ସିନ୍ଧୁ ଜଳବଣ୍ଟନ ଚୁକ୍ତି ଆଉ ପୂର୍ବଭଳି ଲାଗୁ ହେବ ନାହିଁ : ଶାହ

ନୂଆଦିଲ୍ଲୀ : ଜମ୍ମୁ ଏବଂ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ, ଭାରତ ସରକାର ସିନ୍ଧୁ ଜଳବଣ୍ଟନ ଚୁକ୍ତିକୁ ସ୍ଥଗିତ ରଖିଦେଇଥିଲେ । ଏହାକୁ ପୁଣି ଲାଗୁ କରିବାକୁ ପାକିସ୍ତାନ ସରକାର ବାରମ୍ବାର ଭାରତକୁ ଅନୁରୋଧ କରିଚାଲିଛନ୍ତି । କିନ୍ତୁ ଭାରତ ନିଜ ନିଷ୍ପତ୍ତିରେ ଅଟଳ ରହିଛି। 

କେନ୍ଦ୍ର ଗୃହମନ୍ତ୍ରୀ ଅମିତ ଶାହ ସ୍ପଷ୍ଟ କରିଛନ୍ତି ଯେ ଭାରତ ଏବଂ ପାକିସ୍ତାନ ମଧ୍ୟରେ ୧୯୬୦ ମସିହାରେ ହୋଇଥିବା ସିନ୍ଧୁ ଜଳ ଚୁକ୍ତିନାମା କେବେବି ପୂର୍ବଭଳି ଲାଗୁ ହେବ ନାହିଁ। ସେ କହିଛନ୍ତି ଯେ ପାକିସ୍ତାନର ଶାନ୍ତି ଏବଂ ବିକାଶର ଭାବନାର ନିରନ୍ତର ଉଲ୍ଲଂଘନ ଯୋଗୁଁ ଏହି ନିଷ୍ପତ୍ତି ନିଆଯାଇଛି।

ଶାହ ଏହା ମଧ୍ୟ କହିଛନ୍ତି ଯେ ସିନ୍ଧୁ ନଦୀର ପାଣି ଏବେ ପାକିସ୍ତାନକୁ ନୁହେଁ ବରଂ ରାଜସ୍ଥାନ ଭଳି ଭାରତୀୟ ରାଜ୍ୟର ଚାଷଜମିକୁ ପ୍ରବାହିତ ହେବ। ଶାହ ଏକ ସାକ୍ଷାତକାରରେ କହିଥିଲେ ଯେ ଆମେ ଚୁକ୍ତିନାମାକୁ ସ୍ଥଗିତ ରଖିଛୁ। ଏହାକୁ ଏକପାଖିଆ ଭାବରେ ବାତିଲ କରାଯାଇପାରିବ ନାହିଁ କିନ୍ତୁ ଆମର ଏହାକୁ ବନ୍ଦ କରିବାର ଅଧିକାର ଥିଲା ଏବଂ ଆମେ ତାହା କରିଛୁ। ଗୃହମନ୍ତ୍ରୀ କହିଛନ୍ତି ଯେ କେନ୍ଦ୍ର ସରକାର ରାଜସ୍ଥାନକୁ ପାଣି ଆଣିବା ପାଇଁ ଏକ ସ୍ୱତନ୍ତ୍ର କେନାଲ ପ୍ରକଳ୍ପ ଉପରେ କାମ ଆରମ୍ଭ କରିବେ ଯାହା ଦ୍ଵାରା ଭାରତ ତାର ଭାଗର ପାଣିକୁ ସମ୍ପୂର୍ଣ୍ଣ ଭାବରେ ବ୍ୟବହାର କରିପାରିବ।