ଆତଙ୍କବାଦୀଙ୍କୁ ଦମନ ପାଇଁ ସେନା ଅପରେସନ୍‌ରେ କୌଣସି ପ୍ରକାରର ରାଜନୈତିକ ହସ୍ତକ୍ଷେପ ରହିବ ନାହିଁ: ସେନାମୁଖ୍ୟ ଜେନେରାଲ ବିପିନ୍‌ ରାଓ୍ଵତ୍‌ 

ନୂଆଦିଲ୍ଲୀ: ଜମ୍ମୁ- କଶ୍ମୀରରେ ରାଷ୍ଟ୍ରପତି ଶାସନ ଜାରି ହୋଇଥିଲେ ମଧ୍ୟ ଆତଙ୍କବାଦୀ ଦମନ ଅପରେସନ୍‌ ଉପରେ ଏହା ଆଦୌ କୌଣସି ପ୍ରକାରର ପ୍ରଭାବ ପକାଇବ ନାହିଁ ବୋଲି ଦେଶର ସେନା ମୁଖ୍ୟ ଜେନେରାଲ ବିପିନ୍‌ ରାଓ୍ଵତ୍‌ ଆଜି (ବୁଧବାର) ସ୍ପଷ୍ଟ କରି ଦେଇଛନ୍ତି। ଆଜି ପୂର୍ବାହ୍ନରେ ରାଷ୍ଟ୍ରପତି ରାମନାଥ କୋବିନ୍ଦ ଜମ୍ମୁ- କଶ୍ମୀରରେ ୬ମାସ ପାଇଁ ରାଷ୍ଟ୍ରପତି ଶାସନ ଲାଗୁ କଲାପରେ ଏ ଘୋଷଣା କରିଛନ୍ତି ସେନା ମୁଖ୍ୟ ଜେନେରାଲ ବିପିନ୍‌ ରାଓ୍ଵତ୍‌। ଏଥିସହ ଆତଙ୍କବାଦୀଙ୍କୁ ଦମନ ପାଇଁ ସେନା ପକ୍ଷରୁ କରାଯାଉଥିବା ଅପରେସନ୍‌ରେ ମଧ୍ୟ କୌଣସି ପ୍ରକାରର ରାଜନୈତିକ ହସ୍ତକ୍ଷେପ ରହିବ ନାହିଁ ବୋଲି ସୁଦ୍ଧା ଏହି ଅବସରରେ ସ୍ପଷ୍ଟ କରିଛନ୍ତି ସେନା ମୁଖ୍ୟ ଜେନେରାଲ ବିପିନ୍‌ ରାଓ୍ଵତ୍‌।

ନୂଆଦିଲ୍ଲୀ ଠାରେ ଆଜି ସେନା ମୁଖ୍ୟ ଜେନେରାଲ ରାଓ୍ଵତ୍‌ କହିଛନ୍ତି, ‘ଆମେ ସଂପୂର୍ଣ୍ଣ ମାନବିକତାର ଦୃଷ୍ଟିକୋଣରୁ ରମଜାନ୍‌ ପାଇଁ ଆମ ଆଡ଼ୁ ଅସ୍ତ୍ର ବିରତି ଘୋଷଣା କରିଥିଲୁ। କିନ୍ତୁ ପରିଣାମ କ’ଣ ହେଲା ଆମେ ସମସ୍ତେ ଦେଖିଲୁ। ତେଣୁ, ବର୍ତ୍ତମାନ ଭାରତୀୟ ସେନା ପକ୍ଷରୁ ଆତଙ୍କବାଦୀ ଦମନ ଅପରେସନ୍‌ ପୂରା ଦମ୍‌ରେ ଆଉଥରେ ଆରମ୍ଭ କରାଯିବ। ବର୍ତ୍ତମାନ ଜମ୍ମୁ- କଶ୍ମୀରରେ ରାଷ୍ଟ୍ରପତି ଶାସନ ଜାରି ହୋଇଥିଲେ ସୁଦ୍ଧା ଆତଙ୍କବାଦୀଙ୍କୁ ଦମନ ପାଇଁ ସେନା ପକ୍ଷରୁ କରାଯାଉଥିବା ଅପରେସନ୍‌ରେ ମଧ୍ୟ କୌଣସି ପ୍ରକାରର ରାଜନୈତିକ ହସ୍ତକ୍ଷେପ ରହିବ ନାହିଁ’ ବୋଲି କହିଛନ୍ତି ସେନାମୁଖ୍ୟ ଜେନେରାଲ ରାଓ୍ଵତ୍‌।