ମିଛ କହୁଛନ୍ତି ଜୁକରବର୍ଗ : ଅଶ୍ବିନୀ ବୈଷ୍ଣବ

ନୂଆଦିଲ୍ଲୀ: ନିକଟରେ ମେଟା ସିଇଓ ମାର୍କ ଜୁକରବର୍ଗ କହିଥିଲେ ଯେ  ୨୦୨୪ ନିର୍ବାଚନରେ ଭାରତ ସମେତ ଅନେକ ଦେଶର ସରକାର କୋଭିଡ୍ ପରେ ହାରିଛନ୍ତି। କିନ୍ତୁ ତାଙ୍କର ଏହି ଦାବିକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଖଣ୍ଡନ କରିଛନ୍ତି। ମେଟା ଭଳି ଏକ ବଡ଼ ପ୍ଲାଟଫର୍ମର ମୁଖ୍ୟ ଏଭଳି ଭୁଲ ତଥ୍ୟ ପ୍ରଚାର କରିବା ନିରାଶାଜନକ। ମେଟା ଏହାର ବିଶ୍ୱସନୀୟତା ବଜାୟ ରଖିବା ଆବଶ୍ୟକ ବୋଲି ସେ କହିଛନ୍ତି ।

ନିକଟରେ ମେଟା ସିଇଓ ମାର୍କ ଜୁକରବର୍ଗଙ୍କ ଦାବିକୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଖଣ୍ଡନ କରି ତାଙ୍କ ବୟାନକୁ ଭୁଲ ବୋଲି କହିଛନ୍ତି। ଜୁକରବର୍ଗ କହିଥିଲେ ଯେ ୨୦୨୪ ନିର୍ବାଚନରେ କୋଭିଡ୍ ପରେ ହୋଇଥିବା ନିର୍ବାଚନରେ ଭାରତ ସମେତ ଅନେକ ଦେଶରେ ଶାସନ କରୁଥିବା ଦଳମାନେ ହାରିଥିଲେ। ଏହା ଉପରେ ପ୍ରତିକ୍ରିୟା ପ୍ରକାଶ କରି ବୈଷ୍ଣବ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି ଯେ ଭାରତରେ ଅନୁଷ୍ଠିତ ୨୦୨୪ ନିର୍ବାଚନରେ ୬୪୦ ନିୟୁତରୁ ଅଧିକ ଭୋଟର ଏନଡିଏ ସରକାର ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଆସ୍ଥା ପ୍ରକଟ କରିଛନ୍ତି। ବୈଷ୍ଣବ ସ୍ପଷ୍ଟ କରିଛନ୍ତି ଯେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଭାରତ କୋଭିଡ୍ ପରବର୍ତ୍ତୀ କଠିନ ସମୟରେ ନିଜର ନୀତି ଏବଂ ପରିଚାଳନା ଦ୍ୱାରା ଜନସାଧାରଣଙ୍କ ବିଶ୍ୱାସ ଜିତିଛି।