ଟ୍ରମ୍ପ୍‌ଙ୍କ ପରାମର୍ଶକୁ ଏଡ଼େଇ ଯାଇ ଭାରତରେ ଆଇଫୋନ ନିର୍ମାଣ କରିବେ ଟିମ୍‌ କୁକ୍‌

ନୂଆଦିଲ୍ଲୀ: କାମ ଦେଲାନି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍‌ଙ୍କ କୁମନ୍ତ୍ରଣା। ଆପଲର ସିଇଓ ଟିମ୍ କୁକଙ୍କୁ ଭାରତରେ ଆଇଫୋନ ନିର୍ମାଣ ନକରିବାକୁ ଅନୁରୋଧ କରିବା ସତ୍ତ୍ବେ ବି ଟିମ୍‌ କୁକ୍‌ ତାଙ୍କ ନିଷ୍ପତ୍ତିରୁ ଓହରି ନାହାନ୍ତି। ସେ ଭାରତ ସହ ପୂର୍ବ ପରି ବ୍ୟବସାୟ ବଳବତ୍ତର ରଖିବେ ବେ‌ାଲି ନିଶ୍ଚିତ କରିଛନ୍ତି। 

ଆପଲ୍ ଭାରତୀୟ ସରକାରୀ ଅଧିକାରୀମାନଙ୍କୁ ଆଶ୍ୱାସନା ଦେଇଛି ଯେ ଦେଶରେ ଏହାର ଉତ୍ପାଦନ ଏବଂ ନିବେଶ ଯୋଜନା ଅପରିବର୍ତ୍ତିତ ରହିଛି।

ଗଣମାଧ୍ୟମ ସଂସ୍ଥା ପିଟିଆଇର ଏକ ରିପୋର୍ଟ ଅନୁଯାୟୀ, ଦୋହାରେ ଏକ ବ୍ୟବସାୟ ଫୋରମରେ ଟ୍ରମ୍ପଙ୍କ ମନ୍ତବ୍ୟ ପରେ ଭାରତୀୟ ଅଧିକାରୀମାନେ ଆପଲଙ୍କ ସହ ଯୋଗାଯୋଗ କରିଥିଲେ। ଯେଉଁଠାରେ ସେ ଅଧିକାରୀମାନଙ୍କୁ ବିବ୍ରତ ନହେବାକୁ କହିଛନ୍ତି। 

ଉଲ୍ଲେଖଯୋଗ୍ୟ, ଟ୍ରମ୍ପ ଆପଲର ସିଇଓ ଟିମ୍ କୁକଙ୍କ ସହ ଭାରତର ପ୍ଲାଣ୍ଟ ବିଷୟରେ କଥା ହୋଇଥିଲେ। ସେ କହିଥିଲେ, "ଟିମ୍ କୁକ୍ ସହିତ ମୋର ଏକ ଛୋଟ ସମସ୍ୟା ଅଛି। ସେମାନେ ଭାରତରେ ଆଇଫୋନ୍ ତିଆରି କରିବାକୁ ଚାହାଁନ୍ତି ଏବଂ ମୁଁ ତାହା ଚାହେଁ ନାହିଁ। ଆପଲ୍ କେବଳ ଆମେରିକାରେ ଏହାର ଫୋନ୍ ତିଆରି କରିବା ଉଚିତ।" ଟ୍ରମ୍ପ କହିଛନ୍ତି ଯେ ଭାରତରେ କିଛି ବିକ୍ରୟ କରିବା ବହୁତ କଷ୍ଟକର। ଭାରତ ନିଜ କଥା ନିଜେ ବୁଝିବାକୁ ସକ୍ଷମ । 

ଟ୍ରମ୍ପ ବର୍ତ୍ତମାନ କତର ଗସ୍ତରେ ଅଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଭାରତ ବିଷୟରେ ଏକ ବଡ଼ ଦାବି କରିଛନ୍ତି। ଟ୍ରମ୍ପ କହିଛନ୍ତି ଯେ ଭାରତ ଆମେରିକାକୁ ଏକ ଶୂନ ଶୁଳ୍କ ବାଣିଜ୍ୟ ଚୁକ୍ତି ପ୍ରଦାନ କରିଛି। ଏବେ ଟ୍ରମ୍ପ ଭାରତର ବାଣିଜ୍ୟ ଉପରେ ନଜର ପକାଇଛନ୍ତି। ସେ ଆପଲର ସିଇଓ ଟିମ୍ କୁକଙ୍କୁ ଭାରତରେ ଆଇଫୋନ ନିର୍ମାଣ ନକରିବାକୁ ଅନୁରୋଧ କରିଛନ୍ତି।