହତ୍ତ୍ୱାକାଂକ୍ଷା ବିଷୟରେ ମୁହଁ ଖୋଲିଛନ୍ତି।

ଭବିଷ୍ୟତର ପ୍ରଧାନମନ୍ତ୍ରୀ ଭାବରେ ତାଙ୍କୁ ସମର୍ଥନ କରିବା ପାଇଁ ଜନସାଧାରଣଙ୍କ ଭାବନା ସମ୍ପର୍କରେ ଏକ ପ୍ରଶ୍ନର ଉତ୍ତରରେ, ଆଦିତ୍ୟନାଥ ଗଣମାଧ୍ୟମ ସଂସ୍ଥା ପିଟିଆଇକୁ କହିଛନ୍ତି ଯେ ସେ ରାଜନୀତିକୁ ତାଙ୍କର ପୂର୍ଣ୍ଣକାଳୀନ ଚାକିରି ବୋଲି ବିବେଚନା କରନ୍ତି ନାହିଁ।

ଯୋଗୀ କୁହନ୍ତି "ଦେଖ, ମୁଁ ରାଜ୍ୟର ମୁଖ୍ୟମନ୍ତ୍ରୀ। ଦଳ ମୋତେ ଉତ୍ତର ପ୍ରଦେଶର ଲୋକଙ୍କ ପାଇଁ ଏଠାରେ ରଖିଛି ଏବଂ ରାଜନୀତି ମୋ ପାଇଁ ପୂର୍ଣ୍ଣକାଳୀନ ଚାକିରି ନୁହେଁ। ବର୍ତ୍ତମାନ, ଆମେ ଏଠାରେ କାମ କରୁଛୁ। କିନ୍ତୁ ବାସ୍ତବରେ ମୁଁ ଜଣେ ଯୋଗୀ।’’

ନିଜର ଭବିଷ୍ୟତର ରାଜନୈତିକ ସମ୍ଭାବନାକୁ ସଂପର୍କରେ ସେ ଆହୁରି କହିଛନ୍ତି ଯେ, "ଯେପର୍ଯ୍ୟନ୍ତ ଆମେ ଏଠାରେ ଅଛୁ, ଆମେ କାମ କରୁଛୁ। ଏଥିପାଇଁ ମଧ୍ୟ ଏକ ସମୟ ସୀମା ରହିବ।"

ପ୍ରଧାନମନ୍ତ୍ରୀ ମୋଦୀ ନାଗପୁରରେ ଥିବା ଆରଏସଏସ ମୁଖ୍ୟାଳୟକୁ ଗସ୍ତ କରିବା ପରେ ଏହି ଚର୍ଚ୍ଚା ଜୋର୍‌ ଧରିଛି। ଶିବସେନା (ୟୁବିଟି) ନେତା ସଞ୍ଜୟ ରାଉତ ଦାବି କରିଛନ୍ତି ଯେ ବିଜେପିର ଆଦର୍ଶଗତ ପରାମର୍ଶଦାତା ଆରଏସଏସ ଚାହୁଁଛି ଯେ ପ୍ରଧାନମନ୍ତ୍ରୀ ମୋଦୀ ସେପ୍ଟେମ୍ବର ସୁଦ୍ଧା ପଦ ଛାଡି ଦିଅନ୍ତୁ ଏବଂ ନୂତନ ନେତୃତ୍ୱ ପାଇଁ ସ୍ଥାନ ଦିଅନ୍ତୁ।